هاني بدر الدين تنشر الأهرام العربي، نص كلمة المشير عبد الفتاح السيسي، نائب رئيس مجلس الوزراء، القائد العام للقوات المسلحة، وزير الدفاع والانتاج الحربي، في المؤتمر الثاني لشباب الأطباء وحديثي التخرج، الذي نظمته القوات المسلحة صباح اليوم الخميس، وبدت علامات التأثر الشديد والذي وصل إلى حد الانفعال على المشير السيسي وهو يتحدث عن ظروف مصر الاقتصادية التي وصفها بأنها صعبة جدا جدا. وقال السيسي في كلمته مخاطبا الأطباء "ظروفنا الاقتصادية بكل إخلاص وفهم، هي صعبة جدا جدا، وأنا لما كنت بقعد مع زملائي الظباط كنت بشكل حالة الفهم دي وأقول لتهم خلوا بالكوا، دلوقتي منقدرش نقول أنا عايز، دلوقتي لازم تسأل تقول بكام ومنين.. عشان تبقى الأمور واضحة، فإنت حضرتَك أو حضرتِك، لازم تكون الأمور واضحة قدامك، ولازم تقول بكام ومنين، مصر تقوم بكام ومنين". وأضاف السيسي "بلد فيها 90 مليون بيتصرف عليها بس 165 مليار جنيه، ده اللي بيتبقى من الموازنة بعد ما ننزل منها العجز بتاع الموازنة، وخدمة الدين اللي هيه الفائدة، ثم كمان فاتورة الدعم، يتبقى 165 مليار جنيه، مطلوب ال 165 مليار جنيه دول يتوزعوا على كل القطاعات، التعليم والصحة والاسكان والمواصلات وفرص العمل، عشان يبقى فيه أمل للشاب اللي متخرج أو اللي كبر وعايز يبقى له بيت وعيادة، اللي بيتصرف كله 165 مليار، أنا عايز أقول لكوا إن اللي مفروض يتصرف مش لدولة غنية ومتقدمة زي انجلترا وفرنسا، لا لدولة زي مصر مفروض لا يقل عن 3 آلاف مليار جنيه". ومضى السيسي يقول "خلي بالكوا.. إحنا لازم نكون أمناء في عرض الكلام، ونتكلم بجد مش نضحك على بعضنا ونقول ده ممكن وده ممكن.. وأضاف السيسي منفعلا "لأ مش ممكن".. إلا لو إنت فكرت إنك قبل ما تاخد الفطار بتاعك الصبح تقول يا ترى أنا إديت لبلدي إيه؟ حفطر دلوقتي قبل ما أحط اللقمة دي في بقى.. أنا إديت للبلد دي إيه؟ إديت البلد ولا مديتش النهارده؟ لا مديتش.. مش حقول لك متفطرش.. لكن مش كلام حب الوطن مش كلام". واستطرد السيسي قائلا مخاطبا شباب الأطباء "ده أنا بكلم نفسي معاكوا.. مقصدش إني أوجه لكم كلام معين والله.. أنا بكلم نفسي معاكوا.. فيه مشكلة كبيرة جدا في بلدنا متواجهتش على مدى أكتر من 40 سنة.. احنا بنتكلم في 90 مليون دلوقتي.. كانوا من 30 سنة حاجة وأربعين مليون، طيب وبعدين؟؟ يلاقوا المستشفى مش كويسة طيب ليه؟ يلاقوا المدرسة مش كويسة طيب ليه؟ يلاقوا إن مفيش فرصة عمل طيب ليه؟ ليه لإن مفيش.. مفيييييييييش". ووجه السيسي دعوة للمصريين للمساعدة في حل الأزمة الاقتصادية في مصر قائلا "فيه 9 مليون مصري بيشتغلوا بره ولا أكتر؟.. مش كلهم اتعلموا في مصر؟.. مقصدش بالكلمة دي حاجة.. واتعلموا في مدارس مصر وجامعات مصر، وعاشوا على أرض مصر.. يا ترى حد فكر وقال حديها شهر من عندي عشان الغلابة تعيش؟ يا ترى حد قال أنا حمشي على رجلي شوية عشان أوفر حاجة لبلدي، يا ترى قال حروح الجامعة كل يوم على رجلي عشان أوفر حاجة لبلدي؟". وقال السيسي متاباعا "اوعوا تزعلوا مني.. أنا شايف مصر زي ما شايفكم وشايف مشاكلها زي ما أنا شايفكم، وأقصد بكده إن البلاد مبتتقدمش بالكلام.. البلاد بتتقدم بالعمل والمثابرة والتجرد والإيثار، ممكن جيل ولا جيلين يتظلموا عشان بقية الأجيال تعيش أو يلاقوا حاجة.. لازم تعرف العَرَض أو تعرف المرض عشان تعرف تعالجه.. لو معرفتش أو عرفت غلط حتشخص وتعالج علاج غلط.. وبعدين تقول ليه مفيش نتيجة؟". وقال السيسي "في عمر الدول، وأنا برجع بس بقول لكم كده، في عمر الدول الموضوع لما بيتحل مبيتحلش في يوم وليلة، الموضوع على ما ياخد جوانب الدولة المصرية كلها ياخد سنين.. سواء كان بالنجاح أو الفشل.. يعني مفيش حد بيفشل في يوم وليلة.. وبرضو مفيش حد بينجح في يوم وليلة.. ده حضرتك عشان تاخد الثانوية العامة ب 95 % اوعى تفتكر إن الجهد ابتدى مع حضرتك في مرحلة الثانوي.. لأ.. ده الجهد بدأ وإنت في ابتدائي، الوالد والأسرة بدأت تكرس إرادتك وفكرك إنك إنت تذاكر مدة زمنية كافية تخليك في مصاف المتفوقين". وأضاف السيسي "معلهش أنا آسف إني كلمتكم كده.. وانتم الأمل يعني .. عايز بقى أقول لكم هنا إن إحنا محتاجين هنا البرنامج.. برنامج اللي المؤتمر ده شغال عشانه.. إذا كنتوا عايزين نقدم خدمة طبية حقيقية ونبقى عندنا خريطة طبية للأمراض في مصر، وعندنا بحث علمي محترم لإن احنا معندناش اختيار إن احنا نبقى كل حاجة ممكن نجيبها من الخارج.. قدراتنا الاقتصادية لا تتحمل ده". وتطرق السيسي إلى التأمين الطبي ومشكلاته قائلا "أنا عايز أقول لكم إن التأمين الطبي.. طيب أنا حد يقول لي كده لو حضرتك عايز تعمل بالمعايير العالمية تأمين طبي ل 90 مليون تفتكر يتحط رقم متوسط كام..كام في السنة يا فندم؟ لو قلت ألف جنيه ده ب 90 مليار جنيه في السنة.. ولو قلت 10 آلاف جنيه ده ب 900 مليار جنيه، يبقى إنت حتخش المستشفي حتجد فيها إيه؟ حتجد فيها حاجة؟؟ ردوا عليّ يا أولادي.. حتجدوا فيها حاجة؟ لا مش حتجدوا فيها حاجة..يقوم الناس تيجي في الاعلام وتقول فين الخدمة الطبية؟ خدمة طبية إزاي ومنين؟". واختتم السيسي كلمته بالحديث عن هدف المؤتمر قائلا " نرجع تاني للمؤتمر اللي احنا عاملينه ده والهدف منه إن إحنا.. وأنا قلت الكلام ده في مؤتمر السنة اللي فاتت.. قلت إننا محتاجين نتعاون أكتر ونعمل برنامج متتطور جدا جدا، بيننا وبين شباب مصر، بالمستوى ده.. وأنا بقول لكم بكل حب وتقدير مستعدين نعمل أي حاجة لكم تكون إضافة أو مساهمة في تطوير الامكانات والقدرات لحضراتكم .. من فضلك توقف كثيرا أمام ظروف مصر.. كل سنة وإنتوا طيبين وربنا يوفقكم".
