يا وقعتك السودة يا سمعمع.. مالكش حجة يا أبو الشلاضيم.. ماذا ستفعل وماذا ستقول وكيف ستخرج من هذا المأزق اللعين.. أم العيال هتجننى.. في الرايحة والجاية بتبحلق في شلاضيم بُقى وعايزانى أنطق بأي كلمة علشان تجُر شّكّلى وتعمل خناقه.. وانا مش عارف ذنبي إيه في هذه المُضلعة.. فاسمعوا وعوا ولا تتفرنقعوا. أنا هكلمكم من طراطيف مناخيري وشلاضيم بُقي.. طبعا الكورونا خلصت باعتراف مستشفيات العزل اللي أعلنت عن عدم وجود حالات جديدة.. وامتحانات الثانوية العامة خلصت ونتيجتها ظهرت والطلاب كلهم جابوا 99% وكأنهم كانوا بيصححوا لأنفسهم.. يعني ما بقاش ليا حجة قدام العيال وأمهم اللي راسهم وألف سيف يطلعوا للمصيف زيهم زي باقي الناس اللي راحت تصيّف. طب يا ولية يا فقرية كل المصايف بتاعة الغلابة اللي زينا ما زالت مغلقة.. الشواطئ العامة في كل المحافظات الساحلية مقفولة بالضبة والمفتاح علشان إحنا عندنا كورونا. هي بس تسمع كلمة كورونا ويركبها مية عفريت وتصرخ وتقول لي: هي فين الكورونا.. ما خلاص راحت الكورونا.. دا أنت اللي مستخسر تودينا المصيف. شلاضيمي زهقت من محاولة إقناعها هي وشوية المفاعيص إن الحكومة لسه قافله الشواطئ العامة.. وأخيرا صرخت في وجهي وقالت ودينا شاطئ خاص.. نروح مارينا أو شرم أو حتى الغردقة. إننى أشعر بالتوهان.. يا ولية دا أنا مُرتبي مش هيكفى المواصلات لغاية الساحل الشمالى.. أين أنت يا عفركوش يا ابن برتكوش كي تنقذني من هذا الهم وذاك الغم العائلي المستشري في أضلعي. عقلى سيتوقف عن العمل.. دا إحنا بنقول عشانا عليك يارب بسبب الدروس الخصوصية والكلور والكمامات.. رجعوا لي عقلى والنبى وقولولى اعمل ايه مع الولية التي لا ترحم لا هي ولا أبناءها ربنا يجعل كلامنا خفيف عليهم.. خصوصا المفعوصة الصغيرة اللى العفاريت بتلعب على وشها النطة ومافيش على لسانها غير عبارة عايزه اروح المصيف طب والنبى يا عم مدبولى يا ساكن ديوان مجلس الوزراء افتحلنا الشواطئ العامة علشان نروح نصيف وبلاش تنغص علينا العيشه ياعم الحاج.. كفايه علينا المنغصات النسائية صباحا ومساء.. وأوعدك إننا هننزل البحر بالكمامات والجاونتات وكل ما هو آت.. وفى النهاية لك منى كل الاحترامات وأحر السلامات.. السلامو عليكووووووووووووو.
