كلام مسئول

محمد صلاح: يامساء الخير الفن والحياة وجهين لعملة واحدة دا مش كلام انشا ولا شعارات من غير اساس الفن واخد مواضيعه من حياة الناس والناس خدت سلوكها وقيمها وكتير من المثل والقيم ويمكن الحلول من الفن دا كان بيتم بوعي او بغيروعي لكن العملية بتم ,عملية النقل زي الجينات اللي بتنقل الصفات الوراثية في سرية تامة من غيرماحد يشوفها .. دنيا الفنون دي جميلة تدركها الحواس البصرية في السينما في الالوان في الشارع في العمارة وفي الاعلانات بتدركها ... وفي الحواس السمعية في الموسيقى وكلمات الاغاني كل حركة يعملها ممثل او ممثلة او مذيع لقطة مصورة حركة مخرج كلمة في حوار بتأثر في سلوك الناس وفي ودانهم ، منتجو الوعي العام من خلال الصورة والكلمة عارفين دا كويس اللي انتجوا افلام جعلوني مجرما ، كلمة شرف، اريد حلا ، افواه وارانب ، البيه البواب والمدمن عارفين انهم بياثروا مش بس في منظومة السلوك لكن في بعض الافلام وصلوا لتغيير القانون ..فيه افلام بتعرض المشكلة ما بتقدمش حل اللي عملوها بيقولوا مش عايزين ناثر في حد ولا نغير في حاجة احنا بنعمل فن وبنعرض واقع دا كلام جميل لكن البعض شايف ان دي نص الرسالة اللي حكوها او كتبوها مكملوهاش.
في الاغاني حالة تذوق تراكمت على مدى السنين مع السميعة وفي سبيل التطويرخدونا بقى في الموسيقى والكلمات والالحان والاداء لضفة تانية خالص غربي او سوقي او حتى منحط سمعنا الحان يمكن فيها ابداع الكمبيوتر اكتر من ابداع العقل وكلمات اغاني ما بتثبتش وان ثبتت يتكسف الواحد يقولها قدام حد ، اغاني بتلقى طوق النجاة في الفيديو كليب وتلقى الاغنية مشاهد عليها كوادر راقصة مشهيات صارخة او فاضحة بيكسر معاه سلوك اللي بيتقدملهم الفن دا غير البهجة والذوق في الفن سرقة من رصيد الحياة ..عن تاثير الفن على الناس هيكون لينا النهاردة كلام مسئول
فاصل
محمد صلاح: الفن محرض طالما وراه مبدعين كبارمن قلوبهم وفكرهم مبدعين حتى لو تعرضوا لوعي مغيب بيكونوا واعيين حتى لو تناولوا ازمة خطيرة فبيكون في ابداعهم ولو بشكل غير محسوب نور في نهاية النفق الفن وحضوره الطاغي في وجدان الناس ..هيكون لينا معاه النهاردة مع استاذ الطب النفسي الدكتور هاني السبكي كلام .... مسئول
ومن كلام الدكتور هاني السبكي
بالفعل الفن الجيد يفرض نفسه لكن الفن الحقير يفرض نفسه اكتر لانه اقرب الى غريزة الانسان وهناك اعمار لا تستطيع ان تميز ما بين الرقي وما بين الفساد ,هناك بعض الافلام قلبت بعض موازين القيم الاجتماعية في فترة معينة وانا اسال هل دور الفن ان يبني ام يهدم هل نطمئن ام نثير الهلع والرعب في نفوس ,المدرس اصبح يدرس ولا يربي لانه هو نفسه محتاج ان يربى من جديد وفاقد الشئ لا يعطيه ولدينا الان سلسلة مليئة بالمشاكل من الطبيب الى المدرس الى المهندس الى كل دوائرالمجتمع
الكل اصبح الان يعمل لذاته روح الفريق اختفت ولم يعد هناك فريق ولا ابداع فاذا انتجت سأنتج لنفسي ولكي انجح لنفسي علي ان اتغاضى عن الانسانيات والمشاعر فتحولنا الى انسان مادي ومن لم يستطع هذا تحول الى نوع من العنف الداخلي والفساد النفسي ، الجمهور الرقم المهم في معادلة الفن يمكن ان تنسى في الزحمة في مطحنة انتاج الفن من فيلم لمسلسل لمسرحية لاغنية
انواع الابداع دي موجودة لكن المحتوى ايه شكله ايه ولا العلاقة مع المشاهد شبكة معقدة جدا خيوط دقيقة هنحاول نقراها ونفكها مع استاذ الطب النفسي الدكتور هاني السبكي اللي هيكون لينا معاه كلام ..... مسئول
فاصل
محمد صلاح: ارحب باستاذ الطب النفسي الدكتورهاني السبكي يا دكتور هاني،عبد الوهاب قال دنيا الفنون دي خميلة هي لسه كده؟
د/هاني السبكي- استاذ الطب النفسي: لا لا .. دي كلمة خميلة اتشالت من القاموس خلاص اقولك كلمة مش لطيفة نقول دنيا الفنون بقت نيلة مش خميلة
محمد صلاح: ليه بقى بقت مش خميلة ؟
د/هاني السبكي: لان الفن لم يعد يحمل التعريف الاصلي للفن بقى شئ مزيف بنقول عليه فن واصبح كل من في دماغه فكر متدني يكتبه ويقول فن وحرية تعبير والفن دا مسالة فيها انطلاق للفكر ونسي ان الفكر اللي بيقدم فيه الفن او بيقدم بيه مؤلفه او لحنه او ايا كان نوع الفن اللي بيقدمه نفس الفكر بتاعه دا معوج
محمد صلاح: لكن مش التعميم فيه نوع من الخلط او الخطأ يا دكتور يعني هل كل الفنون اللي بتتقدم دلوقت بالشكل دا نسبة عالية قوي وبتزحف على البقية الى ان تنتهي فالتيار جارف جدا بتاع افساد الفن الى ان ينتهي الفن؟
