أعرب النجم أمير كرارة عن سعادته بمقارنة مشاهدى برومو "البعبع" الفيلم بفيلم إشاعة حب، قائلاً: "كنت متأكد إن فى ناس كتير هتقارن لما يشوفوا البرومو، بسبب مشهدى مع الطفل، ودى حاجة تسعدنى، لأن ده فيلم عظيم طبعاً وفى منطقة تانية فى السينما". وأضاف أمير كرارة للإعلامية فاطمة مصطفى على إذاعة 9090: "مبسوط بفيلم البعبع لأن كتير بيشوفونى مش بعمل غير أكشن، وماليش فى الكوميديا، وأنا فعلاً مش كوميديان، لكن الفيلم واخدنى لمنطقة تانية مبسوط بيها، من خلال خفة الدم اللى موجودة فيه عبر مواقف كتير فى الفيلم". كما كشف كرارة كواليس مشهد ضربه بالقلم من الفنانة القديرة إنعام سالوسة فى فيلم البعبع، والذى خطف الأنظار خلال البرومو، قائلاً: "إنعام سالوسة فنانة كبيرة وقديرة جداً، وبالتأكيد كان لازم ظهورها يبقى مختلف، وفى مفاجآت كتيرة فى العمل، وكل الممثلين هيظهروا بصورة مختلفة تماماً عن اللى جمهور متعود يشوفهم فيه". أيضاً تطرق كرارة أثناء حواره مع الإعلامية فاطمة مصطفى ببرنامج الراديو بيضحك على إذاعة 9090 إلى مسلسل سوق الكانتو، الذى قام ببطولته فى دراما رمضان الماضى، قائلاً: "سافرت الجونة بعد رمضان لاقيت فى فئة من الناس منبهرة بالمسلسل، واما عملته كنت بعتبر إن ده حاجة مهمة فى تاريخى، بشكله الشيك، وصورته الحلوة جداً عن مصر فى الفترة دى". وأضاف: "رمضان ليه ظروفه الخاصة، وبالمناسبة جعفر العمدة كسر الدنيا فى رمضان ومحمد رمضان نجم كبير، وبيعرف هو ومحمد سامى سوا يقدموا حاجة حلوة للناس". برنامج الراديو بيضحك يذاع يوم الخميس فى الساعة السادسة مساء حتى الثامنة، واستضاف مؤخراً خلال حلقاته نجوم مثل ماجد المصرى، أحمد فهيم، وقبلهما خلال شهر رمضان استضافت أحمد العوضى، ياسر جلال، محمد رمضان، أحمد السقا على الترتيب، وهى الحلقات التى شهدت حديثهم حول كواليس أعمالهم بدراما رمضان الماضى.
