مخبر متأخون متحدثا فى جهاز لاسلكى: ألو .. ألو عمليات .. عمليات.. يا مكتب الإرشاد رد هداكم الله .. يوووووه نسيت الشفرة ، «نيو ، نيو .. جزاك الله خيرا .. نعم نعم». ضابط إخوانى بركة: « نيو، نيو .. جزاك الله خيرا .. نعم نعم » خير يا مخبر متأخون واحد.. ابدأ الإرسال . مخبر متأخون واحد: أيوه ياباشا استلمت المراقبة من المخبر متأخون اتنين فى عماد الدين.. ونحن خلف الهدف من ساعتها.. قطع نفسى الله يقطع نفسه، من الألفى لنقابة الصحفيين لنقابة المحامين .. ربنا يهده .. ودلوقت فيه ندوة فى أتيليه القاهرة بسلامته ضيف فيها .. وهايلطعنا جنب سيادته ييجى ساعتين كمان. ضابط إخوانى بركة: ساعتين ولا تلاتة يا مخبر الشوم إنت .. كل ده مش مهم .. المهم الصوابع يا بنى آدم الصوابع .. شفته عمل حاجة بصوابعه؟ ! مخبر متأخون واحد: هممم ... المهم الصوابع .. لا يا باشا الشهادة لله ... الراجل ده من ساعة ما مشيت وراه وهو مؤدب ولا يعملش الحركات الوحشة اللى بالك فيها دى بصوابعه، ولا بأى حتة من جسمه .. دا جدع أمارة والعيبة ما طلعتش من بقه يا ناس، الواحد يقول اللى ليه واللى عليه. ضابط إخوانى بركة: ياسلام .. ما تجوزه أختك أحسن بالمرة يا مخبر الندامة .. يا طور - استغفر الله - خلى بالك من شغلك، بقولك الراجل ده من أخطر أعداء الوطن وبيجيله تمويل من بره كمان . مخبر متأخون واحد: يا سنة سوخة يا ولاد تمويل .. ومن برة كمان .. ده يبقى جدع لئيم جدا .. ده كان هايضحك على الحكومة لكن شوف عشان نيته السودة ربنا بعتكم نجدة للشعب الغلبان ده .. ربنا يخليكوا للبلد يا باشا .. ولا يهمك حتما ولابد أنا وراه لحد ما أجيب لك قراره. وبعد ساعات.. مخبر متأخون واحد: أيوه يا باشا الندوة خلصت .. وأنا ماشى وراه من ساعتها وشفته راح واقف على ناصية عبد الخالق ثروت مع تقاطع طلعت حرب وجاله راجل مريب جدا وقعد يتكلم معاه .. شوية وراح مطلع صباعه ومشاور له بيه ناحية آخر الشارع وبعد كده الراجل سابه ومشى فى الناحية اللى شاور له فيها بصباعه .. يا باشا ... بصباعه، والحمد لله أنا صورت كل حاجة بنفسى. ضابط إخوانى بركة: أيوه كده .. عفارم مخبر متأخون واحد ... عفارم، مش قلت لك ده مجرم عتيد الإجرام واحنا والريس عارفينه .. أديك غلطت يابن المفتحة غلطت ..المهم الراجل المريب ده عملت معاه إيه ومين بيتابعه؟ مخبر متأخون واحد: ودى تفوتنى سعادتك .. بعت وراه الشيخ مخبر ابن بهانة المستباركة وزمانه متابعه زى ضله.. ما تقلقش يا باشا وراك رجالة. وبعدها بأسبوع .. الرئيس مرسى متحدثا فى مؤتمر المرأة: مرسى فى موجة غضب عارم: اللى هيحط صباعه داخل مصر هقطعه، وأنا شايف صباعين تلاتة بيتمدوا جوه من توافه لا قيمة لهم فى هذا العالم .. حسبوا أن المال يمكن أن يصنع رجالا! تصفيق حاد من الحضور، وبعد المؤتمر: الرئيس مرسى يسير فى موكب رئاسى مهيب، عائدا من دار القضاء العالى بعد أن سمع بنفسه أحكاما بإعدام الناشط الذى شاور بإصبعه وجميع النشطاء السياسيين من أفراد عصابته الذين حرضوه على اللعب فى هواء الوطن، يمر الموكب الرئاسى بالتمثال الشهير لإبراهيم باشا بميدان الأوبرا، وقد وضعت جبيرة قطنية كبيرة حول إصبعه السبابة الذى كان يشير به يوما إلى مستقبل مصر .