قال لي .. لاحظ كده.. الوحيدين الذين لم ينتقدوا قرارا واحدا صدر عن المجلس العسكري.. هم التيار الديني. بجناحيه الاخوان والسلفيين.. وهما برضه اللي دايما بيأكدوا سواء بمناسبة أو بدون علي ان هذه القرارات أو القوانين حاجة زي الفل .. ومفيش اصلح منها للصالح العام وللبلد.. ولو دققت في الملاحظة.. ستجد انهم اول من يتصدون لكل من يقول رأيا عكس ذلك، ولو دعت اي قوي سياسية لمظاهرة قد يقال فيها انتقادا أو هتافا ضد المجلس العسكري لا يشاركون فيها، ومش بس كده، دول بيعلنوا ان اللي حيشارك في مثل هذه المظاهرات إنه بيعمل ضد البلد واستقراره وضد الديمقراطية وتحقيقها.. فالاخوان يا سيدي لا يريدون صداما مع المجلس العسكري.. لان فرصتهم الان للفوز بكل شيء كبيرة جدا، وقد لا تتكرر، وعلشان كده.. ماشيين جنب الحيط وشغالين في وصلات الغزل الصريح مع »الميري« .. علشان يضمنوا أن الساحة تكون مهيأة لهم دون غيرهم سواء كان غيرهم دول احزاب ناشئة.. بتقول يا هادي .. أو احزاب قديمة..، وحتي الوحيدين اللي كانوا »خايفين« من منافستهم.. اللي هما.. فلول الحزب الوطني .. نزلوا فيهم ضرب وتلطيش.. وحبسوهم وفرجوا عليهم امة لا إله إلا الله لغاية ما استخبوا في الجحور .. وعلشان كده .. لن يصطدموا أبدا .. أبدا مع المجلس العسكري .. هذا اولا.. اما ثانيا.. أوعي تصدق مسرحية أو ملعوب ان الاخوان لن »يمنحوا« اصواتهم لمرشح الرئاسة عبدالمنعم ابوالفتوح.. ده حلمهم اللي بيشتغلوا عليه من سنين .. ان واحد »اخواني« يقعد علي كرسي الرئاسة ويدلدل رجليه.. عاوز بقي تفهمني انهم »حيسيبوها« ومش عاوزينها زي ما بيقولوا.. امال يدوا صوتهم لمين لواحد »علماني« ؟.. اما ثالثا.. الاخوان لن يلعبوا أو لن يخوضوا الانتخابات البرلمانية »الشعب - الشوري« للحصول علي »الاغلبية« لانهم لن »يقعوا« في نفس الخطأ.. »الغبي« الذي وقع فيه جهابزة و»قزعة« الحزب الوطني في الانتخابات اللي فاتت.. هما.. حيدخلوا وحيلعبوا ويكسبوا جزء .. لانهم في النهاية ضامنين الاغلبية.. لان عندهم »البديل« اللي حيعوض الكراسي اللي مش داخلين عليها.. الاخوة السلفيين .. حيدخلوا معاهم في تحالف.. أو يضموهم وبكده ادام الناس.. صدقوا ما عاهدوا عليه ومخدوش الكراسي وفي الوقت نفسه خدوا الاغلبية. يعني ايه.. يعني اللي ما بيشفش من الغربال يبقي »اعمي«. وسلم لي علي اسمها ايه آه .. الديمقراطية..
