يوميات مدير هى حلقات نشرت فى «صباح الخير» من منتصف عام 2008 وتوقفت بعد ثورة 25 يناير 2011.. بدأت اليوميات بهدف توضيح تأثير سياسات الحكومة - وقتها - على أفراد الطبقة المتوسطة التى تمثلها أسرة المدير. كانت هذه السياسات تنحاز للأغنياء وتتجاهل باقى أفراد الشعب.. توقفت اليوميات لأن الثورة قامت لتحقيق العيش والحرية والعدالة الاجتماعية.. فكان أن توقع الجميع تغيير هذه السياسات القديمة، وبالتالى لم يعد هناك مبرر لاستمرار اليوميات.. الآن.. أعتقد أن عودة أسرة المدير أصبحت مطلوبة لأنه ببساطة.. ليس هناك أى تغيير..
- إيه ده.. مش قلت مش حاجيب الرغيف المدعم تانى!! ∎ آه.. ليه بتقولى كده؟ - أومال جايب ده كله ليه!! ∎ وهو ده مدعم!! ده الرغيف بربع جنيه. - نعم!! ده!! ده بربع جنيه!! ∎ أيوة ما تبصى كويس. - يا خبر!! ده صغير قوى
ماهو الوزير هو السبب. ∎ السبب إزاى؟! - من كام يوم سيادة الوزير قال إن الرغيف المدعم بيكلف الدولة أربعة وتلاتين قرش، وهما بيبعوه بخمسة. ∎ إيه!! أربعة وتلاتين قرش.. يا سلام!! - من ساعتها الرغيف أبوربع جنيه والرغيف أبوخمسين قرش صغروا كده زى ما انتى شايفة. ∎ طبعا.. عندهم حق يعملوا كده وأكتر..
- لأ، وكمان البواب بيقول إن الأكشاك اللى بتبيع الرغيف أبوشلن قالوا كل واحد تلات أرغفة بس. ∎ إزاى الكلام ده.. ده الرئيس شخصيا قال إن حكاية التلات أرغفة دى مش صح. - يقول زى ما هو عاوز، بس أنا بودنى سامع الوزير وهو بيأكد إنهم هيبتدوا فى بعض المحافظات يعملوا كده ∎ يبقى أكيد الريس ما سمعوش. - أو الوزير اللى ما سمعش الريس. ∎ طب إنت بتقول إن الحكاية دى فى بعض المحافظات، هو قال إن القاهرة منها. ∎ لأ.. قال القليوبية، بس طبعا الأفران والأكشاك مسكت فى الموضوع ده، والطوابير بقت لا تحتمل. - طب إسمع بقى، احنا نروح عند طوابير العيش دى ونعمل مظاهرات، فالناس تنضم لنا ونفضح الوزارة الهم دى. ∎ ولا هيهمهم، إذا كان أهالى عزبة الهجانة قطعوا الطريق عشان مش لاقيين العيش، ولا حد أهتم. - وتلاقيهم كمان قالوا اللى قطعوا الطريق دول بلطجية وبيعطلوا مصالح الناس. ∎ آه.. بس مش عارف ضربوا عليهم قنابل غاز ولا لأ.
- إلا صحيح.. هى الفلوس اللى بيجيبوا بيها قنابل الغاز دى تعمل كام رغيف من أبوشلن. ∎ كتير، ده أنا سمعت إن قنبلة الغاز الواحدة تمنها أربعين دولار. - يا خبر!! أنا مش قادرة أصدق إن الحكومة مش عارفة تحل موضوع العيش ده. ∎ يا سلام!! وهى حلت إيه يعنى عشان تحل أزمة العيش. - أصل يعنى أنا شايفة الموضوع بسيط قوى. ∎ يا شيخة.. بسيط إزاى إن شاء الله؟ - مش الوزير قال إن الرغيف أبوشلن ده، اللى محدش بيعرف يبص له، والغلابة يعينى مضطرين ياكلوه، بيكلفه أربعة وتلاتين قرش. ∎ أيوة قال، إنتى ليه مش مصدقانى!! - مصدقاك يا أخى، وعشان كده بأقول هو يروح يشترى أبوربع جنيه ويبيعه لنا بالخمسة صاغ. وبكده مش بس يحل الأزمة.. لأ.. ده كمان يوفر للدولة تسعة صاغ فى كل رغيف. ∎ ده على أساس إنك مصدقه كلامه، وإن الرغيف بيكلف أربعة وتلاتين قرش. - آه مصدقة. ∎ إزاى تقولى كده!!
- شوف يا سيدى، الدعم بتاع العيش اتنين وعشرين مليار جنيه. ∎ إيه ده.. عرفتى المعلومة دى منين، إنتى بتقرى من ورايا!! - إسمع بس، ده تقرير كان منشور فى الجرايد. ∎ طيب.. كملى. - بيقولك إن أصحاب المخابز بيهربوا الدقيق المدعم للسوق السودا، وده بقى بياخد من الدعم حوالى ستة مليار جنيه، يعنى أكتر من ربع الميزانية. ∎ عادى. - عادى يعنى إيه!! ∎ حاجة بتحصل من زمان. - ما هو عشان كده.. إزاى يبقوا عارفين ويسكتوا!! ∎ وحيعملوا إيه؟! - يفكروا شوية. ∎ مين دول.. إنتى حتشتمى!! - يا أخى باتكلم جد. ∎ وأنا كمان.. طب خدى دى. - استر يارب. ∎ بيقولك إن مخزون القمح يكفى لغاية آخر مايو بس. - سمعت.