محمد صلاح: الحواس اللي عندنا اللي ممكن نتذوق بها من بينها حاسة السمع وحاسة البصردي بتاخد رصيدها من الحياة ومن الفن .. بتاخد رصيد غلط دلوقت ولا ايه..؟
د/هاني السبكي: بتاخد رصيد ملوث زي بناء الجسم كده احنا بنبنيه بالاكل فلما ناكل اكل ملوث ومسرطن لا تتوقع انه هيكون فيه بنية سليمة اطلاقا العقل دا غذاؤه الفكر والفكر دا جاي من خلال السمع ومن خلال النظر ومن خلال الاحاسيس العامة اللي احنا بنحس بيها اللي بتكون الوجدان
محمد صلاح: تاريخ السينما المصرية دا كله انت شايف ان السينما ماساهمتش في الرقي بوجدان الناس ؟
د/هاني السبكي: لا مقدرش اعمم هنا ، في افلام كثيرة جدا ساهمت بالرقي في وجدان الناس وانت لما بتبني حاجة بتاخد مجهود كبير قوي وعشان تهدها بتاخد مجهود صغير قوي فممكن جدا 10 ، 15، 100 فيلم يبنوا الوجدان ويطلع فيلم او اتنين يهدوا لانه بيلعب على قيمة معينة ويزينها في السينما وكأنه بيحط السم في العسل فممكن ان يهدم كل ما تكلمنا عنه من وجدانيات من خلال فيلم واحد
محمد صلاح: من الافلام اللي الناس بتعتبرها ساهمت في حل مشكلة بشكل او بآخر فيلم افواه وارانب اللي فيه جزء منه بقى اعلان دلوقت عن مشكلة تحديد النسل انت شايف ان دا كان نموذج كويس؟
د/هاني السبكي: لا .. انا بس عاوزافرق بين الحبكة الفنية وروعة التمثيل وروعة الاخراج والمحتوى فممكن يبقى ممثلين بارعين مخرج رائع حاجات كتيرة من مكونات الفيلم فنيا
محمد صلاح: طب ايه اعتراضك على افواه وارانب؟
د/هاني السبكي: احنا بنتكلم عن مشكلة عاطفية ومشكلة زواج ما بين السيد وخادمته احنا بنتكلم في قيمة الزواج اصلا لابد ان يكون هناك التكافؤ الاجتماعي والثقافي والمادي كل الامور اللي تعمل زيجة ناجحة فربنا جعلنا طبقات
محمد صلاح: بس ليه سبت موضوع تحديد النسل في الفيلم دا ؟
د/هاني السبكي: لاما انا جاي .. تحديد النسل كان حتة في الفيلم كويسة هو عاوز يوريك المأساة اللي وصلت لها بسبب كثرة النسل ، حاطط حتة كويسة مفيش مانع لكن هدم فكرة تانية بطريقة ملتوية وبطريقة غيرمباشرة تماما وفيه مشهد ما انساهوش اللي هو لما خطيبة محمود ياسين اللي هي تتناسب معاه اجتماعيا وتتناسب معاه من ناحية الثقافة والرقي جايز يكون فيه اختلاف بينهم روحيا محبهاش محبتوش دي مسالة ولكن هو ساب النقطة ان هما مش متوافقين عاطفيا وركز على انها عندها نوع من العنجهية او التعالي والعجرفة وكره المشاهد فيها جدا وحبب المشاهد في الشغالة الطيبة طبعا السيدة فاتن حمامة بتؤدي دور من اروع ما يمكن كتمثيل وخلانا نتعاطف معاها جدا وبرر ان هما يتزوجوا في النهاية لما في الاخر بتقوله يا انا يا هي فبكل بساطة بيقولها هي...تعال نتصور ما بعد الفيلم الاتنين اللي اتجوزوا دول شكل حياتهم هيبقى شكله ايه
محمد صلاح: طب ايه المشكلة ان البيه يتجوز الخدامة اللي فيها صفاء وفيها نقاء واقبلت على التعليم في مرحلة لاحقة وبعدين السينما فن الخيال والطموح ايه المشكلة ..؟
د/هاني السبكي: هو المشكلة اني لا اقلل من قيمة الخادمة كوظيفة دي مسالة ما بتكلمش فيها بنت مكافحة بتجري على اولاد صغيرين كتير دي مسالة انسانية بحتة ولكن ما ينفعش تخلط مادتين كيماويتين مش هيمتزجوا ما تحطش زيت ومية لا يمكن لا زم هينفصلوا مهما قلبت هينفصلوا هو دا تكوين الرجل الارستقراطي المتعلم المثقف اللي مفردات حياته بدأت منذ الصغر وفي كل معنى بياكل ازاي وبيعيش ازاي ما ينفعش كل هذه مفردات اخلطها بمفردات مختلفة تماما تحت شعار الانسانية ..لا.. الانسانية الا تظلمها بزواجك ولا تظلم نفسك بزواجك منها
محمد صلاح: طب قولي دا كان تاثيره ايه على المجتمع ؟
د/هاني السبكي: دا اثناء عرض الفيلم ..الفيلم اتعرض فترة طويلة جدا حصل مشاكل في البيوت كان سنة 77 كان التطلع اللي غمر فئة الناس اللي بتشتغل شغالات او خادمات وبقول دي مسالة لها احترامها خلى عندهم تطلعات ..الله دا انا اللي بطبخ وانا اللي بنضف البيت وانا اللي بعمل الهدوم بتاع هذا السيد يعني انا مهمة جدا في حياته والست دي هي اللي بتخرج وبتقعد مع ضيوفها بالليل وبيروحوا النادي لا انا احق به منها فحصل تنافس ما بين الخادم والمخدوم
محمد صلاح: ودا اثر على المجتمع ؟
د/هاني السبكي: اثر طبعا .. لانه اختلط الحابل بالنابل بقى ناس تبرر هذا وتقولك وفيها ايه ما احنا كلنا بشر ما احنا كلنا ولاد حوا وادم
محمد صلاح: يمكن في سنة 77 كان فيه تحول حاصل سياسي واقتصادي في مصر والدخول في سياسة الانفتاح الاقتصادي يمكن ساعتها كان ارضاء لهذه الفئة او ارضاء لهذه الطبقة عشان ما يتقالش انه رجال الاعمال او المستثمرين الجداد اللي بينفتحوا بيستفيدوا من الانفتاح ...؟
