تقصد سى بايدن ينسحب قدام طرامب زى ما الزمالك كده انسحب قدام الأهلى..ألا هو بصحيح انتوا انسحبتوا ليه يا سى السيد - فيه إيه فى الجرنان واخدك كده مننا يا سى السيد؟! - اسكتى يا أمينة اللى كنت خايف منه حصل..كارثة وحلت على العالم كله ! - ليه بس كده كفى الله الشر ياخويا حصل إيه وغوشتنى ! - مادرتيش باللى حصل فى فرنسا..اومال ماسكة الموبايل طول اليوم بتهببى إيه؟ - بحاول اتعلم توك توك يا خويا يمكن اعرف أعملك فيديو زى فيديوهات الستات اللى انت بتتفرج عليها ليل نهار ولا يعنى مانشبهش ! - شكلك بتقولى يا شر اشتر وانا مش ناقصك يا أمينة اللى فيا مكفينى وكفاية أوى اللى حصل فى فرنسا ! - تانى فرنسا يا سى السيد ما تقول يا خويا جرى إيه ؟ - كان فيها انتخابات من يومين واليمين هو اللى فاز بيها ! - لولو لولو ييييييي - بتزغردى على إيه يا مجنونة انتى بقولك اليمين هو اللى فاز! - وماله يا سى السيد ربنا يجعلنا من أهل اليمين.. مش أحسن من الشمال ولا انت يعنى متأخذنيش بتحب الشمال ؟! - اللهم طولك ياروح..اليمين فى فرنسا مش هو اليمين بتاع أهل اليمين والشمال من اللى انتى فاهماه..لا خالص اليمين ده تصنيف سياسى وبتوع اليمين دول فى أوروبا كلها هم المتطرفين ! - يا نهار اسود ومهبب هو العالم كان ناقص ولا يعنى كان ناقص..ألا معناه إيه يعنى كلامك يا سى السيد متأخذنيش يعنى؟ - معناه ببساطة إن دى ممكن تكون نهاية العصر الماكرونى ! - لا بقى يا سى السيد إلا المكرونة.. وهو العالم يعيش ازاى من غير مكرونة.. وبعدين طول عمرك تقول نفسك تروح اطاليا عشان نفسك تاكل مكرونة من بتاعة بلادها مش فرنسا ! - ههههههه الله يحظك يا أمينة بقولك نهاية الماكرونية مش المكرونة..قصدى يعنى ان ماكرون رئيس فرنسا اتغلب وكده ممكن يستقيل زى ما عملها زمان المرحوم شارل ديجول ! - أحب على يدك يا سى السيد كلمنى بالعربى وفهمنى يطلع مين ديتول ده كمان ومين اللى عمل فى ماكرون المغرز ده ؟ - ديجول يا وليه مش ديتول.. ده مؤسس الجمهورية الخامسة فى فرنسا ..لكن اللى غلبوا ماكرون هم جودريان بارديلا والست مارين لوبان ! - تانى يا سى السيد؟ ماتقولى يطلعوا مين سى قردان ده ولا الست لبان دى ودول يعنى متأخذنيش يفرقوا إيه بالنسبالك عن سى ماركون؟ - ههههههه الله يحظك يا أمينة.. الموضوع كبير بس اللى عايز افهمهولك ان الجماعة دول لو وصلوا للحكم ناويين يمشوا العرب والمسلمين من فرنسا. - و ماله يا سى السيد.. لو مشوهم يبقوا ساعتها يروحوا أمريكا ! - دى أنيل وأضل سبيل واحتمال بايدن ينسحب وترامب ياخدها مقشرة وده بيكره كل المهاجرين برضه ! - تقصد سى بايدن ينسحب قدام طرامب زى ما الزمالك كده انسحب قدام الأهلى..ألا هو بصحيح انتوا انسحبتوا ليه يا سى السيد؟ ! - شكلك مش ناوية تجيبيها البر..قومى اعمليلى كوباية شاى بلبن أحسن ! - طب إيدك على ألف جنيه تمن الشاى باللبن ! - إنتى اتجننتى يا ولية ولا إيه حكايتك بالظبط؟ - د أنا عملالك أكاونت يا خويا..دى بتتباع فى الساحل الشمالى بألفين جنيه.. ياما نفسى تودينى الساحل بقى.. الشاى بلبن نادانى يا سى السيد ! - طب لمى هدومك واجهزى يا أمينة ! - يعنى هتودينى الساحل الشمالى يا سى السيد؟ - لا هوديكى ساحل روض الفرج.. عند امك يا أمينة !