دعت جماعة الإخوان المسلمين كل القوى السياسية والمؤسسة العسكرية، لحوار وطنى للخروج من الأزمة الراهنة، وتم ذلك فى مؤتمر صحفى قبل عدة أيام وأعلنت الجماعه استعدادها للحوار السياسى الجاد وكانت أساسيات الحوار، التى دعت إليه الجماعة تتلخص فى مشاركة الأطراف السياسية كافة ودون احتكار من أى طرف ودون إقصاء لأى طرف، على أن تكون المعارضة السلمية هى السبيل الوحيد وعودة المسار الديمقراطى. الرد: كلام زى الفل نمره واحد حد قال غير كده مين الوحش اللى منع المعارضة السلمية اللى ما فيهاش طوب ولا سلاح أبيض ولا مولوتوف ولا رشاشات أو رفض الحوار بس يا معلمين مع مين؟، نقول بكل تحديد ووضوح (مع من لم تتلوث يداه بدم المصريين) مين قولى مين؟ وبعدين المسار اليمقراطى شغال وذى الفل فيه دستور قرب يخلص وانتخابات نيابيه ورئاسيه جايه؟ يعنى حاليًا مفروض تهتدوا وتتصالحوا مع الشعب وتنتظروا بعض من الوقت؟ وقال الدكتور محمد على بشر، القيادى الإخوانى ووزير التنمية المحلية السابق، إن قيادات التحالف الوطنى ترفض أى تدخل أجنبى فى الشأن المصرى، مشيرًا إلى أن هذا الرد يبلغه إلى كافة المبعوثين الخارجين، الذين استقبلوا قيادات التحالف فى الفترة الماضية، وأضاف أن ما قدمه الجانب الأمريكى والأوروبى لقيادات التحالف كان مجرد تهيئة مناخ، لإجراء حوار بيننا وبين النظام، وأوضحنا لهم أنه لا يمكن أن يتم حوار وقياداتنا داخل السجون، وقال على بشر لا فض فوة "الجانب الأوروبى طرح علينا الإفراج عن القيادات ووقف الملاحقات الأمنية وعدم الاعتداء على المظاهرات السلمية كبداية لتهيئة المناخ لإجراء الحوار. الرد: وحياه النبى هم اللى ما يتسموش إخوانا البعده الأمريكان والأوربيين بيقدموا مبادرات وبيهيؤوا مناخًا لإيه إن شاء الله وعملهم الأسود ده على أساس إننا تحت الوصايه الأوروبيه؟ دا احتلال يا رجالة؟ هو اللورد كرومر حى!؟ وإيه حكاية عدم الاعتداء على المظاهرات السلمية؟ يا نهار ألوان سلمية دى تبقى خالتك وعمتك، طيب ماشى نمشى ورا كلامكم اللئيم الخبيث الملخفن وقولى قولى طب قولى ليه فى مصريين بيموتوا؟ ليه حادثة وزير الداخلية؟ ليه الإرهاب اللى فى سيناء؟ ليه أحداث حريق القاهرة؟ ليه حادثه كرداسة؟ ليه حادثة كنيسة الوراق؟ وبعدين قيادات إيه يا معلم بتكلم على مين الخروج مقبول وعلى دماغنا من فوق بس بأحكام قضائية حبس القيادات يا متعلم يا بتاع المدارس بسبب ارتكابهم جنايات يعنى جنائى وليس سياسى؟ احنا بنهزر أو جايز الإخوان فاهمين أو مصدقين أو متخيلين أو أكيد مؤمنين إننا من أكلة الداتورا أو القات مثلا ومغيبين عمومًا دى بلدنا يا خواجة وشكرًا احنا حنعرف نحل مشاكلنا بالذوق وبالعافية اطلع بره المشهد اخرج يا شيطان.
