كنباوية لا هي على حامي ولا على بارد تتحدث مع نفسها وكنباوي يتابعها مذهولا مندهشا ضاحكا من انفعالها الزائد عن اللزوم كنباوية: لو حد يلايمني على رقبته كنت قطمتها بإيدي الراجل الكداب الوقح ده كنباوي: مين ده يا كنباويه اللي عايزه تقطمي رقبته؟ كنباوية: الزفت المنافق المتخلف اللي بيزيف الحقائق اللي اسمه رجب طيب أردوغان كنباوي: عمل إيه الحلوف ده مزعلك بالشكل ده؟ كنباوية: الراجل المراوغ الألعوبان طالع يخطب في الناس في تركيا ويقول مرسي كان حيقضي على الفساد في مصر وكان حيقضي على الفقر كمان وقال إن اللي حصل من السيسي كان انقلابا عسكريا مش ثورة وقال إن الجيش قتل العزّل اللي لا في إيدهم حجارة ولا سلاح ولا مولوتوف الكداب أمال مين اللي عمل مذبحة كرداسة ومين اللي ولع في مبنى المقاولين العرب ومين اللي حرق قسم الوراق ومين اللي حرق ودمر رابعة العدوية ومين اللي حرق الكنائس في جميع المحافظات.. اللهو الخفي؟ ومين اللي قتل الخمسة وعشرين عسكري في رفح؟ ومين القناصة اللي بيستهدفو ظباطنا وجنودنا؟ مين غير الإخوان؟ الله يلعن أردوغان وأهله أجمعين كنباوي: وقال إيه كمان الراجل اللي خرّف ده؟ كنباوية: قال إن الجيش قتل النساء والأطفال العزّل الخرفان الكداب الله يلعنه في كل كتاب كنباوي: روقي روقي نفسك الراجل ده إخواني وخايف اللي حصل في مصر يحصل في تركيا والشعب يطيح بيه زي مرسي وجماعته كنباوية: الكدبة الكبيرة اللي ماسكين فيها هي المشروع الإسلامي والإسلام بريء منهم ومن أفعالهم وعمايلهم هو مين اللي ممكن يقوم على المشروع الإسلامي؟ البلتاجي؟ ولّا العريان؟ ولّا الكتاتني؟ ولّا بديع؟ ولّا حجازي؟ ولّا القرضاوي؟ المنافق اللي بيسخّر الدين لحساب اللي يديله فلوس كل دول كرهونا في المتدينين والشيوخ واللي مربيين دقونهم حسبي الله ونعم الوكيل في الأندال الخونة ويقولوا جهاد يتوكسوا يروحوا يحاربوا إسرائيل ويتشطروا عليها كنباوي: على قولك دول ولا حاجة، ورق كنباوية: أسامي وبس حماس والتكفيريين والجهاديين والقسام وكلهم إرهابيين مرتزقة مأجورين وفي الآخر يطلع حلوف اسمه رجب أردوغان يقول الإخوان كانوا عزّل ومسالمين والجيش هو المفتري اللي عمل انقلاب ماشي انقلاب انقلاب إحنا كشعب راضييين بالانقلاب ده وعاجبنا هو مال أمه؟ الجيش أرحم من الإخوان الإرهابيين، حكم العسكر ولا حكم الإخوان كنباوي: بكرة الحكومة تاخد إجراءات كتيرة ضد تركيا منها قطع العلاقات ومنع الاستيراد لحد ما يفوق الحلوف ده ويعقل وشعبه يعرف إنه إرهابي متخفي زيه زي اللي كانوا حاكمينا سنة بحالها ما تخافيش بكرة كل الحقايق تظهر وتبان كنباوية: يا ريت يا كنباوي نطرد سفيرهم من هنا كنباوي: أنا كمان أتمنى ذلك بس يا رب يحصل بسرعة وده حيكون أكبر رد قاطع على بذاءات وسخافات ووقاحات رجب الزفت أردوغان كنباوية: انت ما تعرفش يا كنباوي غاظني قد إيه بكلامه عن مصر والجيش كنباوي: يغيظه ربنا والله يحرق دمه ولا يهمك من الحلوف ده روقي روقي بكرة الألسنة دي تخرس وتعرف إنها غلطت في حق مصر وتندم على كل كلمة قالتها في حق البلد دي كنباوية: إخص لما بلد زي تركيا لها تاريخ عريق يرأسها غبي متاجر بالدين منافق زي ده كنباوي: تعملي إيه بقى نصيب بس بكرة الشعب التركي يعرفه على حقيقته ويسلخ جلده ووشه ويرميه رمية الكلاب في مزبلة التاريخ ويقول له أمك اسمها حنفى كنباوية: ماشي يا كنباوي أنا هحاول أهدّي نفسي وأقوم أحضرلك لقمة تاكلها تلاقيك على لحم بطنك من الصبح يا حبة عيني كنباوي: ومين سمعك ده أنا عصافير بطني بتصوصو كنباوية: آسفة يا عنيا دقايق وأجهزلك الأكل ولا يكون عندك فكرة وبالمناسبة أنا عملالك النهاردة كسكسي علشان تحلي بقك بعد ما تاكل كنباوي: كتر خيرك يا كنباوية والله نفسي راحتله من كام يوم كنباوية: أديني حسيت بيك وعملتهولك بس المفروض لما نفسك تروح لحاجة تقوللي على طول وما تسيبهاش للصدف يا كنباوي كنباوي: حاضر يا كنباوية في دي عندك حق ربنا ما يحرمني منك كنباوية: ولا يحرمني منك يا غالي!
