دشن مستخدمو موقع التواصل الاجتماعى «تويتر»، اليوم الجمعة، هاشتاجًا جديدًا حمل عنوان «هننزل ننتخب بالملايين»، تفاعل معه الكثير من المصريين، داعين خلاله جموع الشعب المصرى إلى المشاركة بكثافة في الانتخابات البرلمانية المقبلة، ومن جانبها رصدت «فيتو» بعض التعليقات. «لازم نكمل مشوار ثورتنا الجميلة» قالت ميرفت سعد: «هننزل ننتخب بالملايين علشان مصر بلدى يا أم الدنيا»، وأضافت زينب زين: «يا ريت نحس بان المفروض نختار ونتعلم ثقافة انك تختار بين الأخف ضررًا، لأن للأسف هي دى السياسية تختار بين السيئ والأسوأ». وغرد تامر قائلا: «هننزل ننتخب بالملايين هي ملايين دى فيها شك بس اتمنى الأغلبية تنزل»، وأضاف محمود عبد العزيز: «غدا المصريون بالخارج سيخرجون كعادتهم متحمسين سيقتدي بكم من في الداخل نثق في وطنيتكم انزلوا». وقالت إيناس عزت:«بصوتك هناخد حق شهدائنا من الجيش والشرطة والأبرياء»، وأضاف كريم مالك:«ده كفاية انك تحس بقيمتك وانت نازل تنتخب»، وتابعت ندى محمد: «لما مصر تنادى لازم نلبى النداء مصر نادت في 30 يونيو نزلت الملايين، والآن لازم نكمل مشوار ثورتنا الجميلة». «شارك من أجل مصر» وغرد أحمد محمود: «ده مش تفضل منك ده حق مصر عليك تحميها وترد لها الجميل، مصر أمانة لازم كلنا نحافظ عليها بدمنا مش صوتنا فقط»، وأضافت سارة فهمى: «دي آخر خطوة في خارطة الطريق اللي وافقنا عليها كلنا يوم 7/3 يبقى لازم تنزل عشان نكمل الطريق». وقال محمد جمال: «هننزل ننتخب بالملايين حتى لا نعيد مجلس قندهار السابق»، وأضاف فارس: «كل مصري بيحب بلده لازم ينزل»، وتابع محمد محمود: «انزل انتخب وكمل مشوار 30 يونيو لأن ثورتنا على الإخوان لسه مخلصتش لسه فاضل لها البرلمان انزل كمل ثورتك وابني بلدك». واستكملت أمل الدهشان: «انزل وشارك عشان مصر وقول بصوت عالى مش هنقاطع وهنشارك، انزل وشارك من أجل مصر، انزل وشارك عشان بلدنا تكون احسن انزل وشارك عشان مستقبل افضل، لاولادنا»، وتابع حمدى أحمد: «انزل انتخب واعمل اللي عليك متخليش حد يضحك عليك». الجدير بالذكر أن المرحلة الأولى من الانتخابات البرلمانية، تبدأ في 14 محافظة وهى «الجيزة، الفيوم، بني سويف، المنيا، أسيوط، الوادي الجديد، سوهاج، قنا، الأقصر، أسوان، البحر الأحمر، الإسكندرية، البحيرة، مرسي مطروح»، وتجري عملية الانتخابات في دوائرها خارج مصر يومي السبت والأحد الموافقين 17 و18 أكتوبر 2015. كما تجري عملية الانتخاب في دوائرها داخل جمهورية مصر العربية يومي الأحد والاثنين الموافقين 18 و19 أكتوبر 2015، وفي الحالات التي تقتضي إعادة الانتخابات تجرى الإعادة خارج مصر الاثنين والثلاثاء 26 و27 أكتوبر 2015، وداخل جمهورية مصر يومي الثلاثاء والأربعاء الموافقين 27 و28 أكتوبر 2015.
