سيف أمين عبد الحافظ تاجر الأسعار فى مصر مرتبطة بوزير المالية ووزير التجارة، ولو هما عاوزين يخفضوا الأسعار بجد مش على الورق هيخفضوها، وحجة أى تاجر أن السلع معظمها مستوردة من الخارج، وبيتم فرض ضرائب عالية عليها، لذلك المستورد عايز يطلع الضرائب التى فرضتها عليه الحكومة الطاق اتنين. على الجندى معاش جشع وطمع التجار هو السبب، زمان كان فيه حاجة اسمها التسعيرة، وجمعيات استهلاكية فيها كل حاجة بأسعار مناسبة، وكان فيه مباحث التموين لكن النهاردة مافيش أى رقابة ولايحزنون، كل واحد بيبيع بالأسعار اللى هو بيحددها، وقبل كل ده البلد كان فيها خير ضيعوه منهم لله. أحمد السيد عامل نظافة مافيش رقابة على الأسواق ومحدش بيحاسب حد، والنهاردة أى تاجر بيبيع سلعة عمره مابينزل فيها قرش صاغ واحد، حتى لو أخدها ببلاش وبعدين لازم يكون فيه رحمة شوية وبلاش ييجوا على الغلابة. محمد محمود عامل مقهى يا بيه دول مش حاسين بالناس خالص إحنا نلاقيها منين ولا منين يعنى مصاريف مدارس وعلاج ومواصلات. ياباشا إحنا بناكل اللحمة فى المناسبات، ده قرص الطعمية بقى بربع جنيه. مروة شعبان موظفة الأسعار عندنا لاتخضع لأى معايير كل حد بيبيع سلعة بيحدد سعرها على مزاجه وما فيش مصداقية لما المسئولين يقولوا قاطعوا السلع الغالية والتجار الجشعين. الكلام ده يمشى على الناس اللى عندها بدايل، هو الفول والعدس يعنى فيه أنواع علشان يبقى فيه عرض وطلب ولا له بدايل تانية. عفاف محمد ربة منزل أسعار إيه اللى بتتكلم عليها هو حد عارف هى الحاجة أصلا بتغلى ليه، مافيش حل غير إننا نأكل طوب، أو نبطل أكل فلا يمكن بأى حال من الأحوال أن يكفى المرتب الصغير تلك الأسعار، ولا أستطيع معه أن أكفى أولادى من المصاريف الأخرى، مافيش حل غير إننا نشحت.
