سنة رايحة وسنة جاية والدنيا بينا دايرة شوية بنتوه معاها وشوية بنقول إية أخرة الحكاية فى وسط مية حكاية وحكاية لا اخترنا بدايتها ولا عارفين نهايتها غير إننا عايشين فى أزمتها بحلوها ومرها مقضينها لغاية ماربنا يفرجها ما هو ربنا فرجة كبير وخيرة عظيم. بس إحنا ساعات بنعمل نفسنا مش شايفين علشان نفضل نعاند فى حوار مش هيفيد وأنت مش مستفيد غير إنه وقت من عمرك بيضيع. وتفضل تقول دة عيب السنين وأنت اللى مسكين ياعم روح . بص لحالك وشوف أنت هتفضل كدة على طول مقضيها بالطول وبالعرض ولا بيهمك أى حد. لا أصحى وفوق دة ربنا موجود عالم بالقلوب وما تخفى الصدور. صلح حالك ونفسك وخرج كل اللى فى نفسك لربك ولا تخلى الشيطان يضيع نفسك . ودايما يقولك أنت مظلوم وضحية وكل الناس اللى حواليك ظالمين وأنت الضحية. ويقولك انتقم منهم ولا يهمك أنت أخدت أية منهم يعنى أى أحد يقف فى طريقك خلص عليه وفجأة تلاقى نفسك مهزوم ومكسور ومش لاقى طاقة نور جوة قلبك اللى بقى كله سواد وحقد من كل خلق الله خلاص ضحك عليك الشيطان اللى بيقى ساعات كتيرة فى صورة إنسان يفضل يوسس لك زى الشيطان ويغدر بيك ويخونك وسيبك لوحدك تفضل تندب حظك . ما كان قدامك طريق الحق طريق العدل طريق العقل والضمير اللى جواك ولا خلاص مات الضمير وبقيت بقايا إنسان. لا يا إنسان أوعى يموت الضمير اللى جواك عقلك فى راسك اسجد لله الواحد القهار وتوكل على الله حاول تساعد نفسك قوى إيمانك بالله صالح نفسك على نفسك حاول مرة واتنين وثلاثة أوعى اليأس يسكن جواك دور على أبوك وأمك واترمى فى حضنهم دى صلة الرحم نجاة. دور على صاحب صادق يقف جنبك ويدلك على الصح فين من الغلط وأبعد كل صاحب سوء . خليك دايما متاكد إنك مع الله هتكون دايما مسرور وكل سنة وأنتم طيبين وسعيدة وربنا يجعلها سنة خير علينا وعلى مصرنا العزيزة بكل خير وان نتحد جميعا ونكون أيد واحدة ضد أهل الشر بقوة وطنيتنا وثقتنا بالله وفى أنفسنا.
