جوا قلبك زى ضحكة تكون ورود زى نظرة ف كون شرود تمسح الصمت اللى عشعش جوا أطياف القيود ارسمينى لمسه بتداوى الجراح ارسمينى فوق جبينك شمس بتشق البراح اندهيلى أبقى فارس صوته بيفك السراح اكتبينى شِعر حُر طارح محبة فوق حيطانك احفرينى نيل يمر يسقى وردك بين غيطانك ارسمينى حلم بينادى الشجر غصن بيضلل عليكى انقشينى بألف لون فوق حجر يبقى كحل رموش عنيكى قيدى من خدك شموعى امسحى بإيدك دموعى لملمى بحضنك ضلوعى عند موجك مش هتلقى غير قلوعى اندهيلى لو بعيدك أبقى غنوه تكون نشيدك ارسمينى طير يغردّلك برىء عاش يرفرف فوق قصورك فارس شجاع مخلص جرىء مات لأجل تعيش عصورك ارسمينى زى ما قلبك يريد دا أنتى قلبك لسه طاهر دمى فاير فى الوريد مهما يبهت يبقى ظاهر ارسمينى بدر بيلفلف فى كونك نسمه بتغنى ف سكونك عش مبنى من غصونك عين بتحرسلك حصونك روح شهيد ضحَّت تصونك ارسمينى نهر نيل شق الجفاف حضن دافى للى خاف اغزلينى توب لبردك أو لحاف بس نفسى مرة أفهم رغم خيرك قاعدة ليه اللقمة حاف؟! ارسمينى عاشق مسافر مكوى من شوق الحنين سهم حبك فينا حافر دا الهجر بيزيد الأنين ارسمينى فنان وريشة كتاب وخط الحروف بتبوس إيديه أحلى عيشة وبر آمن أعلى شط مركبك ترسى عليه ارسمينى ارسمينى جوا قلبك ضحكه بتداوى الجراح