د/هاني السبكي: اذا كان هذا الهدف فهو هدف خاطئ لان انا بتكلم على مجتمع، بنية مجتمع كامل لابد ان يكون متناسق ويكون متدرج في الدرجات زي السلم انما علشان ارضي فئة معينة وارضي فئة اخرى صعدت من الزيرو الى القمة بسبب انفتاح كان غير منضبط الناس اللي اغتنت فجأة دون تدرج فكري ودون تدرج ثقافي ودون تدرج تعليمي ودون تدرج اجتماعي هم نفسهم اتلخبطوا ... على فكرة الفترة دي هي دي اللي ظهر فيها او انتشر فيها الادمان ، آه طبعا الهيروين بدا في مصر في هذه الآونة لأنه الناس اللي اغتنت فجاة دي حدث عنده ربكة عقلية يعني انا عندي فلوس لكن ما اتعلمتش اصرفها ازاي فاللخبطة دي وحيرته الى من ينتمي ، ينتمي الى مجتمع الارستقراطيين او المكافحين وانا زميلي الذي لم يغتن بعد كما هو فحدث فاصلة في المجتمع ما بين هذه الفئات ... ومش عارف يحل المشكلة فبقى يتمتع بأي متع من المتع الزائفة وبعدين المخدرات خلاص لغت تفكيري بدل ما اقعد افكر واتعب لا انا هلغي الجهاز اللي يخليني افكر واتعب فاخد المخدرات
محمد صلاح: خليني ارجع للنقطة بتاعة الفقرا والاغنيا في السينما وتأثيرها بعد كده على المجتمع في فيلم القلب له احكام مثلا سنة 56 دا كان احمد رمزي وبرضه الفنانة الكبيرة فاتن حمامة بيدرسوا طب مع بعض دا من مستوى اجتماعي ودي من مستوى اجتماعي اخر منخفض لكن درسوا مع بعض الطب وكان كوبري ابو العلا بيفصل ما بينهم ما بين الزمالك وبين بولاق واتحلت المشكلة واتجوزوا وشوية افيهات بقى استيفان روستي والكلام دا بقى ؟
د/هاني السبكي: فكرة قديمة لكن هتلاحظ ان الافكار دي نشأت بعد الثورة بعد سنة 52 لانه كان فيه تشجيع لإلغاء الطبقية والفوارق الاجتماعية ودا كان غلط الحقيقة يعني لانه لو صح كانت هذه الافلام هادفة وانتجت كان المفروض ان احنا دلوقت نلاقي نجاح في الحياة الزوجية ما بيحصلش نسبة الطلاق وصلت 34 او اكتر في المية في اول سنتين والسبب الرئيسي في معظم هذه الزيجات الفاشلة الفوارق الاجتماعية مش بتكلم على الفلوس على فكرة بتكلم على الفرق الاجتماعي الثقافي والفكري لانه علشان واحد يكون على مستوى اجتماعي منخفض عشان يصل الى المستوى الاجتماعي المرتفع امامه الفرصة ولكن امامه 4 اجيال لكي يصل الى هذه الطبقة علميا ، فعشان اكون انا راجل بسيط في مهنة بسيطة بماديات بسيطة ومجتمعي كله بسيط دا الطبقية تدفعني الى اني ارتقي لكن هارتقي درجة
محمد صلاح: حفيدك بقى ...؟
د/هاني السبكي: بالظبط..ودا حصل في التاريخ ، كتير ناس في مستويات اجتماعية بعد 4 اجيال اصبحوا لهم قيمة اجتماعية مختلفة فحصل تدرج طبيعي انما ما ينفعش من الدرجة الاولى اتزوج من الدرجة الرابعة هيحصل خلل وعدم اندماج وخلافات صغيرة جدا في كل مفردات حياتي حتى في اسلوب اكلي وشربي وتعاملي مع الناس وتعاملي مع اولادي والفاظي اللي طالعة النكتة اللي انا اقولها اذا كانت زوجتي من طبقة عالية مش هتفهمها فهيبقى دمي تقيل واناعندي مجتمع مش معتبرني دمي خفيف فتنتهي ان انا اروح اتجوز واحدة من مستوايا الاجتماعي عشان ارتاح واعيش حياة طبيعية بدل ما انا قاعد متكلف دائما قدام مراتي عشان ارضيها او العكس
محمد صلاح: هنقلك نقلة تانية فيلم البيه البواب متهيالي دا فيلم حذر من النمو الاقتصادي عند هذه الفئة التي تستغلها في ان ترتقي ماديا دون ان ترتقي في معايير القيم مثلا دا كان كويس ولا ....؟
د/هاني السبكي: آه آه ..دا بيعرض صورة حقيقية وصل بيها المجتمع الى هذا التدهور وهنا بيعرض مأساة اجتماعية بينبه الناس يا جماعة خدوا بالكم من هذه الفئات دا فيلم واضح جدا يعني .
محمد صلاح: طيب خلينا نقول عادة انه الفن في بعض الاحيان بيلجا الى استخدام الموضات يعني تطلع موضة افلام المقاولات ، افلام الكوميديا، افلام الاكشن او العنف .. وصلنا في المرحلة الاخيرة الى نوعية من الافلام موجودة يطلق عليها افلام العشوائيات اللي بتصور كيف يحيا إخوانا وأهالينا اللي عايشين في مناطق عشوائية او في احياء على اطراف المدن اومابينها عرضت سلوك الناس اللي بيتم داخل هذه المناطق اللي شوية يتكون صعبة يعني في معظم الاحيان بدون ما نذكر فيلم معين الناس بتخرج مصدومة والقائمين على هذه الافلام بيقولوا انه مجرد الصدمة دي بتحرك حاجة في المجتمع دا ودعوة للمسئولين ان هما يتحركوا يتصرفوا وان هما حذروا مش مطلوب منهم انهم يدوا حلول ..
