إنها هزلت وزبلت وتنيلت بستين نيلة، يا ويحتاه من ذاك الذي أراه، ده إحنا بقينا في نص رمضان، والواحد لسه مش قادر يفهم مين عايز إيه في أي مسلسل، إننى أشعر بالتشرذم، أشعر بالتوهان مما لم يكن ومما قد كان، المسلسل عبارة عن مشهد لكل نص ساعة من الإعلانات.. وسبحان مقسم المساحات على الشاشات أنا شلاضيمى حفظت الإعلانات عن ظهر قلب، ومش قادرة تفهم حاجة من المسلسلات، وطبعا ماتعرفش تنتقل من مسلسل لمسلسل لأن الإعلانات بتتذاع في وقت واحد على كل القنوات، يعنى بيتعاملوا معانا بطريقة "هتروح مننا فين يا نور العين" ده حتى اليوتيوب ما بقاش يذيع المسلسلات اللى كنا بنتفرج عليها كل سنة في رمضان وهى خالية من الدسم، أقصد خالية من الإعلانات، أنا نفسى أشوف مسلسل دايت يا جدعان، ده حتى المنصة الجديدة اللى اتعملت علشان تذيع المسلسلات دايت اتهكرت والسيستم بتاعها باظ، زى سيستم التابلت بتاع الثانوية العامة تمام. والنبى ياخويا كفاية إعلانات، وخلينا نشوف المسلسلات زى كل بلاد العالم، وبلاش تنغص علينا العيشة ياعم الحاج، وكفاية علينا المنغصات النسائية صباحا ومساء، كفاية علينا إعلانين تلاتة كل ربع ساعة وأنا ساعتها سوف أقبل يدك وأربت على أكتافك أنا دماغى هتدشدش ولا أدرى ماذا أفعل وماذا أعنى، المدام قاعدة لى بوزها في بوزى طول الليل، بسبب إنها مش بتحب الإعلانات ومش عارفة تركز مع مسلسل واحد يوحد ربنا.. وساعات تحكيلى عن مسلسل "كلبش" اللى فيه "ولاد أبو جبل" بيتعاركوا على الورث مع إن "داليدا" سابتهم وهربت على الإسكندرية، و"الشواف" دخل المصحة النفسية، وهكذا من المهلبية اللى في دماغها بسبب عدم التركيز في مسلسل واحد آه يا إعلاناتى يانى يا ماااااا مااااا.. أرجوكم انقذونى من الإعلانات ومن المدام يا جودعان، لأنها كده ممكن تتفرغ للكلام عن لبس العيد ومصاريف المدارس وكعك العيد.. إننى أشعر بالإنعياى.. آه يا شلاضيمى يانى يا ماااااااااامااااااااااا.. إننى سأكف عن الكلام.. يلا بقا.. السلامو عليكوووووووووووو
