وأقول على المستخبى واللى مش معروف.. أضرب فى ودعى .. وتمللى بادعى.. والمستخبى باقوله ع المكشوف يا وزير ثقافتنا إنت بتبتدي المشوار.. فبلاش خلاف ويَّا أهل الفكر والأشعار.. هي الثقافة كمان ناقصة اختلاف في حوار.. مُش م البداية حتبدأ تمسك المنشار.. خلِّي الحوار له أساس.. في كَفّة الأفكار.. ياوزير ثقافتنا مش ناقصة خلاف وشجار.. وقول لنا خُطتك فيها إيه من الأخبار.. كان نفسي تبقي البداية كلها استبشار.. مش فصل.. ثم اعتراض ورفض واستنكار.. إنت مع مثقفين.. كُتاب لهم أَدوار.. والكلمة هي السلاح الفاعل البتار.. وأهل الأدب والثقافة شُعلة الأنوار.. والكل محتاج ثقافة حرة ليها شعار.. والفكر هو الأساس للمجتمع ومسار.. والشعب واعي ويعرف والنبي يختار.. الصح فين والغلط ومثقفين شُطار.. وأنت وزير للثقافة والثقافة منار.. فبلاش خلاف م البداية لَلْأمور تنهار.. الخلق مش ناقصة يبقي الفكر فيه إعصار.. وأنا قلت لك وإنت حُر.. تقول لي فيه أعذار.. أرجع وأقول والنبي تسترها ياستار.. أنا رملي ويَّا الودع في أمركم محتار.