قال سعد سمير لاعب النادي الأهلي خلال لقائه ببرنامج معكم مع منى الشاذلى، الليلة، إنه كان قلقا من رد فعل الكابتن حسام البدرى المدير الفنى للأهلي ودفعه ذلك لإخفاء خبر زفافه. وأكد أن كابتن حسام يحب الالتزام، وتابع "هو بيحب الالتزام وقال لى أجل الفرح شويه لحد فترة التوقف بس أنا كنت اتفقت خلاص فكان الحل الوحيد أنه ميعرفش والناس اللى في النادي متعرفش وكتب كتاب بس وعملت ليلة حنة في البلد برا القاهرة وأنا بعزم الناس فيه لاعيبه مكنتش بتكا عليهم قوي في العزومه لأنى عارف إنهم مش هيجوا علشان في بنها وقرية فهيبقى صعب لكن فوجئت وإحنا بنأكل الناس بمجموعة من اللاعيبة جت وفجأة الفرقة كلها جت". وأضاف سعد "كنت حامل هم هأمن الناس دى كلها إزاى لأنه اللى بيشوف لاعيبه بيبقى عايز يتصور وكده وبعدين عاشور جيه في الآخر وكان نفسه ياكل كبدة وهى خلصت وحصلت مشكلة والكابتن حسام غالى كمان كان نفسه في الكبدة". وحول تأمين لاعبى الأهلي قال سعد "طبعًا بشكر مديرية الأمن بعتوا لنا 3 عربيات شرطة وكنا عاملين ممر كده من الباب لحد المسرح وكانت المشكلة أنه أول ما اللاعيبة دخلت اللى بيأمنونا نطوا على المسرح علشان يتصوروا".
