كنباوية: شوفت يا كنباوي إيه اللي حصل ؟ كنباوي: حصل إيه تاني ؟ كنباوية: الحكاية ابتدت بدري عن ميعادها كنباوي: حكايه إيه كفى الله الشر إيه الإخوان عملوا حاجة جديدة ؟ كنباوية: الإخوان نزلوا النهارده همه والسلفية راحوا اعتصام وزارة الثقافة علشان يضربوا المعتصمين والأمن اتدخل وفض النزاع بينهم وفيه ناس اتصابت واتنقلوا على المستشفى والوزير الموكوس وزير الثقافة راح زار مؤيديه اللي اتصابوا وباس رأسهم كنباوي: يا سلام للدرجة دي ؟ دي قلة أدب كنباوية: لا وبيقولوا إن الإخوان والسلفية حينزلوا الميادين قبل يوم 30 يعني ممكن ينزلوا من يوم 25 علشان يتصدوا للمعارضة اللي نازلة يوم 30 تسحب الثقة من مرسي يعني همه كده بيعلنوا الحرب الأهلية بدري عن ميعادها رغم أن فيه جهادي صرح بأنهم مش حيغرقوا أيدهم بدم المصريين.. لأ ومرسي أثبت فشله الذريع في حكم مصر وإدارة البلاد والواحد مش عارف يصدق مين ولا مين ؟ كنباوي: صدقي عقلك يا كنباوية، عقلك هو اللي حيدلك على الحقيقة واللي حيحصل قبل يوم 30 كنباوية: عقلي بيقولي إن الإخوان خدوا حذرهم بدري وخاصة إني سمعت أن تذاكر السفر من وجه قبلي وبحري اللي بتتحجز من قبلها للسفر للقاهرة مش موجودة وبيقولوا إنها خلصت في أيام 28 و29 و30 رتبوها مش عايزين أهالي المحافظات ينزلوا القاهرة وطبعا المقصودين همه المصريين اللي مضوا على استمارة تمرد لسحب الثقة من مرسي من سكان المحافظات ماكفاهمش أنهم حيقفلوا كوبري 6 أكتوبر قبلها ب 3 أيام بحجة تصليحه وترميمه لأ كمان مفيش تذاكر سفر من أي بلد تانية للقاهرة ده اللي احنا عرفناه ده غير طبعا المستخبي والمستور ما همه ما وراهمش حاجة إلا التخطيط لبوظان المظاهرات وتفويت الفرصة على المعارضة والشعب المصري أنه يقول كلمته ويعبر عن رأيه في مرسي وحكم الإخوان كنباوي: هو الحكم بالعافية ؟ كنباوية: همه بيقولوا إنه مش بالعافية بالشرعية والصندوق ومرسي جه بالاتنين الشرعية والصندوق ولازم يكمل مدته الأربع سنين بحالها كنباوي: أربع سنين إيه يا ولية انتي اتجننتي ولا همه اتهبلوا في مخهم دي سنة واحدة لحكمهم خلتنا نكح تراب وجابتنا ورا عشر سنين واستحملناها بالضالين وبطلوع الروح أمال حنعمل إيه لو قعد باقي المدة ده احنا حنولع أكيد في بعض ينسوا يا كنباوية ينسوا لا سنة تاني ولا حتي شهر هى كفاية لحد كده هى كده جابت أخرها ماعدناش نقدر نستحملهم أكتر من كده كنباوية: ومين سمعك ده يوم ما يغوروا المفروض مصر تعمله عيد نحتفل بيه كل سنة كنباوي: عندك حق ده حيبقى أجمل عيد عندنا عيد التحرر من حكم الإخوان ونكسر فيه القلل والازيار اللي عندنا كلها وراهم جاتهم القرف مسخوا عيشتنا كنباوية: ونغني كلنا هاتولي رئيس كنباوي: رئيس تاني ؟ كنباوية: إيه يا راجل انت عاوز البلد تفضل من غير رئيس ؟ كنباوي: لأ مش قصدي كده بس ناخد هدنة تحت حكم الجيش لحد ما نختار صح المرة دي وما نغلطش تاني ونشرب رئيس جديد أسوأ من مرسي لازم نختار صح المرة دي لا قال الله ولا قال الرسول مع كل احترامنا لكلام الله والرسل بس البلد محتاجة رئيس صح مش مخادع ولا منتمي لجماعة لازم يكون منتمي للمصريين كلهم كنباوية: كلامك صح المرة دي يا كنباوي إحنا ما حسناش في السنة اللي عدت دي أن إحنا عندنا رئيس فقدنا الإحساس ده بوجود مرسي لازمنا رئيس بجد مش رئيس منظر واسم كنباوي: وده حنلاقيه فين ؟ كنباوية: حنلاقيه وحنبقى أحسن بلد بس قول يارب كنباوي: يارب يا كنباوية، يارب