د/هاني السبكي: مش مطلوب من مين
محمد صلاح: من القائمين على هذه السينما ؟
د/هاني السبكي: ليه انت راجل صاحب فكرة وبتعرضها ومعترض على هذه الصورة العشوائية وانا موافقه يبقى لازم تفكر وتقدم لي انا كمتفرج بسيط الثقافة ما بقراش ما بفهمش لان انا من ضمن الناس العشوائيات صح ممكن المشاهد دا ممكن يكون راجل متعلم ويكون عشوائي ..العشوائي هيتعاطف لانه بيتعرض حاله ولكن مالقاش حل واللي اعلى من هذا المستوى هيشمئز من هذا المستوى العشوائي وهينفصل عنه ومالاقش حل .. طيب اذا كان المسئولين اللي المفروض انهم يشوفوا هذه الافلام ويجدوا حلول دول المسئولين على بال ما يلاقوا حلول عندهم مشاكل تانية.. واشك ان هما يعرفوا الحلول لانه داري كويس قوي بما يحدث في العشوائيات قبل ما الفيلم يطلع ، مقدرش اعترض على هذا الفيلم لكن اقول ان الفيلم دا عايز فيلم كمان عايز جزء تاني ، زي ما يجيلي عيان واكتشف ان عنده كذا واقوله انت الكبد بايظ وعندك السكر والبنكرياس متنيل يقولي اعمل ايه يادكتور اقوله فكر معايا بقى فكر انت انا عرضت لك انت اتصرف يبقى انا مش دكتور دا انا بكشف لك المصيبة واحلهالك لان هذا المريض جاهل بالطب هذا المتفرج جاهل بالحلول والا كان حلها وكان انتقل بمجتمع العشوائيات وهو ضحية مجتمع فانا في العشوائيات انت بتفرجني على نفسي
محمد صلاح: التفاصيل الدقيقة للحياة داخل المجتمعات دي عرضها بالشكل دا انت معاه ؟
د/هاني السبكي: لا لا لا ..هقولك ليه يعني اذا كنت انا في مجتمع بعيد عن هذا ، اديني اشارة لما يحدث ولكن مش لازم تشممهالي وتدوقهالي وتحسسهالي ، المبالغة في التعبير وفي الوصف وفي المشاهدة لها تأثيرين اطلعت من لا يعلم على هذه الالفاظ وهذه الاساليب وفيه نشء وفيه شباب لسه احنا اتفقنا ان احنا بنكون وجدانهم وبنرقيهم فانا علمته الناس دي بتعمل ايه وما تنساش ان الممثل لما بيمثل وبيكون جيد بيحصل نوع من التوحد بيني وبينه فالهزار اللي قاله انا اروح اقوله في البيت افيهات ما هو الشعب كله ماشي بالافيهات دلوقت وابتدينا بالافيهات نشتم بعض وبالاب وبالام ونقول حاجات غريبة شافوها في الفيلم ، شافوها في التمثيليات التليفزيونية راجل بيكلم مراته دايما بصوت عالي وهي بتشوح له وبتشتمه البيئات دي ، يا اخي انت عايز تعرض لي ايه انت عايز تسفه مخي وتخليه اكثر سفاهة ولا عايز ترتقي بيا ..لا .. علمني الكلام الحلو، زمان كان فيه افلام بتشير الى البيئات المتدنية والعشوائيات برضه مكانش فيها الالفاظ الفجة ولا المشاهدة العينية اللي احنا شفناها في بعض الافلام والمسلسلات لان كل ما اراه على الشاشة بالذات يخترق مسمعي ونظري وعقلي فالكلمة والايماءة والهزار وطريقة الاكل وطريقة اللبس وطريقة الحركة بتنتقل الي .. فرصة العمراذا كان هذا الشعب في حالة من تدني الثقافة والعشوائية في التصرف والسلوك اللي احنا شايفينها طول النهار في الشارع وشفناها في ماتشات الكورة اخيرا اللاعب اللي شتم شفناها اخيرا على الشاشة كل هذه الامورعندي فرصة عمري ان اربي الشعب كله من خلال السينما ومن خلال التمثيليات التليفزيونية والدراما هدف الدراما ان ارقي مش ان انزل بيهم الى مستوى ادنى
محمد صلاح: يعني دي مش واقعية ما تعتبرش ان دي واقعية ؟
د/هاني السبكي: ما الواقعية صلاح ابو سيف كان رائد الواقعية انما ربى فينا قيم كتير قوي حط الواقعية دون ان يجرح المشاعر ودون ان يجرح المسامع اطلاقا هو دا الفن بقى هو دا التمكن هو دا السهل الممتنع
محمد صلاح: انت فتحت مجال لموضوع تاني هندخل فيه بس خليك معانا لسه الكلام مخلصش...؟
فاصل
محمد صلاح: اتكلم الدكتورهاني السبكي عن الفرق بين الواقعية القديمة والواقعية الجديدة معانا تعليق كده للاستاذ مصطفى محرم السيناريست المعروف تيجي تشوفه معانا
د/هاني السبكي: ياريت
محمد صلاح: نشوف الاستاذ مصطفى محرم
فاصل
مصطفى محرم- كاتب سيناريو: العمل الفني بيدعو الى المشكلة بيقول ان هنا فيه خلل، هنا فيه مشكلة معينة وبيقدر انه يجسم هذه المشكلة بحيث انه يشخص لكن العلاج مش من وظيفة الفنان ، الفنان بيطرح بيحط ايده على المشكلة بيبرزها لكن بعد كده بيجي المتخصصين انهم يقدروا يضعوا حلول للمشكلة وعندنا مثلا فيه نماذج من الكتاب العظام ويمكن نذكر مثلا واحد زي تشارلز ديكنز انه مثلا في روايته زي "اوليفر تويست " حط ايده على مشكلة الملاجئ في القرن ال19 في انجلترا فقدم رواية اوليفر تويست وبين المساوئ اللي كانت بتدور في الملاجئ ودار الايتام انما هو محطش ايده على العلاج لان هو مش Social reformer مصلح اجتماعي ..الفنان مبدع .. ولذلك اللي بينتقدوا الاعمال اللي ما بتحطش حلول دول ناس معندهمش أي فكرة عن طبيعة الفن
فاصل
محمد صلاح: استاذ مصطفى محرم بيقول انه اللي بيطالب انه الفن يحط حلول يبقى معندوش فكرة عن طبيعة الفن وان الفنان مبدع مش مصلح اجتماعي عندك رد ؟
