أخبار بتجرى وبتطير بتقول شوفوا يا مصريين جربتوا طعم التغيير وللا خلاص هتقولوا آسفين جربتوا من غير تفكير مالكم كده واقفين ساكتين راح فينه ميدان التحرير من سنة كانوا هنا بالملايين بيغنوا ويهتفوا للثورة وأهى ثورة وعدت على خير ......................... سنة كاملة وكام شهر معاكوا تحلموا بالكرسى وبسرير وتقولوا هنأكلكم ملبن وعسلنا بقشطة على فطير جربتوا الثورة على الشهدا وكتبتوا بدمها دساتير .......................... جربتوا البلطجة بأصولها جربتوا إيه وقف الحال جربتوا الفلسفة عالفاضي جربتوا كل اللى اتقال إخوانى وسلفى وليبرالي وأحزاب من أبو نص ريال ....................... حرية عدالة مع العيشه أنابيب تتحط وتتشال بتقولك زغرطى يا بهية العيشة ساعتها عال العال وتعالى معايا امسكى ريشة وغنى لها غنوة وموال واكتبى عاشقينك يابلدنا وفى وسط الصورة ومقال علشانك بيموتوا ولادنا وعلشانك هنشيل أحمال وأ دى سقفة كبيرة للقتلة أهى موتة وهتعدى يا خال ......................... من تانى راجعين قبل الثورة وهنركب حنطور وجْمَال وهنسمع ثومة على عبده وهيرقص ريس متقال ماتشات الكورة كمان راجعة من بيبو لروقة لجمال زمن الألفين عدا وفاتنا راجعين لزمان الأبطال عساكرنا رافعين الراية والشعب يعبوه فى شوال ...................... رجاله والله يابلدنا عملوها وجابوا الخلخال عروستنا وافقت وارتاحنا كانوا حبة تقل على دلال والدخلة خلاص بعد المغرب وعريسها واد ابن حلال جاى بالكرباج جاى عالمركب ابن ابوسليمان حط الشال وشعارنا م الليلة خلاص مش عاوزة فكاكة ولا سؤال قوموا جاوبوا ومن غير تأخير ريسكم مين قولوا ياولاد خير اللهم إجعله خير وأهى ثورة وعدت على خير