لما الغباوة تبقى كيف وأما الغشاوة تخليك كفيف تشوف الحق باطل وتشوف الباطل عفيف ................................ لما البصيرة تروح مالبصر وأما الحظيرا يملاها البقر ساعتها ماهتبقى فارقة تعيش بهيمة ولا تموت بشر ................................ لما الدين يبقى سيف وأما الربيع يبقى خريف ياتعيش فى وطن تانى ياتعيش هنا ضيف ................................ لما الأهبل يقعد يزيط وأما يتجنن فيوم العبيط يا إما يعمل فيها عاقل يا إما يعمل فيها حويط ................................ لما المِش يتعبى فزلعة عسل وأما الغش يقتل شعاع الأمل ياتموت مفتح وراسك لفوق ياتعيش مغمض وعندك حول ................................ لما النهضه تاخدها فالعضل وأما تعمل فيها بطل أخرتها هتوطى برده وبالشفا أوهترفض.. فتموت مالخجل ................................ لما الجدع يصبح طريد الوطن وأما الزبالة تنتن وتبقى عفن ياتفتح بيبانك وتمسح مكانك ياتفضل تشم فكمكمة الزمن