د/هاني السبكي: انا مقدر قوي مصطفى محرم يعني اعماله كلها تشير اليه كسيناريست رائع جدا ولكن تشارلز ديكنز مكانش نبي القوم يعني كون تشارلز ديكنز قدم صورة اجتماعية في اوليفر تويست وعرض فيها مشكلة كبيرة في مجتمع تلقى هذه المشكلة وحلها دا جزء من الفن يعني الفن يعرض ويشخص دا جزء..الجزء التاني اذا كان عندك اقتراح قدمه كراجل مبدع الاستاذ مصطفى محرم بيتكلم وكانه ممنوع عليه ان يقدم اقتراح انا مش مسئوليتي المعترض على هذا ما بيفهمش في الفن دا قول مغلوط اعترض عليه تماما لان الفن مبدع ومتلقي اذا مكانش فيه متلقي يبقى مفيش فن ، الدراما جزء من الفن وافهم في الفن كمشاهد ومتلقي وهو بيفهم في الفن كمبدع ما ينفعش يقول مبفهمش في الفن لو ما بنفهمش في الفن يبقى مش هنتفرج على فن ونرفضه تماما يعني ممكن اقولك انا برفض الفن لا بفهم فيه ولا عايزه انا هحل مشكلتي لوحدي اذا دا قول منقوص الحقيقة الفن يجب ان يعرض ويشخص ويفتش في خبايا المجتمع ليظهر واذا كان هناك اقتراح يا ريت يقدم اذا مقدمش مفيش مانع ولكن ما ينفيش عن نفسه هذه المسئولية لازم الفن يرتقي بفكري انا كمشاهد وييرتقي بفكر المسئول
محمد صلاح: طيب عايز اعيش معاك موضوع يتعلق باللجوء لبعض الالفاظ او التعبيرات اللي بتظل لفترات طويلة ودا من اجل الترويج او تثبيت الذاكرة عن فيلم معين او اغنية زي مثلا نورماندي تو لعبد الفتاح القصري مثلا وزي نشنت يافالح لاستيفان روستي ومرورا بقى بحاجات كتير جدا لحد قصة ولا مناظر وهو كله ضرب مفيش شتيمة الحكاية دي برضه من الواقع لها تاثير في المجتمع ؟
د/هاني السبكي: لهاتاثير لطيف مش تاثير وحش لانها لم تجرح أي نوع من المشاعر ولم تضيف الى قيمة هابطة لا دي خلتني اضحك ودا شئ مطلوب يا خلتني استخدمها في لفظ سخرية اسخر من نفسي احيانا بقول زي كله ضرب مفيش شتيمة دي كلها لا تضيف مساوئ الى المجتمع ولا ضرر منها انما فيه اشياء تانية هي اللي تضيف يعني لما اسمع شتمة لما اسمع في فيلم او في تمثيلية وكانه نوع من الواقع " يا بن الكلب" لغاية ما اصبحت من مفرداتنا اذا كنت انا شفتها على الشاشة ايه المانع ان انا استخدمها في بيتي او استخدمها مع زميلي في المدرسة اذن دي الاضافات الخطأ الالفاظ الفجة او الحركات او الايماءات او الصوت الفج اللي احيانا يبقى مبالغ فيه لما نطلع واحد في دور معلم لازم يطلع صوته وحش صورة مش منطقية ومش طبيعية قوي مش موجود احنا قاعدين دلوقت احنا الاتنين بنتكلم تاكد ان احنا هناثر في ناس شافونا بنتكلم ازاي بنقاطع بعض ازاي بنحترم بعض ازاي التون بتاع صوتنا شكله ايه يعني انا مثلا لما اقعد اتفرج على مذيعه كأني بتفرج على استاذ بشوفه وهو بيهاجم ضيفه ازاي اعترض على ضيفك كما تشاء ولكن التشويح والمناظر اللي بنشوفها دي احيانا من رجالة او من سيدات مذيعات هي موضة للاشهار قال يعني احنا طبيعيين قوي ما هو الطبيعة مش مفروض تكون كده المفروض الطبيعة تكون مهذبة ........واقولك "انت" كلمة حضرتك اختفت . .انت قلت من شوية مش عارف ايه ..هو في محكمة جايباه تستجوبيه وتهزئيه وتقوليله "انت "دا راجل طول النهار الناس بتقوله حضرتك دا لفظ احترام للجميع ايه بقى انت اللي بقت موضة في البرامج بتاعتنا النقطة التانية لما يبقى في ضيوف كتير في برنامج احنا بنعلم الناس - متأسف في الكلمة – سفالة الحوار مش ادب الحوار لان بنتكلم في وقت واحد كلنا بنتكلم
محمد صلاح: ماهو المذيع بيحاول يسيطر بقدر الامكان ؟
د/هاني السبكي: لا اسمحلي دا المذيع بيهيجها اكتر عشان البرنامج يعلى ويصحى يقولك عشان البرنامج كان سخن والمشاهد الغلبان اللي قاعد في البيت مش سامع حاجة خالص شاف خناقة يقولك البرنامج كان سخن فدي بقت طبيعته في حياته شوف الناس بتتكلم مع بعض ازاي الصخب والمقاطعات واعلى وانا اعلى واللي صاحب الصوت العالي مش صاحب الفكرة مش صاحب الكلام مش صاحب المبدا
محمد صلاح: الاطفال وفقا لبعض الدراسات الفئة الاكتر حضورا قدام التليفزيون لفترة طويلة اللي انت قلته دا بيوحي ان اطفالنا اتعرضت لفن مكانش المفروض تتعرض له ؟
د/هاني السبكي: اذا سميته فن مبدئيا هما تعرضوا للتلوث السمعي زي التلوث الغذائي كده .. حاسة السمع كلما كانت مرهفة وتلتقط الاصوات وموسيقيا الاصوات ممكن تعمل منها تباديل وتوافيق عشان تطلع انغام تأثيرها على المخ البشري بيهدئ من الموجات الكهربية اللي موجودة في مخنا دا كلام علمي بحت وبيهدي من نسبة الادرينالين اللي بتعلى اللي هي بتخليك مشدود ومتنرفز لما تسمع موسيقى راقية وهادئة فيها منطق الموسيقى زي الكلام لها منطق انما اقعد اتكلم مع حضرتك كلام ليس له أي منطق وغير مرتب عشوائي مش متناسق ولكنه الحقيقة كلام هعمل نفس الفكرة في النغمات حهط نغمات غير مربوطة ببعضها ولكن بعتمد فيها على صخب الآلات الحديثة لكن ألوث سمعك واخلي مستوى سمعك لا يفطن الى الاصوات الهادئة يعني لو مشيت جنبك شوية مية كده او نافورة مش هتسمعها
محمد صلاح: هو في الموسيقى والطرب يادكتورفي دا وفي دا كان في ارخي الستارة اللي في ريحنا وكان فيه الاطلال وكان فيه الجندول .
