لأ.. لأ بقى مش كدا.. الرمل فيه ألغام.. حتى الودع ياجدع.. بيقول كلام وكلام.. إيه الحكاية ياريس.. نفذ الأحكام.. وبلاش تسيب وفوضه ولعبكة وزحام.. أحسن حنوصل فى لحظة ياعم للإعدام.. وودعى لو تسمعه حتقول ده يبقى حرام.. فقول بقى للجماعة يبطلوا أحلام.. ويمدوا إيدهم فى إيدنا.. نبقى شعب تمام.. ده مصر مش ناقصة تانى بهدلة وزكام.. وفيه فلول متدارية.. عايشة فى أوهام.. وفيه غلابة عينها صاحية مابتنام.. فبلاش بقى الطبالين يرددوا الأنغام.. ويقولوا إحنا اللى بنحارب ولينام مقام.. ياريس الدفة خد بالك من الأفلام.. واسمع كلامى البلد ماشية لحال الشام.. وده مصيبة ومش ناقصة البلد أورام.. وأنا قلت لك أنت حر وسيبها للأيام.. وبكرة حتشوف وحتصدق بأن نظام.. فيه كل حبة مظاهرة ومعركة وركام.. وكل يوم فيه مشاكل زايدة بالأكوام.. والمعركة فى الشوارع دم كله آثام.. فاسمع كلام الودع واضرب لمصر سلام.. وقول لإخوانا شعب الثورة له إكرام.. فمتعملوش زوبعة.. خلوها على ما يرام.. وأنا قلت لك ألف مرة ومرة من أيام.. بلاش كلام.. خذ مواقف شد بيها لجام.. رجع حقوق الغلابة والنبى ده حرام.. كل اللى بنشوفه ومسجل وبالأرقام.. وآخرتها إيه وللا إيه رب العباد علام.