عمال تنفخ وتضرب أخماس في أسداس وتبص تلاقى المدام جاية عليك وتسألك خير يا حبيبى مالك "النكد" عمل معاك عقد دايم ولا إيه؟ تلاقى عيونك "بتدمع " غصب عنك وتشن شنة يسمعها اللى في حارة "قطر" غير الشقيقة وتقولها أبدا يا ستى الأخت قطر جابت شهادة من معامل أمريكية إننا مش إخوات واتضح ليها أن الدم اللى بينا عبارة عن ميه.. ميه معدنية مغشوشة. تبص المدام في الأرض وتقولك وإيه يعنى احنا كده كده كنا شاكين فيها من الأول وشكلها كده بنت حرام إيه بقى الجديد؟ تحاول تمسك أعصابك وتقولها بس المفروض حتى لو مش إخوات ممكن نكون إخوات من الأب أو الأم أو أولاد خال أو عم يعنى ممكن تطلع فيه صلة قرابة من أي نوع هي خلاص على رأى خالتى نعيمة الله يديها الصحة "جزرة وقطمها جحش"؟ تلاقى المدام تشمر عن السواعد وتقول طالما دول بخير وشعب مصر بخير نقدر نرجع بلدنا أحسن من الأول ولا "الحوجة" وتسألك بس هو إيه اللى حصل؟ تتنهد تنهيدة تحرق مديرية وتقولها أبدا يا ستى الست "قطر" طلبت فلوسها وقالت إحنا عيال ورجعنا في كلامنا وعايزين فلوسنا شوفتى الخيبة؟ ده كله عشان مصر "تركع" لقطر قصدى لأمريكا إيه رأيك؟ وما تسمع إلا المدام تقولك والله يا حبيبى مصر عمرها ما تركع إلى أي حد. وبعدين قطر مين اللى أخد منها الفلوس مش "المعزول" والإخوان يبقى حسابهم مع الإخوان ونشوف الأول الفلوس دى راحت فين وبعدين نرجعها.. لا يا حبيبى شغل العبط منه كتير. تلاقى نفسك بتصرخ الشغل ده عند خالتك.. انت فاهمة؟ تحاول تفهمها أن كلامها غلط لكن هي مقتنعة ان كلامها صح. وتحلف بأنها سوف تتصل بعمها الببلاوى وتفهمه الفولة عشان ياخد باله من الحركه "المقطرنة" دى. تحاول تتكلم لكن الست تقاطعك "وشها يصفر ويحمر" وتقول وبعدين إيه "الست قطر" دى مالهاش كبير يترد عليه؟ تستغل الفرصة وتتكلم أيوه ليها بس العلاقة غير شرعية ويقال إنه جواز عرفى وتضحك ويا ستى والكبير هو اللى طلب منها تعمل كده عشان الشعب يتخنق وتحقق أهدافها فهمت؟ ما تسمع غير صوت المدام وهى بتقول لا بقى وهى مصر بقت "ملطشة" لا بقى فلوسهم على "الجزمة القديمة" وأكيد أكيد رجالة مصر عاملين حساب كل حاجة صح؟ تحاول تفهمها أن الموضوع مش موضوع فلوس الحركة نفسها مش حلوة وحرك تخنق لكن نقول إيه العيب لو "جه" من أهل العيب يبقى مش عيب. بس أكيد دى "شورة الموز والموزة والقرد اللى بيحب الموز" "والمقروض" على عينه جاته قرضة خنقنا. وتلاقى نفسك تصرخ صرخة يسمعها العالم العربى من المحيط إلى الخليج: أنا مخنوققققققققققققققققققققققققق
