التقى "بكار" ب"حمزاوى"، وركن "بكار" سيارته ليركب سيارة "حمزاوى"، وراحا يجوبان شوارع القاهره ليلًا وهما يتحدثان: "بكار": انت ليه مارضتش إننا ننزل نقعد فى مكان زى كل مرة؟ "حمزاوى": مخنوق ونفسى ألِفّ بالعربية كده طول الليل أتفرج على مصر اللى بتضيع. "بكار": مش راضى أكيد عن اللى بيحصل فى المقطم؟ "حمزاوى": ولا اللى بيحصل فى مصر كلها، دى بقت حرب شوارع، ناقص شوية صغيرة ومصر تنهار والإخوان شعارهم أنا ومن بعدى الطوفان. "بكار": دول مجانين حكم، واتسعروا، شهوتهم للحكم مفتوحة، وعندهم استعداد إنها تخرب ولا إنهم يسيبوا الحكم. "حمزاوى": دول بيستعملوا الخرطوش وكسر الرخام فى ضرب المتظاهرين.. الإخوان فَجَرُوا. "بكار": ما هم أوهموا الشباب الإخوانى إنها حرب مقدسة لنصر الإسلام ورفع راية الدين، وإن المتظاهرين ضدهم من الكفار العلمانيين اللى مش عاوزين ملة ولا دين، علشان كده الإخوان بيضربوا بحماس. "حمزاوى": لازم يحصل حاجة.. لازم حد يتدخل.. فين الجيش؟ "بكار": ما انت قولت قبل كده إنك ضد نزول الجيش!! "حمزاوى": لما الأمر يوصل بينا لحرب شوارع يبقى مفيش إلا الجيش، هو حيفضل يتفرج لحد إمته؟ مش عارف!! "بكار": لحد ماتخرب خالص وتبقى على وشك الانفجار، بس همه بيدرسوا الموقف من جميع أبعاده علشان تقليل نسبة المخاطر. "حمزاوى": ده المصابين النهارده تجاوزوا ال200، ناقص إيه تانى؟ "بكار": ناقص حاجة كبيرة تدوى علشان الجيش يتحرك. "حمزاوى": يعنى قصدك حريق زى حريق القاهرة؟ "بكار": ممكن.. وليه لأ، كل شىء جايز. "حمزاوى": بس ده حرام. "بكار": واللى بيحصل دلوقتى مش حرام؟ "حمزاوى": نحاول نكتب ونطالب الجيش بالنزول، نعمل هنا فى القاهرة وفى كل المحافظات توكيلات للسيسى بإدارة شئون البلاد، نعمل أى حاجة بدل مانغرق أكتر من كده. "بكار": نتحد الأول ونتكاتف جبهات وأحزاب، ونقف وقفة واحدة، ماهو مش معقول فصيل واحد يغلبنا على أمرنا ويقهرنا. "حمزاوى": أنا حبتدى أخاطب كل الناس من بكرة، وأقول لهم ينسوا موضوع الحوار مع مرسى؛ لأن الحوار ده ضحك على الدقون، ومفيش من وراه أى رجا، ده كله كدب فى كدب، ومناورة وتضييع وقت لحد ماهمه ينفذوا مخططهم. "بكار": وأنا معاك، أنا والحزب كلنا معاك ومع مصر، من بكرة حرفع حديثنا للحزب، واللى فيه الخير يعمله ربنا. "حمزاوى": تعالى أوصلك لحد عربيتك.. أنا تعبت من الكلام. "بكار": يلا يا "حمزاوى"، أنا فعلا محتاج أروح أنام.. والصباح رباح.
