"مش فاضى عندى امتحانات" "صحتى بالدنيا" "اللى ذاكر ذاكر زمان" شعارات رفعها الطلاب فى مختلف المراحل الدراسية على موقع "تويتر" ضد الدراسة والمذاكرة فى تغريدات على "هاشتاج" "مش هنذاكر عشان" الذى وصل خلال ساعات إلى قائمة الوسوم الأكثر تداولاً فى مصر. الأسباب التى استعرضها الطلاب على الهاشتاج تنوعت بين الجادة والناقمة على وضع التعليم فى مصر، وتخوفهم من المستقبل فى ما بعد التخرج، حيث كتب مستخدم باسم "الإسماعيلى" "مش هنذاكر عشان كلنا واحد الناجح زى الفاشل، كلهم من غير شغل"، وقال "أبو أيمن" "عشان إحنا ضحية منظومة تعليمية فاشلة"، وكذلك قالت "سارة طارق" "مش هنذاكر عشان المناهج مملة والتعليم فاشل". أما "سهيلة فرج" فقد شاركت بتغريدة ساخرة كتبت فيها "مش هنذاكر عشان المذاكرة مضرة بالصحة وأنا أهم حاجة عندى صحتى"، وقالت "ياسمين باسم" "مش هنذاكر لأن المذاكرة لوى دراع وأنا الدراع اللى يوجعنى أقطعه"، وقال مستخدم باسم "ناجى" "مش هنذاكر عشان ما أديش المادة أكبر من حجمها". ووفقًا لموقع "keyhole" الإحصائى لتحليل بيانات "تويتر"، فإن هناك أكثر من مليون و759 مستخدم تفاعلوا مع تغريدات الهاشتاج، ونشط عليه قرابة 303 مستخدمين.