وإن المكتوب ع الجبين لازم تشوفه العين، وإن ماحدش بيموت ناقص عمر، وكمان ما حدش عارف هايعيش كام سنة ولا هايموت فين، دى كلها مسائل بإيد ربنا سبحانه وتعالى، وواجب ع الكل إنهم يسلموا بيها، يقوموا العالم اللى ما عندهمش خشا ولا مروة ولا يخافوش ربنا.. يتزرزروا الزرزرة دى كلاتها، ويسحبوا السفير بتاعهم كمان ! بالذمة ينفع هذا الكلام التعبان، يا عم أبو سليمان ؟!! جزمة الصرماتى بعد أن أخذ نفسا عميقا من سيجارته الفلوريدا المنقرضة: يا جماعة الموضوع مش زى ما انتم بتقولوا كدا، انتم ولا مؤاخذة فاهمين الحكاية غلط، الجماعة الطليان زعلانين عشان الواد بيقولوا إنهم لقيوه يا عين أمه متنيل ومتشلفط آخر شلفطة، والعصابة اللى خطفته لعبت في وشه وجتته وطلعوا عين اللى جابوه زى ما يكون بينهم وبينه تار بايت قبل ما يسفروه ع الدار الآخرة ؛ مع إنهم يا أخى سابوا حاجته كلها سليمة زى ما هي، البزابورت والكارنيهات والنضارة وحتى الشنطة الحمرا اللى عليها علم إيطاليا فضلوا محافظين عليها جوه عنيهم ؟!! أبو سليمان التربى محللا الموضوع من وجهة نظره: طيب الحمد لله... شوفتوا ياجدعان... والله بلدنا لسه بخير... عصابة ومجرمين آخر تجرمة بس برضك طلعم ناس عندهم ذمة وأمانة بصحيح.. حافظوا على كل حاجة زى ما هي... الظاهر إن أبو الواد الإيطالى ده وأمه فلوسهم حلال ورجعت لهم تانى زى ما هي، شوف سبحان الله يا مؤمن المال الحلال عمره ما يضيع أبدا... المعلم أبوسالي: عليّ النعمة كل الكلام اللى انتوا عمالين تسوسوا فيه م الصبح ده كله رغى ع الفاضى ولا ليه أي فايدة ولا عايدة، العالم الطلاينة زعلانين جداعشان حاجة ما جبتوش سيرتها خالص؛ ولم ولن تخطر لكم أبدا على بال، دول يا إخوانا زعلانين م الخضة اللى اتخضوها... الجميع في نفس واحد: م الخضة ؟!! خضة إيه دى يا معلم ؟! المعلم أبو سالى مسترسلا: أيوه ياجماعة زعلانين م الخضة طبعا... أنا أفهمكم الحكاية... بقى يا جماعة أنا لى جار كان صاحبى وحبيبي، وكان بسلامته متجوز واحدة بنت ناس ألافرانكا شويتين وكانوا مربيين حتة كلب لولو ومراته بتموت فيه، قوم جات للراجل ومراته سفرية على أوروبا واحتاروا يحطوا الكلب فين؛ فخلوه عندى على سبيل الأمانة وبقوا يبعتوا له مصروف شهرى كان مبغددنا أنا والعيال وأمهم والكلب طبعا، وبعدين يشاء السميع العليم الكلب تخبطه عربية وهو بيعدى الشارع بسرعة ويموت موتة بشعة، قمت أنا فورا شادد له تليغراف قلت له فيه الكلب مات، وعنها مراته وألف جزمة قديمة تذكرتين وأرجع مصر حالا عشان تدفن الكلب بنفسها وتطمن عليه في مثواه قبل الأخير، وبعد الجنازة اللى كانت حارة والميت كلب والعزا والذي منه، قام جار ده واخدنى على جنب قبل ما يسافر تانى بالسلامة، وراح معاتبنى وقعد يقول لى بقى يا راجل انت عارف أن مراتى حياتها وروحها في الكلب اللى مات ده، تقوم انت خاضضنا الخضة الجامدة دى كلها وتبعت تلغراف مفاجئ تقول الكلب مات ؟!! ابعت الأول تليغراف قول فيه الكلب نزل يلعب في الشارع، وبعدين تليغراف الكلب خبطته عربية، وبعدين تليغراف الكلب مات، وعنها وسافر صاحبها وأنا استوعبت الدرس كويس، وبعديها بشهرين بعت له تليغراف قلت له فيه: أمك نزلت تلعب في الشارع.. جزمة الصرماتى مستحسنا رأى أبى سالي: والله وشكلك جبت التايهة يا عم أبو سالى تصدق الحكومة كان واجب عليها تبعت لإيطاليا تليغراف الأول تقول لهم فيه الواد ريجينى نزل يلعب في الشارع !!!