في إطار حرص فيتو على منح الفرص لرؤية جديدة في التحليل الرياضي، نفسح المجال اليوم للنجم السابق مصطفى صادق نجم المقاولون العرب في تقديم تحليل مختلف عما يحدث في الاستوديوهات التليفزيونية وستكون البداية بلقاء الأهلي والإنتاج الحربي الذي انتهى أمس في الأسبوع الخامس من عمر مسابقة الدوري الممتاز... يقول مصطفى صادق: الأهلي 0 الإنتاج 0 منظر الأهلي أمس بيفكرنى بالراجل المحترم بتاع التوكتوك لما قال.. بالله عليك تقولي بقى هي دي مصر؟؟ بالله عليك تقولي بقى هو ده الأهلي بقى هوه ده الأهلي. تشكيلات غريبة جدا.. مافيهاش تجانس. أنا مش عارف الراجل الخواجة عايز إيه. ومتأكد إنه هو نفسه مش عارف عايز إيه. الأهلي من بعد الأربعة المدافعين وهشام محمد، تحس إن في أربعة تحت الاختبار ولا يصلحوا. الكرة مافيش فيها معلش لازم تسيب عباس يلعب كتير هيبقى كويس.. لا ده كان زمان. دلوقتي يروح إعارة في أي مكان ولما يبقى عباس ينفع يلبس تي شيرت الأهلي يبقى يرجع. 1. أكرم توفيق: من تطور الكرة في السنين الأخيرة، خلاص مبكونش طايق أشوف اللي مابيعرفش يلعب. 2. أحمد حمودي: أكيد باباه هو اللي بيصرف على النادي، علشان كدة ببلعب أساسي. 3. ناصر ماهر: في سموحة كان بيصول ويجول، لكن مش أي شخصية تنجح في الأهلي. 4. إسلام محارب: في لاعب بيكون بديل بيقلب النتيجة ويتألق لكن لو أساسي بيبقى تايه. ال4 لاعيبة دول هما السبب في شكل الأهلي دا. أزارو مهاجم مشاكس ورخم ومتحرك آه بيضيع بس أفيد بكتير من ال4 دوول. الإنتاج مختار موقف الفريق صح، لكن عنده مشكلة في الأفارقة فهوود في الجري، لكن على المرمى صفر. الإنتاج لعبوا ماتشات الموسم ده أحسن من كدا. «هدف ملغي لمؤمن زكريا» «المساعد كان عايز يعطي مؤمن تعويض بهدف كان متسلل.. مؤمن بس ماسجلش» نجم الأهلي هشام محمد نجم الإنتاج عامر عامر، ونجم المباراة عامر عامر. صلاح محسن موهوب، وميدو مستحيل احتياطي للناس دي، إزاى الإثنين دول قاعدين احتياطي. وأيمن أشرف بيلعب ليه؟ وشكرا.
