"اعترف الجاسوس في أثناء التحقيقات أنه هو سبب الفتنة الطائفية وحريق قسم الأزبكية وأنه المتسبب في الانفلات الأمني وأن التلاجة مش بتاعته قائلا.. أنا اتجسس آه أكدب لا" تعليق أحد الأعضاء على صفحة "سر التلاجة اللي ورا الجاسوس" وذلك بعد القبض عليه. واحد من الأعضاء الأذكياء على الصفحة عرف إزاي المخابرات قدرت تقبض على الجاسوس "بيقولك الجاسوس بعد ما صور مصر كلها وجمعها في فيديو .. بدل ما يعمل تاج للموساد الإسرائيلي عمل تاج للمخابرات المصرية". لم تكن حاسة المصري المتميزة بعيدة عن الموضوع وأطلقوا نشيد للجواسيس " انا بصحي الصبح بدري..اخد معلوماتي واجري..من وسط المتظاهرين..اتصور مع دبابه..وحصان وبغال وديابه..واحطها تسقع في تلاجتي يا حلوين". أحمد مختار دماغه راحت على طول لأشعار عمنا يونس شلبي ودمج فيها لمساته وقالك "طلعت يا محلى نورها شمس الشموسة.. يالا بينا نكدب ونمسك الجاسوسة جاسوس راح يقابل جاسوس ياعينى.. ملقهوش جاسوس ياعينى لقاها اشتغالة ياعينى ياليلى ياجاسوسى". وبعد مشاهدة صور تجمع بين الجاسوس وعدد من المواطنين وعرفه انه الراجل دا بيحس بالناس وبيعايش مشاكلهم " الجاسوس لازم يكون بيحس بمشاكل الناس وهمومها.. وعلى شان كده احنا اخترناه..أول جاسوس منتخب في مصر". وعلى طراز الأغاني الشعبية أحمد مختار غنى وقال "جاسوس يا اما.. ماله يابنتى ... اتجسس عليا .. يالهوى.. واتصور معايا.. يالهوى". وبعيدا عن الأغاني كانت هناك خبرات من الأعضاء لمعرفة الجاسوس والكشف عنه " يوميات مخبر: كيف تتعرف علي الجاسوس.. سهلة جدا.. بيتصور مع كل الناس .. أهبل ومحتفظ بكل الصور.. معاه كاميرا.. وواقف في مظاهرة"و " وناصر فتحي " " في دورات جاسوسية في الجامعة الأمريكية بأسعار مخفضه ... مين جااااااااي". "بيقولك الجاسوس حارب في حرب لبنان وقتل واتقتل.. واحتمال يكون صاحب أول ضربة جوية هناك" رد عليه واحد وقال " انا قولتله بلاش الطلعه دي ليتعلم عليك ماصدقش". في حين أن عمر قال حصرى: " وجدنا اكتر من 430 رسالة نصيه "فارغه" على موبايل الجاسوس مكتوبه بالحبر السرى وتم ارسال الموبايل الى شارع عبد العزيز فى حراسه مشدده". نيرمين مهران قالت " دخل يتجسس واحنا قاعدين ..خرج يتجسس واحنا قاعدين...اتجسس فى امبابة واحنا قاعديييين...اتجسس فى صول واحنا قاعدييين ...اتجسس فى الأزبكية واحنا قاعدييين ... واللية عيد والجاسوس بيتجسس .. الجاسوس الاسرائيلى بطل فيلم اضحك الصورة اتطلع حلوة ...اخراج الأمن الوطنى". رشا فهيم عرفت أنه تم تكريم الجاسوس من ورانا وقالك "مفاجأة فظيعة : العثور على صور تسليم قلادة النيل للجاسوس كأفضل جاسوس متعاون (وشيك على فكرة) وقام بتسليم الجائزة القائد الجنرال شعبان عبد الرحيم وسط لفيف من الفنانين والأدباء ههههههه أدولو سلاااااااااااااااااااااح هههههههههههه". خالد حسن كان متابع الجاسوس والقضية بتاعته لدرجة أنه قدر يعرف اللي الحاجات اللي كانت معاه أثناء القبض عليه "قفشوا معاه بزازات مسيله للدموع وبلالين مغناطيسيه و يويو كهربائيه مشعه وخمس صفافير وباكو بسكويت بالزبده وكان حاطط فى جيبه قنبله نوويه محموله و 6 ريسيفرات سارقهم وقت الانفلات الأمنى". رامي برده كان متابع الجاسوس وعرف أن فيه اتفاقيات من تحت الطربيزه وقال " السلطات المصريه تعرض ع الصهاينه استبدال الجاسوس بحسين سالم والصهاينه يردون ..حسين سالم قصاد مبارك واشربو الجاسوس اللي عندكو". العروض نزلت على الصفحة مرة واحدة وفيها حاجات مغرضة جدا وهدايا : " إعلانات الجاسوس في فودافون:: أتجسس في بلدنا.... وعيش اللحظه". "إعلانات الجسوس في موبينيل:: مصر بلدنا.... أتجسس من القلب" " عرض الصيف::: أتجسس علي مصر وتاخد تلاجه 18 قدم...وكاميرا" الناس الرياضيين كانوا موجودين ايضا وقالك لازم نحط لمساتنا "عاجل |مؤكد| مرتضي منصور: الجاسوس ده أنا مراقبه من زمان وملفاته وسي ديهاته عندي". أحمد وجدي شكله كان موجودا في غرفة الاعترافات وقال "اعترافات الجاسوس: لم أكن انتوي التجسس في الفترة الانتقالية المقبلة". بينما أحمد داود " التلاجة دى دليل قاطع على ان اسرائيل كانت تنوى (( تجميد )) العلاقات مع مصر .. مما ينذر بقيام حرب ((باردة)) جديدة" وعن موقع الجمل ودور الجاسوس فيها قالك "النيابه وأمن الدوله ومجلس الأمن وكل الناس نسبوا كل حاجه من قسم الأزبكيه للفتنه الطائفيه وكل حاجه للجاسوس إلا حاجه واحده بس .. موقعة الجلابيه .. ياتري سر كده إيه؟؟؟؟ .. ممكن يكون نسيوا". وفي أحد التعليقات على القبض على الجاسوس والترحم على أيام رأفت الهجان " الله يرحم ايامك يا رأفت يا هجان المهنة باظت من بعدك". "أنا متوقع مانشيتات بكرة هاتكون .. الجاسوس الإسرائيلى هو السبب فى خروج مصر من تصفيات كأس الأمم وهو اللى وعد الأخت عبير بتاعت الكنيسة بالجواز .. حاجة تقرف".