الأخطاء الصغيرة التى ترتكبها الأمهات فى تربية أطفالها قد تخلف أزمات كبيرة فى شخصيتهم وتفسد حياتهم إلى الأبد وتدفعهم إلى اتخاذ قرارات خاطئة فى الحياة. وهو ما حدث حرفيًا فى حياة النجمة "مريم فخر الدين" التى حكت فى أكثر من مناسبة بصراحة ووضوح شديدين عن معاناتها مع والدتها وقسوتها التى كانت سببًا فى اتخاذها الكثير من القرارات الخاطئة خاصة فى ما يخص الزواج، وأفسدت لوقت طويل علاقتها بشقيقها. تعرفى على هذه الأخطاء واحذرى تكرارها مع ابنتك.. أهليها لاستقبال المولود الجديد ظلت النجمة "مريم فخر الدين" تكره شقيقها الأصغر "يوسف" لسنوات طويلة، تقريبًا حتى وفاة والدها، واعترفت بذلك فى أكثر من مناسبة بصراحتها المعهودة وعفويتها، وحكت عن السبب فى إحدى مقابلاتها وقالت "وأنا صغيرة كان ليا سرير جميل فى أوضة ماما، وكنت بحبه جدًا لكن لما أخويا يوسف اتولد ماما رمتنى فى الأوضة التانية بتاعت بابا ويوسف استولى على سريرى، وأنا كنت بكرهه موت لأن ماما كانت بتحبه أكثر منى". هكذا تسبب عدم اهتمام الأم والأب بتمهيد وصول المولود الجديد للحياة فى كراهية شديدة من الابنة لأخيها، وجعلها تشعر أنه جاء ليسلبها كل شىء إلى الحد الذى كان يجعلها تتمنى موته، ففى المقابلة نفسها قالت "فى يوم كنت تعبانة جدا وكان عندى سعال ديكى وسمعت الدكتور بيقول لماما خلى البنت بعيدة عن الولد عشان العدوى وأنا مصدقت سمعت الكلام ده وخليت ماما فى المطبخ ورحت جرى على يوسف وفضلت أكح فى وشه عشان يموت لغاية لما ماما قفشتنى وكانت هتموتنى من الضرب". احترمى كيانها كانت مريم فخر الدين ترى أن أمها تعاملها بقسوة غير مبررة، وأنها رغم نجوميتها وتحقيقها لكيانها خارج البيت إلا إنها داخل البيت تعاملها كخادمة، وتحكى "لما اتطلقت جاءت ماما وقعدت معايا وطبعا كانت بتورينى الويل وكنت فى عز نجوميتى وقتها وكنت الأميرة إنجى والدنيا كلها بتتكلم عنى ورغم كده كل ما أرجع من الاستوديو وأنا لابسة ومتشيكة تقولى (يلا حبيبى عشان تاخد نصيبك من تشطيب المطبخ) أقولها ياماما إحنا عندنا شغالين تقولى لا لازم تغسلى الأطباق وكنت نجمة بره البيت وخدامة عند ماما". ما تخليهاش تهرب منك لزواج فاشل تزوجت مريم فخر الدين من طبيب يدعى "محمد الطويل" بعد 3 شهور فقط من طلاقها من زوجها الأول "محمود ذو الفقار" وعاشت مأساة جديدة مع زوج استغلها ماديًا وأساء معاملتها إلى حد أنها طلبت الطلاق، وفعلت ذلك هربًا من والدتها وقالت فى حوار لها "لما اتطلقت من محمود ذو الفقار وماما جاءت قعدت معايا كنت بتجوز على طول بعد شهور العدة ما تخلص عشان أهرب من جحيم ماما". ماتضربيهاش عوامل كثيرة جعلت العلاقة بين النجمة ووالدتها معقدة منها قسوتها معها، وحكت فى مرة "ماما كانت صعبة جدًا فى معاملتها وكل ما أعمل أى حاجة غلط ألاقى القلم نزل فرقع على وشى وكانت متسلطة وبتفرض رأيها على كل اللى فى البيت ودماغها كانت ناشفة وعنيدة". ما تحرميهاش ورغم أنها لم تولد فى أسرة فقيرة إلا أن الأم كانت تصر على التقتير على ابنتها مما جعلها تولى أهمية كبيرة للمال فى حياتها وحكت "مريم" "ماما كانت صعبة جدا وكنت كل ما أقولها عاوزة قرش تقولى هتعملى إيه أقولها ولا حاجة تقولى يبقى ده تسول.. مفيش فلوس اللى يشتغل هنا ياخد فلوس.. فقلت لها طيب أعمل إيه قالت لى تكوى مريلتك بتعريفة وقميص بابا بقرش والملاية بثلاث قروش وعملت لى تسعيرة لكل حاجة وبعدها بقيت باشمكوجى العيلة وباخد فلوس كتير وكنت دايما بوسخ المريلة والملايات عشان يتغسلوا وأكويهم أنا واخد الفلوس". وعلى الرغم من هذه المساوئ وهذا الخلل فى العلاقة افتقدت النجمة الراحلة والدتها وشعرت بالحزن لرحيلها، وأدركت فيما بعد فائدة دروسا كثيرة علمتها إياها، ولكن بعد فوات الأوان.
