اقترح سائقو "السرفيس" والميكروباص، بعددٍ من مواقف سيارات الأجرة، مبادرة، بأن تأخذ الحكومة سياراتهم القديمة المتهالكة، واستبدالها بأخرى جديدة، على أن تُقّسِّط الحكومة ثمن المركبات على أقساط متتالية، مشيرين إلى أن هذا سيفيد الدولة والمواطن والسائقين. وقال السائق بيومى بأحد مواقف محافظة الجيزة: "فيه عربيات ماشية من غير ورق، وده بيعمل مشكلة كبيرة لسوائقين الميكروباص والسرفيس اللى ماشين صح، لأنه بياخد رزقه". السائق يطالب بتنظيم المرور بعد سير السيارات وال"توكتوك" عكس الطريق وأضاف السائق خلال تصريحاته ل"اليوم السابع": "احنا عايزين نقطة مرور تظبط الأمور فى المواقف، لأن فيه سائقين بيمشوا عكس الطريق والتكاتك بتشتغل بهمجية كبيرة". فيما أوضح سائق آخر: "الحال واقف ومفيش شغل، وبتوع الكارتة بياخدوا مننا فلوس الصبح وآخر النهار، واحنا الحال على قده ومش عارفين نعمل إيه، ولو مادفعناش بننطرد بره الموقف ومانعرفش نشتغل". السائق: "بلطجية يفرضون إتاوات.. ولو مادفعناش ممكن يكسّروا العربية" وتابع: "فيه كمان بلطجية ماليين المواقف، ومابيخلوش السواقين تشتغل، وبياخدوا مننا إتاوات، ولو مدفعناش ممكن يكسروا العربية، وكمان التكاتك مالهاش مواقف خاصة بيها، فبتقف فى أى مكان، وده بيعمل لنا أزمة لأنه مافيش نقطة نظام أو مرور تظبط الموضوع ده". فيمال قال على: "احنا بنتعامل معاملة سيئة، ولو اتكلمنا نتضرب، ونعيش حياة غير إنسانية فى المواقف، وأصحاب المحلات يفرشون بضاعتهم فى الشوارع وده بيعطل المرور خاصة فى الشوارع الضيقة، وفى الآخر بيقولوا إن سواقين السرفيس هما اللى عاملين الأزمة، كما أننا نريد حمامات فى المواقف.. احنا مش عارفين ناكل عيش فى البلد دى، نعمل إيه؟ نموت من الجوع ولا نعمل إيه؟، والكارتة بتاخد مننا فلوس رغم إن الحال واقف". مبادرة لاستبدال الميكروباص القديم بجديد وقدم محمود، سائق، مبادرة للرئيس عبد الفتاح السيسى قائلا: "خدوا عربياتنا القديمة السرفيس والميكروباص، وإدينا عربيات جديدة شكلها محترم قدام الناس، نشتغل بيها ونشرف البلد"، مطالبا الرئيس السيسى بالنظر بعين الاعتبار إلى السائقين، لأن هذه المبادرة ستفيد البلد والمواطن قبل السائق وفقًا له. وقال بيومى: "ياريس احنا انتخبناك وبنحبك، عايزين منك تنظر للسواقين بعين الاعتبار، احنا كل اللى طالبينه إننا نغير عربياتنا المتهالكة بأخرى جديدة، ندفع مقدم للسيارة الجديدة، ونقسط الباقى على فترات، وده هيفيد البلد وهيفيد المواطن وهيفيدنى، وده هيخلينى أعيش منها، وآكل عيالى، ونخلى المواطن يركب سيارة نضيفة.. لأن العربيات اللى معانا مالهاش ورق، ولا نستطيع الخروج عن المنطقة اللى شغالين فيها، ونناشد الرئيس السيسى بإنه يبص للمبادرة دى".
