يا حظك الحلو لو صادفت وركبت تاكس صاحبه أو سائقه بجلابية ودقن سلفى بقى أو إخوانى مش حتفرق يومك يبان من أوله كوبيا بعيد عنك أزرق سوداوى أو سوداوى مزرق أولاً حتلاقى علامة دائرية ملزوقة على زجاج السيارة من الداخل مكتوب فيها ممنوع التدخين ولو شيطانك وزك أنك تعمل عبيط وتستهبل وتطلع علبة سجايرك وتولع منها سيجارة حتلاقيه ساب الطريق والتفت لك وبيقول لك من فضلك ما ينفعش تدخن ممنوع التدخين ياريت حضرتك تطفى السيجارة وربنا يتوب عليك منها كأنك بتشرب مخدرات أو يقول لك لا حول ولا قوة إلا بالله العلى العظيم باعتبار التدخين معصية وهكذا أنت عاصى ده غير الكلام والوعظ اللى من نوعية السجائر والتدخين حرام شرعاً ولا تلقين بأنفسكم فى التهلكة وأنت كده بتضر صحتك وصحة من حولك وحيديك درس فى أضرار التدخين السلبى ومخاطره وأمراض الرئة والسرطان وحيحسسك أن الدنيا كلها بقت سوده من سيجارة حضرتك ومش بعيد يقول لك أنت كده بتساعد فى توسيع ثقب الأوزون وأنت ممكن ما تكونش فاهم يعنى إيه أوزون أو تخاف وتقول ياساتر هى وصلت للأوزون وأنك كده شخص بتضيع فلوسك فى الهواء والهلاك الفلوس اللى جيبنها لك ربنا يوم القيامة بص حتلاقى نفسك دخلت فى متاهة كل ده علشان تجرأت وفكرت أنك تدخن سيجارة ولو حضرتك ما أنصعتش لرغبته فى اطفاء السيجارة ممكن يركن على جنب ويطلب منك تنزل تاخد تاكسى تانى بلوة بعيد عنك. ضيف على كده أنه ممكن يسمعك شريط كاسيت أو سى دى وعظ من أحد الدعاة المتشددين من اللى بيصرخوا فى الناس ويرعبوهم ويرهبوهم بأحاديث أهوال القيامة وعذاب القبر وغصب عنك لازم تسمع وتقول الله وتنصت ولو موبايلك رن ومخك شت وشيطانك وزك أنك تطلب منه يطفى الكاسيت أو يخفض الصوت حتى تتمكن من سماع المتصل يا ويلك ياسواد ليلك وغيامة نهارك حيبص لك بقرف واشمئزاز ويقول لك ده كلام ربنا يا أستاذ وكأنك اعترضت على كلام ربنا أو طلبت منه طلب وحش فى التاكس طلب مشين لا سمح الله وأنت مش بالك شىء من ده خالص كل اللى كان فى بالك ساعتها أنك تسمع مين طلبك بس. ولو ركبت ومعاك حرمة كده الدنيا أغمقت وبقى النهار ليل وسواد وطين على دماغك ودماغها حسييب الطريق ويركز معاكم فى المراية أو المرايات ويبص لها بقرف لو هى مش منقبة أو محجبة وحيركز معاكم أوى بتقولوا إيه لبعض؟ ماسك إيدها ولا مش ماسك حاطط إيدك على كتفها ولا حاططها فين؟ رغم أنها ممكن تكون أختك أو خطيبتك أو مراتك بيكون هاين عليه يقول لك من فضلك ورينى قسيمة الجواز. بيتنظر البلا قبل وقوعه والسوء وكأن الدنيا ضاقت بيك وما لقتش مكان تتشاقى فيه مع المزة بتعاعتك إلا ورا ضهره فى التاكسى نصيحة لو معاك واحدة حتى لو كانت خالتك ما تركبش بيها تاكسى صاحبه بجلابية ودقن والتاكسيات كتير