د/هاني السبكي: مكانوش مع بعض ..فترة ارخي الستارة اللي في ريحنا واعملك حجاب على ورق الخيار يجننك بالليل ويسهرك بالنهار كان مستوى رث جدا كان بيقول الكلام دا مجموعة من الحشاشين قاعدين يقولوا قافية فتطلع اغنية كانت فترة رثة جدا للأسف الشديد ثم حصل وقفة وحصل ترقي وابتدى عبد الوهاب يغني لعلي محمود طه وام كلثوم تغني لاحمد شوقي المسالة ابتدت ترتقي ارتقينا بمستوى المجتمع والمستوى السمعي جه فترة من الفترات في الستينات والسبعينات بالذات كان اعلى مستوى من الفن في الاصوات والموسيقى والكلام كان موجود وكان موجود فيه الكلام الكوميدي او الهزلي او النقدي في مونولوجات اسماعيل ياسين او محمود شكوكو وان كان محمو د شكوكو الله يرحمه اخطأ شوية عندما غنى بشكل هزلي كلمات من الاطلال ..المجتمع ارتقى الى درجة انه الرجل الشعبي الذي لا يعرف ان يقرا او يكتب كان بيقول هل راي الحب سكارى كان بيغني اراك عصي الدمع بتاعة ابي فراس الحمداني غناها ازاي دا ..دا راجل ما بيعرفش يقرا انا ارتقيت بسمعه وارتقيت بلسانه واصبح يتذوق هذا المستوى ويرفض ما بعده ثم ظهر ما بعده على حساب الفن لاي اسباب ودخل في هذا المحال ناس سمت نفسها شعراء وسمت نفسها ملحنين واصبح اللحن دلوقت او الكلمات بتتعمل في قعدة 5 دقايق اللحن بيتعمل فيه مطربين لما تقولي عمل كام هتفتكر اخر واحدة مش هتفتكر ال799 دا لم يرسخ في ذهنك الا التلوث
محمد صلاح: يعني في موضوع الكلمات انت بتفرق ما بين كلمات فاسدة تعلم الناس الفساد وما بين ركيكة ممكن نسمعها شوية وتعدي يعني ؟
د/هاني السبكي: فيه فرق طبعا الركيكة ممكن تسمعها شوية وتعدي لكن دا غير مطلوب لان برضه مش هرتقي بمجتمعي الى مجتمع ارقى يعني حضرتك رحت اكيد مسرح في بلاد من بلاد اوروبا وحضرت مسرح بتشوف اطفال قاعدين ماسكين النوتة الموسيقية بتاعة الاوركسترا وقاعد يقرا النوتة الموسيقية والاوركسترا بيعزف طبعا هقولك ان الفن هناك فيه مستويات رثة وفيه كل شئ موجود ولكن نسبته محدودة في مجتمعات هذا التدني في مجتمع كامل انا بتدنى بمستوى المجتمع كله بنزله معايا عشان انما اظهر بدل ما ارتقي بيه انا انزله في اللحن والكلمة والصوت الاجهزة الجديدة كمان خلت اللي مالوش صوت بيغني يعني انت لو سمعت مطرب من المطربين دول لو سمعته بيغني في قعدة زي كده مش ممكن هتسمع صوته هتلاقي صوته وحش جدا ونغماته غلط وبينشز لما بيخش الاستوديو كل حاجة بتتصلح حتى نفسه بيطول في الاغنية المسالة بقت صناعية جدا مش حقيقية
محمد صلاح: انت ضد التلحين بالكمبيوتر ؟
د/هاني السبكي: لا .. لكن المسالة تبقى على اصول ما سيبش المسالة
محمد صلاح: طب خليك منعانا لسه الكلام مخلصش
فاصل
محمد صلاح: الاعتراض على التلحين بالكمبيوتر دكتور هاني السبكي شايف انه مش مفروض اني اسيب الكمبيوتر هو اللي يقودني انا اللي اقوده طب عندنا رايي للموسيقي محمد رحيم تيجي نشوفه
د/هاني السبكي: نشوفه
محمد صلاح: نشوف الموسيقار محمد رحيّم
فاصل
محمد رحيم- ملحن: انا طبعا من الناس اللي بحب دا جدا ومن المنتمين له.. انا دارس مزيكا وجيتار وبالعب بيانو وعود وكل الحاجات دي وكنت دايما الحمد لله حتى من قبل الدراسة وقبل الكلية بجيب الات موسيقية وبلعب الات الحمد لله بس انا كنت في جيلي من الملحنين اللي جريت بسرعة جدا جدا ناحية التكنولوجيا الحقيقة اول ما احترفت فعلا وبقيت اشتغل مع اسماء كبيرة زي محمد فؤاد ومحمد الحلو ونوال الزغبي وسميرة لقيت نفسي الموضوع دا هيسعفني قوي بالاضافة الى حاجة حلوة قوي احب اضيفها انه العود كآلة طعمه شرقي جدا وكلنا بنحبه وكل حاجة بس هو في الاخر بيلعب الجملة الميلودي يعني ايه الجملة الميلودي ..؟ يعني هيبوظ اللحن يعني مش هيعمل خط تاني اسمه هارموني جنب اللحن فسواء احنا بنتكلم في موسيقى شرقي او موسيقى غربي لازم يحصل تداخلات هارمونية لازم يحصل خطوط ففي كل الحالات انا مع التطور طبعا ومع الآلات الجديدة ومع التكنولوجيا و النقطة المهمة جدا جدا برضه تأثير الموسيقى على وجدان وعلى الحالة النفسية للمستمع او الشخص اللي بيسمع طبعا تاثير رهيب جدا يعني انا اساسا عندي كتب بتتكلم عن العلاج بالموسيقى وانا جربت دا على نفسي انا شخصيا وجربت دا على بعض اصدقاء لي من الشعراء والمطربين وعلى بناتي الصغيرين وعلى الناس اللي حواليا بياثر تأثير ايجابي جدا جدا ..