شد المعلم فتوح النفس العميق وشعر أنه وقع في بئر سحيق، وجذب المعلم زينهم منه لاي الشيشة، وقال له التعميرة دي كلها تحبيشة، دي جاية مستوردة من بلاد بره، ولا عدت على جمارك ولا أسواق حرة، وغلبنا علشان نلاقي ليها الدولار، فقال له الملعم فتلة هو حد بيلاقي الدولار يا حمار، دي أسعاره جالها سعار.. ولا عدش في نفس للجنيه يحصله وعينه يا ولداه اتكسرت مش قادر حتى يبصله.. فتوح: خلاص بقى نغني كلنا لصباح.. أصله من يوم الدولار ما ضرب محدش مرتاح.. يلا قولوا ورايا ه فتحة ها هنشحت، ب كسرة بي بشدة.. ر ضمة روحي طلعت منك.. فتلة: يا عم الحكومة هتوقف الدولار عند حده، وللأرض هتخسف بيه وتشده، مسمعتش بتاع البنك المركزي وهو بيقول إنه هيوصل لخمسة جنيه.. زينهم: ودا بقى على أساس إيه.. فتلة: هو قال كدا وخلاص.. صدقوه بقى يا ناس.. حكومتنا حكومة أفعال.. مش بتاعة كلام عمال على بطال.. فتوح: يعني عايز تقنعني إن الحكومة عارفة إن المصري بيعاني.. فتلة: طبعًا يا معلم علشان كدا المجلس إداها الثقة من تاني.. فتوح: آه كدا بقى إحنا لقد وقعنا في الفخ.. بطل يا معلم تشوف أفلام خيال علمي علشان دي بتلحس المخ.. الحكومة ساكنة في برج عالي ومكاتب مكيفة، هتدوش نفسها بمشاكلنا وهمومنا هي ناقصة قريفة.. زينهم: يا معلم الحكومة شغالة.. فتوح: دي بلد مش محل بقالة.. فتلة: فين المستثمرين وفين السياح.. فتوح: راحوا في الوبا علشان ترتاح.. زينهم: فين برامج تنشيط السياحة وفين المستثمرين.. مش الوزيرة قالت إنهم هيجوزوا الفرص ويخلفوا منها عمال.. فتلة: دا الصنف معاكم النهاردة عامل شغل وعال العال.. فتوح: زهقنا خلاص من نبرة المؤامرات.. عايزين شغل بجد مش كلام خد وهات، بلاش الحلول السهلة والمسكنات، قناة السويس اتعملت في سنة وقدرنا نبدع، يعني شعب قادر مش اكتع، كفاية بقى مدة الإيد للي يسوى واللي ميسواش، يقوم ما يغضب علينا أو يزعل الدعم منه يتحاش، واللي فات علمنا إن اللي بيدي مش علشان سواد العيون ولا بيدفع ببلاش.. زينهم: حوش يا حواش.. فتلة: سيبك بقى من الدولار اللي ولع الدنيا نار، فواتير الكهربا كهربت البني آدمين والحكومة ودن من طين والتانية من عجين.. فتوح: هات يا زناتي البلاليين.. زينهم: وفواتير المية غرقت الناس، راح فين الإحساس فتوح: حس بينا يحس بيك ربنا.. في الغلب يا ناس مين في الدنيا دي قدنا.. وهنا صرخ فتلة وقال: بس بقى يا عم أنت وهو كفاية هزار، وطفوا بقى النار، دي الدماغ بقت ملحوسة، وكلامنا كله هلوسة.