إمبارح.. لو فرضنا إن إمبارح دا اليوم السابق للنهارده ! أو حتى قولنا إن إمبارح دا فترة من الوقت عدت علينا بس متواصلين معاها ! مش موضوعنا إمبارح دا أمس ولا من كام يوم .. الحدوته اللى شاغله الشعب المصرى اليومين دوول.. كعادة الحواديت اللى بتعدى علينا بنعيشها وبنتعايش معاها سواء بنبقى فيا أو بنبقى براها هى حدوتة بتقلب الرأى العام المصرى أو خلينى أقول رأى الشعب المصرى... بالتحديد الحدوته ابتدت لما كنت قاعد فى مكان ما وناس بتتكلم عن الانتخابات الجاية اللى بيقول البرادعى لازم يكون رئيس أصله عالم كبير وراجل دولى ليه تقديره واحترامه واللى بيتكلم عن أن جمال مبارك هو الأنسب، لأنه راجل عايش فى المطبخ السياسى وعنده طموحات.. إلخ واللى بيتكلم عن أن الريس مبارك هو الأصلح وهو اللى عارفينه وإنه رجل ليه قدرته وخبرته وحكمته وتاريخه السياسى والعسكرى . واللى بيقول لا دا أيمن نور الراجل المناضل اللى اتسجن ظلم علشان وقف اودام النظام وإنه شخص إتمرمط وأتحبس علشان البلد والتغير .. إلخ واللى بيتكلم شويه عن زويل واللى بيقول أحمد عز واللى واللى واللى واللى .... برغم أن مفيش ولا واحد قال هبقى رئيس أو عايز أبقى رئيس؟! ولكن فلنفرض.. وخلينا نبنى على فرضيات متوقعة الحكاية كلها ... بصراحة اتلغبطت مبقتش عارف هو أنا المفروض أنقى أنهى واحد يبقى الريس بتاعى يعنى اختار البرادعى ولا جمال ولا مبارك ولا نور ولا زويل ... ولا ولا . أنا حماسى شوية زى كتير من الناس بتشوف النضال والوطنية متمثل فى شخص مش سياسة ولا نظام يعنى، كنا نقول عبد الناصر رجل مناضل ووطنى وعروبى، وعمرنا ما قولنا نظام عبد الناصر نظام متأسس على النضال والوطنية والعروبة .. وعلشان كدا كلنا قولنا إن نظام ناصر كان نظام سيىء رغم إننا بنعشق عبد الناصر ! وأنا كنت بفكر بالشكل الأول إللى اكتشفت إنه غلط ! لما قعدت أفكر أكتر وأحسبها كدا قولت هى مصر دى إيه ؟ يعنى إيه مصر ؟ كل واحد يسأل نفسه كدا مصر دى يعنى إيه ؟ هى مصر أرض ونيل وتاريخ وشعب ونظام ومنتخب كوره كويس بيشرفنا . ولا مصر دى دولة تقوم على أرض مصر دولة لها تاريخ عظيم مصر دولة لها شعب مكافح ذاق الويل من الاستعمار وا وا إلخ لقيت إن مصر زى البيت اللى أنت ساكن فيه اللى عشت فيه وكبرت فيه وتعبت فيه وضحكت وبكيت فيه، وارتبطت بيه وبيكون ليه معزه كبيره عندك أوى لو فكرت تسيبه بتفكر تجدده بتفكر تغيره تقويه تخليه أحسن مش علشان بس أنت فيه. علشان بتحبه وعلشان مرتبط بيه كذلك مصر . أنا عايز أقول إن فيه حاجة غلط لما الاقى الشعب منقسم على البرادعى وجمال . وإن شويه بيأيد دا وشويه رافضين دا وشويه مش فاهمين وشويه مش متابعين وشويه مش مهتمين وبننسى إن المشكلة عمرها ما كانت فى الأشخاص ولا عمرها كانت مين اللى بيحكم اسأل والدك كان يعرف عبدالناصر طب كنت تعرف السادات كنت تعرف مبارك . قبل ما يبقوا رؤساء .. كانوا إيه ؟ زى وزيك وزينا كلنا ناس بتفكر لبلدها إنها تقدم ليها كل شىء كويس. محدش فيهم كان طمعان فى سلطة أو كرسى لأن محدش فيهم عارف يعنى إيه كرسى رئيس دولة.. بسبب الفترات اللى عدت على مصر قبل تولى كل رئيس منصبه بنحكم عليها من خلال التاريخ لو جيل زينا مكنش موجود أيام ناصر والسادات وأوائل رئاسة مبارك أو بنحكم على نجاحاتهم وفشلهم من خلال المعايشه اللى بنشوفها على الواقع. فلنفرض إن جمال والبرادعى هم المرشحين طب ليه أنت عايز البرادعى رئيس ؟ طب ليه مش عايز جمال رئيس؟ تعرف إيه عن قدره البرادعى إنه يبقى رئيس وتعرف إيه عن أن جمال لا يصلح أو العكس تعرف إيه عن أن البرادعى لا يصلح وأن جمال هو الشخص المناسب ! ناس بتقول أصل البرادعى رجل عالم كبير وبتنسى أن جمال راجل سياسى محنك وناس تانية تقول البرادعى راجل عاش برا مصر يعرف إيه عنها. وبتنسى أن جمال بردوا نفس القصة مش متعايش مع حال الشعب. طب البرادعى هيعمل إيه؟ تعرف طب جمال هيعمل إيه؟ تقدر تجاوب هى دى المشكلة وهى دى الحلقة المفقودة عندنا الشخصنه ثم الشخصنه ثم الشخصنه. أوباما منجحش علشان هو راجل متربى فى البيت الابيض من وهو بيوأوأ ولا علشان راجل مشهور ومعروف والحلم الأمريكى هو خطاه الراجل دا نجح لإنه قال أنا عايز أغير أنا عايز أعمل شىء جديد ،أنا مبوعدش أخلى أمريكا دولة محبوبة من الجميع، لكن بوعد أن أقدر أصلح ولو شوية من صورتها أمام العالم . اتكلم عن المشكلة الاقتصادية العالمية ومقلش إن هخلى بنوك أمريكا هى اللى بتتحكم فى سوق المال العالمى وهتكون أكبر وأقوى قوى اقتصاديه فى العالم مره أخرى.. لكنه قال أنا هحاول نتجاوز الأزمة من غير أضرار جسيمة. هو دا الفرق ... اللون البمبى اللى بنعيش فيه من حقنا نطمح ونحط أملنا فى إننا نتغير على شخص بس منحكمش عليه قبل ما نشوفه قبل ما ينزل وسط الناس ويلف ويعرف. الشارع المصرى عايز إيه وبيفكر فى إيه؟ أنا لا مع راجل عايش طول عمره برا مصر وبيسمع أخبارها من النشرات ولا مع راجل عيش طول عمره فى بيت الرئيس. أنا مع الراجل اللى هينزل لحد عندى يقول أنت بتعانى من إيه؟ نفسك فى إيه؟ إيه مشاكلك؟ إيه اللى بتحلم بيه؟ أنا مقدرتى أعمل كذا .. دا برنامجى الانتخابى خلال فترة معين ة، هحقق كذا وكذا وكذا وخلال فترة تانية هحقق كذا وكذا وأنت ليك حق تحاسبنى ... مش هكون الملاك اللى هخلى مصر مدينه فاضله بس هكون الشخص اللى يقدر يصلح ويحاول أخيرا وعلشان طولت كدا خلينا نبص للدستور ،نغير الأول المادتين بتوع المدة وطريقة الانتخاب ......ثم نشوف المرشحين نشوف برنامج كل مرشح وهيقدر يعمل إيه نشوف الأجدر والأصلح وندى صوتنا وينجح من ينجح وسواء نجح أو فشل فيه فرصة أكتر من شخص يأخد فرصته ويحاول ينفذ برنامجه. وأنا أجزم إن أول شخص هيكون رئيس جمهورية طبقا للسابق مهما كان اسمه ومهما كان مين هينجح، لإنه عارف إنه فيه محاسبه وفيه تداول سلطة والأهم إن التاريخ مستنيك بصفحاته وسطوره علشان يبروز اسمك بالنور وسط أعظم الناس فى تاريخ مصر .