فاكرين كلنا زمان كنا بنتابع برنامج عالم البحار مثلا غير برنامج العلم والايمان انا بتكلم على الحاجات اللي انا واثق ان كل الناس شافتها مش بتكلم على انا بسمع ايه لا احنا كلنا سمعنا ايه واتربينا على ايه ووداننا خدت على ايه .. برنامج العلم والايمان فاكرين طبعا الناي بتاع الفنان الله يرحمه محمود عفت كنا بنخش في حالة خوف مع حالة حب حاسس ان فيه موضوع كبير بيحصل وحاسس ان فيه حاجة مهمة جدا بتحصل وكان ناي بس .. يوم الجمعة بقى فاكرين طبعا الشيخ الشعراوي فجاة تلاقي المزيكا تخلي السبحة في ايدك وفجاة جاي من الصلا بتاعة يوم الجمعة انت وباباك او انت واخوك او انت وصحابك وفجأة المود الديني سيطر عليك جدا جدا ..الحاجات الرومانسية مش هنتكلم فيها فاكرين " همسات "بتاعة زمان كانت بتبقى كانت بصوت احمد سمير وحاجات بصوت عادل هاشم كانت جميلة جدا جدا برضه فمفيش شك ان الموسيقى من اهم الفنون اللي بتأثر في وجدان ومشاعر الناس انا كمان في شغلي بحاول دايما اني اوظفها دراميا حتى لو بعمل اغنية او بعمل اوبريت كبير زي اكتوبر او بعمل مسلسل درامي بحاول اعبر عن اللي انا عايز اقوله وسبحان الله الناس حتى لو مش فاهمة المصطلحات دي موسيقيا سماعي بس بتحس بيها لان المسالة في النهاية مسالة قلب طالما قلبك حس الناس هتحبها فطبعا فيه علاقة كبيرة جدا جدا ما بين المزيكا وتاثيرها على النفس البشرية
فاصل
محمد صلاح: الملحن والموزع الموسيقى محمد رحيّم شايف ان التكنولوجيا مهمة الدكتور هاني السبكي بيعزف عود كويس وليه مع بعض الشخصيات العامة تخت لكن بيعزفوا كله قديم ..عندك تعليق ؟
د/هاني السبكي: لا انا متفق معاه انا ما برفضش التكنولوجي اطلاقا يعني بيضيف لاحظ حاجة هو استشهد بكل القديم ما استشهدش بحاجة جديدة خالص لان القديم كان اللحنين اللي هو عملهم هو عمل حالة الاقدار والكمبيوتر اداله التوزيع كانوا قبل ما يطلع الكمبيوتر كان الملحن هو اللي بيعمل الاتنين فالاتنين طالعين من قلبه انا اللي عامل اللحن وانا اللي عامل الهارموني والهارموني بيبقى لحن اضافي او لحنين وممكن يبقوا 3 محمد القصبجي لما عمل انا قلبي دليلي 3 الحان في بعض ، ال3 الحان دول هو اللي عملهم ما استعانش بكمبيوتر ، استعين بالكمبيوتر دا شئ صح ولكن دلوقت اصبح يستخدم كنوع من الاستسهال اعمل اللحن وهو يكمل ...
محمد صلاح: دا له تاثير على المجتمع برضه ؟
د/هاني السبكي: ماهو انا عايز اسمع فن حقيقي تحس كده ان حاجة داخلة القلب ماهو عشان تبقى داخلة القلب تبقى طالعة من قلبك انت كمان مش نصها طالع من قلبك وصها طالع من مكنة
محمد صلاح: الفيديو كليب من زمان زمان في بدايات التليفزيون كان فيه اغاني قصيرة ولها مشاهد او ان المطرب بيطلع في مكان او خلفيات وصور مناظر طبيعية
د/هاني السبكي: ام كلثوم لها اغاني صورت
محمد صلاح: بالظبط.. التطوراللي حصل في الفيديو كليب دا كان تاثيره ايه على المجتمع ؟
د/هاني السبكي: لا الناس بتتفرج على حاجات ظريفة كده انما مالهاش دعوة بالموسيقى ..دلوقت احنا بنداري عيوب اللحن وبنداري عيوب المطرب وبنداري حاجات كتيرة جدا في ان احنا بنطلع المطرب اللي شكله حلو او المطربة الجميلة اللي فيها اثارة ونحط نقلات وحاجات زي كده اللي احنا بنشوفها دي فتبهرني وتخليني مش قاعد اسمع حواسي مشغولة بأمور تانية مش وحشة بس ما تكونش بالزيادة دي افقدتني التذوق فين اللحن جرد الاغنية اللي فيها الكليب دا من كل اللي فيها واسمعها هتلاقي نزلت مستواها قوي عندك
محمد صلاح: اقولك على ملحوظة يادكتور.. كان في بدايات الفيديو كليب كانت الاغنية اللي تنجح في السمع او في الكاسيت او في الاذاعة كانت بتتعمل فيديو كليب دلوقت ؟
