مالك بس مكشر ليه؟! ده أنا بقولك تبسّم مش بقولك هات 10 جنيهات! هتقولى هى ال10 جنيهات بتعمل إيه دلوقتى؟ هأقولك مش موضوعنا. بس تبسّم علشان ربنا يفرجها عليك، هتقولى هو فى حاجة تخلينى (أتبسّم)؟ هأقولك يا راااااجل ده كفاية إنك الحمد لله بصحتك.. عايز إيه أكتر من كده! دى أقل نعمة تخليك مبسوط، نعمة الستر والصحة، طيب بالله عليك فى أحسن من كده؟ يقول إيليا أبو ماضى: ابتسْم، يكفيكَ أنَّك لم تزلْ حياً، ولستَ من الأحبَِّة مُعدما! ليه واخد كل حاجة على أعصابك؟ ليه زعلان وشايل الهم؟ بقى فى بردوا حد يبقى له "رب كريم" ويزعل؟ خليك بشوش ومتبصش للحياة من زاوية واحدة، ما تخليك متفاءل بقى، النبى تبسّم. أقولك على حاجة حلوة، عارف لما تبتسم للحياة، إنت مش بس هتسعد نفسك.. إنت كمان هتسعد اللى حواليك. عارف لو خيرونى بين مال قارون أو منصب مهم، وبين نفس راضية باسمة، أكيد هاختار التانية. إيه فايدة المال مع وش مكشر؟ والمنصب مع نفس مقبوضة وقلقانة؟ وإيه هو جمال الزوجة لو كشرت وقلبت بيتها جحيم؟ يااااه، لخير منها ألف مرة، زوجة لم تبلغ قدرها من الجمال ولكنها جميلة بابتسامتها وبشاشة وجهها وروحها وكفاية أنها جعلت من بيتها جنة. فى أحسن من أن الحبيب، صلى الله عليه وسلم، يقولك: "وتبسمك فى وجه أخيك صدقة". يا سيدى تبسّم بقى.