-صباح الخير، لو سمحتي هو التقديم منين؟ *أهلا وسهلا يافندم.. حضرتك هتقدم لاي مرحلة؟ -ال 3 مراحل.. عندي ولد ف ثانوي وولد ف إعدادي وبنت ف ابتدائي.. *تمام جدا يا مستر......؟ -دكتور.. دكتور إيهاب *أهلا بحضرتك يا دكتر.. أولاد حضرتك كانوا ف أي سكول قبل كده؟ -كنّا برة مصر ولِسَّه راجعين نستقر هنا *برة مصر؟ هايل يا فندم.. ثواني كده.. آلو.. مس إحسان، معايا هنا دكتر إيهاب اللي كان بيشتغل برة مصر ونزل يستقر ف مصر ويعمل بيزنس و......... -بس انا مش هعمل بيزنس انا ل.......... (بتشاورله يستنى) *ايوة معاكي يا مس احسان.. ايوة ايوة هيعمل بيزنس هو بس متلخبط شوية.. لا ده عنده ولدين وبنت ف ال 3 مراحل تعليم.. تمام.. تمام.. اوك يا مس احسان.. مع السلامة معلش يا دكتر حضرتك هتروح لمس احسان ف الفيروست فلور بعد الچيم -طيب متشكر! -------------- (مكتب مس إحسان) -اهلًا اهلًا يا دكتر، اتفضل.. تشرب ايه؟ *متشكر يا فندم، ربنا يخليكي.. كنت عايز بس استفسر عن المطلوب للتقديم والمصروفات وكده -مفيش أي مشكلة يا دكتر.. حضرتك شرفتنا.. حضرتك كنت شغال فين بقى؟ *ف دبي -ممتاز.. والأولاد كانوا ف انترناشونال سكول هناك؟ *ايوة تمام -ممتاز.. طيب حضرتك طبعا عارف أن التقديمات بتبقى ف شهر 7 و8 والوزارة بتقفلها بعد كده.. *بس في ناس قالول............ -لكن طبعا لازم يكون في استثناءت للكوادر اللي راجعة تعمر وتبني ف الوطن زي حضرتك.. *اشكرك يا فندم ربنا يخليكي.. طيب ايه المطلوب؟ -حضرتك هتجيبلي آخر شهادات للأولاد وشهادات ميلادهم وشهادات التطعيم وصورة من جوازات السفر بتاعة الاسرة.. هي المدام بتشتغل ايه؟ *مراتي مدرسة لغة انجليزية -و يا ترى كانت بتشتغل هناك؟ *ايوة كانت بتشتغل ف نفس مدرسة الأولاد، هو ده هيفرق ف ال........... -ممتاز ممتاز.. طيب اتفضل حضرتك ورقة وقلم أهم واكتب ال Tuition Fees بتاعة الأولاد.. بالنسبة لل preliminary، ال fees مممممم، 15 ألف، بالنسبة لل Preparatory ال fees مممم، 21 ألف، و بالنسبة لل secondary 31 ألف.. *ممكن ال calculator اللي هناك ده بعد اذن حضرتك؟ -اوي اوي يا دكتر اتفضل *كده ال 3 أولاد واقفين عليا ف السنة ب مممممم 67 ألف جنيه.. صح كده؟ -صح يا دكتر.. *مش كتير يا مس احسان؟! -لا خالص! أولاد حضرتك هيعيشوا experience تعليمية سلسة وخالية من المعوقات.. هو احنا بنشتغل ونتعب عشان مين بس؟! ههههههه *حضرتك اقنعتيني بصراحة..، في مصروفات ل أي حاجة كمان؟ -لا ابدا،، 9000 بس للباص *لا مفيش مشكلة انا هوصلهم أن شاء الله -ههههه.. يا فندم السكول سيستم لازم كل ال students يستخدموا باص السكول عشان نضمن عملية تعليمية سلسة وخالية من المعوقات.. *خالية من المعوقات ف الباص؟ ازاي مش فاهم؟! -افرض حضرتك راحت عليك نومة؟ افرض نزلت لقيت كاوتش العربية ع الأرض؟؟ افرض البطارية نامت؟ افرض العربية اتسرقت؟ اتحرقت؟ نعطل بقى الأولاد عن المورنينج سيراموني؟ *ايه ده هو في عندكو سيراموني الصبح؟! -الله! طبعا امال ايه! *حضرتك اقنعتيني بصراحة... يبقى 27 ألف باص لل 3 أولاد صح كده؟ -تمام يا دكتر.. *يبقى كده المجموع 94 ألف جنيه.. في حاجة تاني؟ -ال books وال lockers وال activities *تمام، كام دول؟ -ممممم roughly كده 3000 جنيه للطالب *و طبعا دول اختياري، صح؟ -لا طبعا اجباري يا دكتر.. عشان نضمن عملية تعليمية سلسة وخالية من المعوقات.. *خالية من المعوقات عشان اللوكرز؟؟ -الله! طبعا يا فندم امال ايه، افرض ابن حضرتك هيروح الچيم؟ بنت حضرتك عندها سكول play؟ أو عندنا كاستوم بارتي؟ يحطوا ال clothes بتاعتهم فين؟؟ *حضرتك اقنعتيني بصراحة.. كده (بيحسب على الآلة الحاسبة) 9 و94، يبقى 103 ألف.. في حاجة تاني يا مس إحسان؟ -لا كده تمام يا دكتر.. *طيب معلش عايز أتأكد من عدد الطلاب ف الفصل وكده؟ -ماتقلقش من الناحية دي خالص يا دكتر، الكلاس ماكسيمم بيكون 30 ستيودنت.. عشان عملية تعليمية سلسة وخالية من المعوقات.. *مش كتير 30؟ حضرتك متاكدة من الرقم ده؟! -يا فندم انا مديرة السكول!.. اكيد طبعا متأكدة!... و لا 30 ستيودنت مش كتير خالص!.. حضرتك أتأكد أن أولاد حضرتك هيلاقوا attention من التيتشرز بشكل بيرسونال! *تمام.. وفي كام كلاس ف كل مرحلة؟ يعني المدرسة بصفة عامة كثافتها عالية؟! -لا خالص يا فندم! عندنا ف ال preliminary كلو 20 كلاس بس وف ال preparatory 12 كلاس وف ال secondary 12 كلاس.. *تمام.. انا متشكر جدا يا مس احسان.. -على ايه يا فندم.. آخر حاجة، في طريقتين بس للدفع.. كاش أو تحويل بنكي.. مش بنقبل شيكات -هايل.. ثواني بس هعمل مكالمة لصفوت اخويا.. آلو.. ايوة يا صفوت.. أيوة روحت المدرسة وقاعد مع مس احسان اهو.. بص، افتح بقى ملف نضيف ومن أول السطر كده.. بياخدو 15 ألف ع الراس ف ابتدائي.. ايوة 15.. اضرب كده ف 600 راس توتال؟ آدي 9 مليون.. لا استنى بس عندك 21 ألف ع الراس ف إعدادي واضرب ف 360 راس توتال؟ تمام يبقى 7 مليون ونص يابني استنى متسربع ليه! ثانوي بقى 31 ألف ع الراس ف 360 راس توتال بردو؟ الله ينور عليك 11 مليون وشوية فكة.. لا لِسَّه اصبر.. خد عندك 9000 باص اجباري ع الراس، يب..... ايوة الباص اجباري.. ايوة اجباري بقولك! ايوة عشان تبقى العملية التعليمية خالية من المعوقات.. ركز بقى.. 9 ع الراس ف توتال 1300 راس؟؟ يبقى 11 مليون وشوية فكة بردو.. كده كام كلو؟؟ 37 مليون ف السنة يا معلم! لا طبعا مش كلهم صافي ماتبقاش غشيم! مش في مرتبات مدرسين طول السنة؟ ايوة المدرس بياخد 2000 جنيه ماكسيمم.. ف كام مدرس يعني؟ 30؟ ياعم خليهم 40 عشان خاطري؟ يبقى كام؟؟ المدرس الواحد واقف ب 16 ألف ف السنة، يعني كلهم على بعض 600 ألف وشوية فكة.. قول نكمل المليون مكافآت امتحانات وحوافز ومجموعات تقوية؟ و عندك مليون كمان مصاريف الباصات وبنزين وصيانة وسواقين؟؟ مليون كمان مصاريف كهربا ومرافق وبلدية صيانة مباني وحنفيات جديدة وخلافه؟؟ و مليون كمان مصاريف تعليمية ودمغات وطلبات وجليتر وبلاليين وخلافه؟ و من عندي مليون كمان دلع ومياصة وشهيصة آه نسيت! ولاد اللعيبة عاملين حاجة اسمها اللوكرز مع الكتب وبياخدوا عليها 3000 ع الراس.. ايه؟!.. لوكرز مش أوكر! دواليب يعني يا صفوت!.. ايوة دواليب.. آدي كمان 3000 ع الراس ف 1300 راس يبقى 4 مليون تقريبا.. حلو اوي.. يتبقى حاجة وتلاتين مليون صافي ف السنة! عنب ولا مش عنب يا معلم صفوت؟؟ شوف ضرايبهم كام دول وابعتلي عالواتس بقى.. ايوة انا لِسَّه قاعد مع مس احسان.. آمين يا خويا تسلم.. يللا سلام بقى.. ايوة يا مس احسان مع حضرتك.. معلش طولت مع صفوت اخويا ههههه.. مأمور ضرايب أصله ويحب ياخد معلومات كاملة وخالية من التزويرات.. كنّا بنقول ايه؟
