كنباوي يدخل على كنباوية فيجدها في قمة غضبها متأزمة على غير العادة تطبخ بغل وغضب وعنف فيستفسر منها عن سر الحالة التي هى عليها قائلا: مالك ؟ إيه جرالك ؟ إيه غير أحوالك ؟ كنباوية: إيه يا كنباوي انت حتغنيلي وحتعملي فيها محمد فؤاد ؟ كنباوي: لا حغنيلك ولا حاجة أنا كل الحكاية بحاول أخرجك من اللي انتي فيه ده كنباوية: مش حتقدر كنباوي: للدرجة دي زعلانة ومتضايقة ؟ كنباوية: وأكتر من الدرجة دي لما مرسي يقول في جريدة الأهرام إن المطالبة بانتخابات رئاسية مبكرة عبث يبقى إيه؟ كنباوي: آه صحيح يبقى إيه ؟ كنباوية: يبقى هو مش في دماغه رفض الشعب ليه، يبقى مش ناوي يتعتع عن حكم مصر كنباوي: هو عبيط علشان يسيب الحكم ويلاقي نفسه محبوس وبيتحاكم على قتل الثوار زيه زي مبارك اللي اتلسع من الشوربة ينفخ في الزبادي يا كنباوية ولا إيه ؟ كنباوية: يعني قصدك تقول إنه حيقعد على قلبنا أربع سنين ؟ كنباوي: لأ تلاتة بس لأنه قعد سنة وعدت بالضالين ربنا يفوت الباقي على خير كنباوية: وحيجي منين الخير طول ما مرسي موجود كنباوي: حيجي من عند ربنا أنا عارف إن مرسي مايجيش من وراه خير أبدا كنباوية: ده بيقول إنه مالهوش ذنب في اللي بيحصل في البلد من خراب وإن الخراب ده نتيجة البوظان اللي كان مستشري في مؤسسات الدولة اللي هو بيحاول يطهرها دلوقتي علشان كده برنامج ال 100 يوم اللي قال عليه ماقدرش يحققه في ميعاده زي ما وعد المصريين بيه كنباوي: ده قصر ديل وكلام مرسل وكله في الهجايص كنباوية: مرسل وكله في الهجايص يركبوا على بعض إزاي كلمة بيئة وكلمه فصحى كنباوي: يركبوا البيئة من القهوة والشارع والفصحى من لسانك وثقافتك ولباقتك كنباوية: ما علينا شوفت كلام مرسي ؟ كنباوي: أيوه يا ستي شوفت وسمعت هو مطمن بالإخوان والداخلية له حق يقول اللي هو عايزه بس أحلق شنبي أنه خايف ومرعوب من يوم 30 كنباوية: ما أنا عارفة ومتأكدة من كده بس اللي غايظني أنه بيهدد اللي حيتهور يوم 30 وبيتوعد الخارجين عن القانون في اليوم ده كنباوي: هو هدد ؟ كنباوية: أيوه يا كنباوي هدد وكشر عن أنيابه كنباوي: مرسي طلعت له أنياب ؟! كنباوية: أيوه يا سيدي شوفت المصيبة مرسي طلعت له أنياب القطة المغمضة فتحت كنباوي: الإخوان مش عبط ولا هبل حياخدوا حذرهم أوي في اليوم ده وقبله كمان وتلاقيهم مستعدين من دلوقتي ومرتبينها مع الداخلية المتأخونة والمخابرات كمان وحماس دول ولاد هرمة مش حيسيبوا اللي اتعمل في مبارك يتعمل فيهم هم كمان لأن لو حصل معاهم نفس اللي حصل مع مبارك ونظامه حينداسوا بالجزم وحيتبهدلوا وهم مش حيرضوا بكده أبدا حتى لو اعتقلوا نص المصريين ؟ كنباوي لأ: عندك حق دي حاجة تقرف وتزهق بس ما باليد حيلة ما علينا إلا الصبر وانتظار اليوم الموعود يوم 30 يونيو وربنا يعديها على خير كنباوية: سبني بقى أحضر لكم الأكل كنباوي: ومين له نفس ياكل بعد كده ؟ كنباوية: لازم ناكل زي ماهم بيطفحوا ولا هاممهم حاجة خالص ماعاش ولا كان اللي يسد نفسنا داهية تسد نفسهم هم البعدة مطرح ما يروحوا قول آمين كنباوي: آمين يارب العالمين !
