السلام عليكم أولا .. الصراحة انا لاحظت ان أغلب القراء باعتين مشاكل ومحدش خالص افتكر يبعت نصيحة يمكن تكون سبب في حل ولو جزء من المشاكل وعشان كدة بدأت بنفسي وحبيت أفكر أخواتي الزوجات يمكن يستفيدو من اللي بقوله .. حديث الرسول عليه افضل الصلاة والسلام . قال صلى الله عليه وسلم: "أُريت النار، فإذا أكثر أهلها النساء يكفرن قيل: أيكفرن بالله ؟ قال: يكفرن العشير، ويكفرن الإحسان ، لو أحسنت إلى إحداهن الدهر ثم رأت منك شيئا قالت: ما رأيت منك خيرا قط". متفق عليه. بسبب الحديث ده يا جماعة بقيت كل ما يحصل بيني وبين جوزي مشكلة والحوار ياخدنا على غضبأو عصبية اروح بصه علي شمالى وابتسم باستفزاز واقول لابليس مش هديلك الفرصة دى يا إبليس الكلب ..وبعدها على طول اترمى فى حضن جوزى و محدش يقول لي ان جوزى مختلف أو مش هيقبل أو كذا و كذا ..يا ستي إذا ماقبلش المرة اللي بعدها هيبقى هايل هوة فيه حد طايل ؟! الصبر جميل خلينا نصبر شوية ولا اننا ننصر ابليس علينا الله يهديكوا .. بتتعصبي بسرعة؟ افتكرى دايما ان ابليس عايزك فى النار وخلى نيتك دايما فى كل عمل وكل موقف بتتعرضيله ...انك تفوتى على ابليس الفرصة انه يصدق فى وعده لله .. وكفايانا نطبق الأمثلة العجيبة اللي مش هناخد من وراها غير القسوة والقرف زي جوة وبرة فرشتلك وانت حالك مايل ايه يعدلك .. هههههه بصراحة المثل ده على قد ما ضحكني على قد ما بكاني بسببه على ناس غالية علية أوي .. يا جماعة اتمنى من الله ان رسالتي تكون إيجابية وتكون سبب في إصلاح حال الجميع لعله خير علينا جميعا يا رب .. وشكرا وأسفة إني طولت عليكو . منال الهمشري فضفضة أستاذة منال ... جزاكي الله خيرا عن رسالتك بالتأكيد ستكون رسالة إيجابية لكل من سيقرأها وان كان لديك نصائح أخرى سواء عن تجربة شخصية أو في المطلق أرجوكي إرسليها بدون تردد ولك الأجر بإذن الله .