د/هاني السبكي: انت عارف ان فيه طريقة جديدة دلوقت في التلحين كان تلحين الكلام زمان الشاعر بيقول الكلام وبعدين الملحن يتذوقه ويعبر عن الكلام بالموسيقى دلوقت بيحصل العكس انه عجبتني جملة موسيقية في ذهني كده بدندن احطها واجيب المؤلف اقوله حط لي عليها الكلام ما ينفعش احط الكلام يتوافق مع الموسيقى دا مش تعبير دا انا بالزق فبيطلع لحن على مزيكا حاجة كده دوشة وخلاص لازم نعترف ان فيه الحان حلوة والاستاذ رحيم بيتكلم كلام حلو الحقيقة واضح انه دارس وفاهم انما انا بتكلم على نماذج اخرى اهه أي حاجة في أي حاجة ونلزقها ونعبيها في كليب وشريط والناس تشتري وتتلوث وخلاص انت دلوقت لما بتركب تاكسي او تركب السوبر جيت وتسافر اسكندرية والراجل يروح حاطط لك شرايط ما انزل الله بها من سلطان يصدعك ناس قاعدة ترغي وناس قاعدة تهزر وساعات كمان يحط فيلم دوشة كده وخلاص ..لو عايز تحكم هتشوف الناس سكتت امتى يبقى اللي بسمعه تغلب على دوشتنا وخلانا ننصت اليه زي ما نكون قاعدين نتفرج على التليفزيون كده وبعدين اقولك استنى استنى لما اشوف الراجل دا بيقول ايه ..لفت نظري كلام مهم كلام مفيد ..لازم نفرق ما بين الناس اللي بتشتغل جد والناس اللي بس عايزة تكسب وخلاص
محمد صلاح: طب ليه الشئ هو اللي بيسود وليه الناس بتتقبله؟
د/هاني السبكي: هو بيلفت نظرهم اسرع احنا لو ماشيين في الشارع انا وانت و شايفين ناس بتتكلم عادي مش هنلتفت اليهم انما لما بنشوف خناقة بنقف نتفرج ..اذا الشئ الرث هو اللي بيلفت النظر زي القميص الابيض هتشوفعه ابيض مكنش هيلفت نظرك قوي لما يبقى فيه بقعة حبر صغيرة هتبص على البقعة
محمد صلاح: انا معاك يا دكتور بس لما اعجب هاعجب بالقميص الابيض مش بالقميص الملطخ يعني .
د/هاني السبكي: لما مالاقيش غير القميص الملطخ هاضطر البسه مفيش غيره ونسيت القميص الابيض وزي ما نسينا السمنة البلدي زي ما نسينا الشعر وطلع بعديه الشعر الحديث ..كان زمان الشعر الحديث على فكرة يسموه زجل الغير منتظم والغير عمودي ، تدنينا الى درجة اللي احنا بنسمعه في الاغاني كلام يضحك شوية
محمد صلاح: في علاقة بين الفيديو كليب وبين الاعلانات مش بقوا شبه بعض شوية ؟
د/هاني السبكي: الاعلان دا فرصتي لان الاطفال بيلفت نظرهم جدا انما ما يصحش ان انا اضيف الى هذا الطفل نوع من التشتت والحيرة اللي هو مش شايفها شئ غير واقعي تماما لما اوريله اراضي خضرا غناء وهو قاعد ياعيني في الدوشة والحر والزحمة والعشوائيات اللي احنا عايشين فيه دا واصورله دايما الجمال والجنينة الجميلة والطفل ابو عنين زرقا..الطفل دا من عندنا الطفل ابو عنين زرقا وشعر اشقر وجميل جدا وام مبتسمة وشيك جدا والراجل قاعد ياكل سعيد جدا ..دا فين دا تبعنا .. ماهو انا مضحكش على الناس لدرجة دي انما اللي بيحصل ان الناس فيها سذاجة وفيها طيبة بتزداد حسرة على نفسها ممكن اصور له منظر طبيعي وفرصة ان انا اضيف له حتة ما اطلعش طفل بيقول كلمة بايخة عشان يبقى فيها افيه وتلزق في ودن الصغير ويبتدي يقولها يقول ماهوالاعلان بيقول او حركة سخيفة يبقى انا ممكن اربي قوي من خلال الاعلانات اربي قوي من خلال الافلام والدراما بشكل عام اربي من خلال اللقاءات الثقافية او المنتديات اللي بنعملها مفيش داعي ان احنا مجاراة لجهل او مجاراة لعدم علم او لعدم ثقافة واقول حرية وطريقة جديدة والبس الغريب واسيب دقني مش محلوقة واطلع شكلي منعكش فيه ناس شكلها مش مستحمي .. يا اخي انت مظهر ، علم ابني انه يبقى شكله مغسول وشعره متسرح وشكله نضيف لكل مقام مقال البس الحاجات دي وانت في النادي ما تكونش راجل مذيع وقاعد لابس تيشرت غريبة جدا وتاني رجلك تحت ويتنطط يعني مش للدرجة دي عشان ما نجيش في الاخر نقول هو ايه اللي حصل للبلد هو ايه اللي حصل للمصريين
محمد صلاح: يعني دا ساهم في اللي حصل؟
د/هاني السبكي: دا ساهم بشدة هو الناس ما بقتش تحترم بعض ليه ما انا اتعلمتها من التليفزيون او من السينما هي الناس بقت تتخانق مع بعض ليه هي ما بتتخانقش دا بيكلمه ماهو دا التون اللي سمعه وبقى يتكلم بيه ما دخلش وقال من فضلك او دخل وقف في دوره لو حطيت الحاجات التربويات دي لمحة في كل فيلم وفي كل اعلان هطلع مجتمع راقي جدا عشان يبقى وجدانه حساس يشوف الجمال يشوف عمارة حلوة يبتدي ما يدهنش بلكونته احمر والعمارة كلها بيضة وهو شايف انها اجمل بلكونة في العالم
محمد صلاح: الدكتورهاني السبكي بيقول ان اللي حصل في البلد مش بس ازمة اقتصادية ولا مشاكل ثقافية دا الفن كمان ساهم في اللي حصل الناس بتتفرج على تليفزيون او بتتفرج على برامج وبتسمع اغاني في الفيديو كليب او حتى في السيديهات وتطبق دا في سلوكها في الحياة دا الفن طلع حاجة صعبة قوي قال استاذ الطب النفسي الدكتور هاني السبكي كلامه النهاردة كان كلام جميل كلام معقول اكيد كان كلام .... مسئول .. خلص الكلام ...... سلام نلتقي في الحلقة المقبل