∎ طب سمعت إن الفلاحين لغاية دلوقتى مش عارفين يزرعوا القمح. - إيه!! ليه؟! ∎ شوفى يا ستى، الفلاحين بياخدوا السماد من بنك الائتمان الزراعى، اللى حصل بقى إن تلاتين فى المية بس هما اللى خدوا حصتهم لغاية دلوقتى. - ليه!! ∎ مش ده المهم.. المهم إيه بقى.. الفلاحين طلعوا فى برنامج وقالوا إن دى بس الكمية اللى وصلت قام البنك صرفهم لأعيان البلد، وساب الغلابة. - كمان!! طب وحيعملوا إيه؟! ∎ شكارة السماد المفروض إنها تتباع فى البنك بخمسة وسبعين جنيه، الكمية اللى جت خدها الأعيان، ودلوقتى الشكارة موجوة فى السوق السودا تمنها ميتين جنيه، يبقى إيه؟!
- حرامية، ياربى احنا مش حنخلص منهم. ∎ الفلاح اللى كان فى التليفزيون قال إن الأعيان قربوا يحصدوا وهم لسه مستنين الفرج. - طب ما هو اللى بتقوله ده هو سبب نقص القمح فى البلد. ∎ طبعا. - ويعنى هما مش عارفين. ∎ إذا كنتى إنتى عارفة، يبقى هما مش عارفين، إزاى!! - إيه ده، قصدك إيه؟! ∎ ولا حاجة.
- لأ.. قصدك إن أنا مش بافهم!! ∎ يا شيخة باهزر معاكى. - حافوتها عشان الموضوع مهم. ∎ أنهو موضوع. - يعنى الرغيف اللى أنت جايبه ده بربع جنيه. ∎ أيوه. - وصغير قوى. ∎ بالضبط. - يعنى الواحد مننا عاوز له رغيفين فى الطقة، واحنا أربعة، يبقى.... ∎ إيه.. إيه.. ليه هو احنا وحوش.
- أنا باتكلم جد. ∎ وأنا كمان، أنا فى البيت بأمثل، «الوزير» وبأقول كل واحد تلات أرغفة بس فى اليوم. - وده كلام برضه.. إنت الرئيس، والرئيس قال مفيش حاجة اسمها الواحد تلات أرغفة. ∎ أنا سايب لك إنتى موضوع الرئيس ده.. اتصرفى. - ماشى.. إذا إنت عاوز كل واحد رغيف فى الطقة يبقى تزود فى الرز والمكرونة والخضار والفول والجبنة. ∎ يا حلاوتك!!
- هو كده ∎ طب مادام وصلنا لكده بقى، وأنا الوزير وإنتى الرئيس، أنا بأقولك إن أزمة الخبز انتهت بجد!! ∎ آه، الوزير اجتمع مع أصحاب المخابز واتفقوا. - على إيه. ∎ اتفقوا على «تفعيل منظومة إنتاج الرغيف لتحرير سعر الرغيف وتحقيق المصلحة للمواطنين وطى صفحة المنظومة القديمة نهائيا». - .......... ∎ مالك.. عاملة كده ليه..
- لأ، ولا حاجة، أنا بس ما سمعتش كويس، أوعى تكون فاكرنى مش فاهمة!! ∎ آآآه.. بحسب. - قول تانى كده.. أنا على قد سمعى فهمت إن حيزودوا السعر!! ∎ مش عارف.. بس المتحدث الرسمى لوزارة التموين قال إنهم حيعيدوا النظر فى تكلفة الإنتاج كل ثلاثة شهور. - بصراحة.. أنا مش فاهمة حاجة.. هو إيه اللى بيحصل. ∎ أتارى يا ستى أصحاب المخابز كانوا ناويين يعملوا عصيان مدنى ويبطلوا يخبزوا. - ليه؟!
∎ عشان عليهم غرامات ومخالفات وكمان ليهم مستحقات. - غرامات ومخالفات.. يعنى عملوا حاجة غلط. ∎ يمكن. - ومستحقات!! يبقى عندهم حق. ∎ جايز. - المهم.. حصل إيه؟! ∎ ولا حاجة، خافوا منهم وعملوا معاهم لقاء وقالوا حيصرفوا لهم المستحقات، ويعيدوا النظر فى الغرامات والمخالفات.
- والرغيف بقى.. أخباره إيه؟! ∎ حيبان. - والله برافوا عليهم.. بقى يعنى احنا مش عارفين نعمل زيهم. ∎ نعمل إيه؟! - نقول مش حنشتغل إلا لما ناخد حقنا.
∎ اللى هو إيه؟! - حقنا. ∎ أيوة يعنى.. إيه بالضبط؟! - إننا نعيش. ∎ ما انتى عايشة أهو.
