نفث المعلم فتوح سحابة الدخان، ومن السطل حس إن في إيده سيف وبيحارب جنكيز خان، نهره المعلم فتلة وقاله كفاية ضحكت زباين القهوة، دا الرجل تدب مطرح ما تحب والفلوس توديك ما طرح ما تهوى، وضحك المعلم زينهم حتى بانت نواجزه، وأطلق نفس الدخان اللى كان في مناخيره حجزه، وقاله يا معلم هدى أعصابك ممنوش فايدة، دا أحمد حلمى خلاص أجوز عايدة وكتب كتابهم الشيخ نواف، والدخلة تمت متجيش تعيط بعد الزفاف.. فتلة: إيه يا معلم جرالك إيه.. هو الصنف مضروب ولا إيه؟! زينهم: يمكن شكله طالب معاه تهيؤات مرة فاكر نفسه بيبرس أو صلاح الدين ساعات.. زعلان على اللى ضاع وعايز يرجع اللى فات.. فتوح: يرضيكوا يا معلمين أدخل فرشتى وأنا مصرى اصحى ألاقى نفسى خليجي.. زينهم: لأ ميصحش كدا ولا تيجي... فتوح: لكنها حصلت يا ولاد الحلال.. وصحيت الصبح لقتهم بيقولوا صنافير اتباعت.. ضحكت في عقل بالى وقلت ليه هما المصريين للدرجة دى جاعت.. لكنهم قالولى بجد صنافير والمصحف مش بتاعتنا ودى حاجة لا تزعلك ولا تمس هيبتنا.. فتلة: هي حقوق بترجع لأصحابها، يعنى نشيل وزرها في الآخرة وعذابها.. زينهم: يا معلم كل الخبرا الاستراتيجيين قالوا إنها تبع السعودية، يعنى هي مش هبة ولا هدية.. فتوح: أنا مش هندى ولا داقق على قفايا عصافير.. كان إيه بس لزومه نتنازل عن تيران وصنافير.. فتلة: هو إحنا ممكن نرجع في البيعة دي.. أصلها مش تكية. زينهم: دى مش بيعة دى اتفاقية.. يعنى محسومة مية المية.. فتوح: يعنى خلاص مبقاش في صنافير.. زينهم: آه روح بقى كل عسل وفطير.. ولو فضلت تنهق من هنا لبكرة زى الحمير.. اللى بيخده الغراب بيفك بيه ويطير.. زينهم: أنا مش خايف غير بس إنها تفضل تتقطع من الجوانب.. النهاردة صنافير وبكرة شلاتين وحلايب.. فتوح: ويا سلام بقى لو اليونان قالتلك الإسكندرية دى بانينها قالب قالب، وتقف على بابنا وبعلو صوتها تطالب.. فتوح: لو كان الأمر أمرى كنت أقدر اشتريلك جزيرة ويخت فضي.. فتلة: باينها أيام طويلة ومش هتعدي..