لو قابلتك لجنة «شرطة» بعد العاشرة مساء وسألتك عن وجهتك، فإن أفضل رد سيكون «رايح الكباريه اللي علي الشارع».. هكذا سخر المصريون من قرار إغلاق المحلات في العاشرة مساء، ولأن القرار لم يحدد ميعاداً لفتح المحلات، فإن الشباب اقترحوا أن يتم فتحها في العاشرة والنصف مساء تحايلا علي القرار، ومزيد من التعليقات، فماذا قال رواد مواقع التواصل الاجتماعي؟ باسم الشيخ: أنا هنزل كل يوم الساعة 10 وآخد ترابيزة وكوباية شاي واقعد في نص الشارع واللي يقولي بتعمل إيه هقول له لجنة شعبية. علاء عوض: بص ياكابتن.. بعد ما يقفلوا المحلات والقهاوى من الساعة 10 بالليل ويسيبوا الكباريهات عشان عندها ترخيص سياحة.. لو قابلتك شرطة بعد الساعة 10 بالليل وسألوك..رايح فين؟ عاوزك ترد بكل براءة وتقول له: رايح الكباريه اللى على الناصية حضرتك. يا برنس.. القرار إنك تقفل الساعة عشرة.. اقفل عشرة وافتح عشرة ونص.. قشطة.. يعني منى. صفحة «افتكاسات مصرى أم الأجنبى» علي «فيس بوك» قررت أن تغلق في العاشرة: من يوم السبت البيج هتتقفل الساعة 10.. بس بالعند في الحكومة هنسيب النور مفتوح.. من النهاردة مفيش حكومة أنا الحكومة. محمد النمر: غرامة وإغلاق سنة كاملة عقوبة المقاهي التي لن تلتزم بالغلق.. حدش شاف ثورة يا جدعان؟ خيري: بيقول قفل المحلات لضبط سلوكيات الشعب.. لأ لأ مش كده، أنت تذنبنا وشنا في الحيط ونرفع إيدينا لفوق. عماد الفولي: الغلاسة الثورية.. هى انتظارك لبيان مجلس الوزراء بتحديد اليوم الفعلي لتطبيق قانون غلق المحلات بعد 10، وتنزل تقعد على القهوة من أول 10 وربع مع إن عمرك ما رحتها إلا نادرا. علي الجانب الآخر نشر الشباب نص الوصايا الخمسين لحسن البنا التي كان من ضمنها قرار الإغلاق وهو ما أثار استياء البعض، وكانت تعليقاتهم.. محمد عمار: إذا كان قرار غلق المحلات من الساعة 10 من ضمن الوصايا الخمسين التي طالب بها حسن البنا في القرن الماضي.. يبقي ماتضيعوش وقت وعرفونا باقي مطالب المرحوم عشان نعرف البلد رايحة علي فين ؟! نور السقا: حسن البنا يحكم مصر من مرقده.