أنا شاب مصراوى ودمى كان فاير وقلت أنا ناوى أنزل وأكون ثاير هاقول بعلو الصوت إن شا الله حتى أموت انتهى زمن السكوت من بعد شهر يناير نازل وأملى كبير ووشى للتحرير وحقى فى التعبير وأملى فى التغير نور العدالة انقاد بيبدد الفساد ويبطل التزوير سلمية سلمية لا فوضى ولا تخريب ووحدة وطنية هلال وجنبه صليب لا عدلكم عدلى ولا عزكم عزى هو اللى بيهينى عمره ما يبقى حبيب والأمن اللى ليا حماية ضربنى بعصايه واقوله دا انت معايه مصمم ليا يعادى ضربنى فضربته وقدرت وغلبته والظلمه ع البادى وغابت الشرطة راحت عليها نومة لا قسم ولا نقطة مابقاش فيها حكومة وخرجلى انا حشاش ماسك فى ايده رشاش وف ايدى انا شومة هاحميها هاحميها وان شا الله اموت فيها اموت فدا ارضى اموت فدا عرضى شهادتى هالاقيها وبت ف الشارع وانا اللى اسمى فقير الكل بيدافع كتفى فى كتف وزير الفرق بينا داب خلاص بدون ألقاب الكل لقبه غفير اما جيشنا الهمام فالشعب عنده اساس اعظمله السلام واشيله فوق الراس وقالى عمرى ما اعادى حد فى بلادى علمت انا ولادى يكونوا ليك حراس فى ليلى بحمى دارى فى ميدانى فى نهارى ادفى مع ناسى آكل مع جارى يكفنى احساسى انى من الثوار دا حب مصر حلال مش ذنب عنه اتوب لو يبعتولى جمال لو يرجمونى بالطوب مش هاموت م الخوف من رمية المولوتوف مانا عارف انى هاشوف القسمة والمكتوب دلوقتى ارفع راسى واقول انا مصرى باكتب تاريخ بلدى باكتب تاريخ نصرى وان كان ليا جد بنى الهرم والسد ففوق جبال المجد بنيت انا قصرى