شباب يرصدون أوجه الشبه بين مرسى والقذافى الرئيس لأهل بورسعيد: إحنا مش جزء واحد إحنا حتة واحدة!! توقع شباب "فيس بوك" أن يكون الرئيس محمد مرسى قد استعان بموبايل ماركة 6600 لتصوير خطابه الأخير، وهو السبب فى الصورة السيئة التى ظهر بها الخطاب، الشباب نصحوه بشراء كاميرا ديجيتال لتصوير الخطابات المقبلة، ولم يسلم مضمون الخطاب أيضًا من سخرية الشباب، الذين شبهوه بخطاب قروى يرسل رسالة لأهله من الغربة، ورصدوا أوجه التشابه بين خطابات مرسى والقذافى، فماذا قالوا؟ بسمة كمال: مرسى لأهل بورسعيد "إحنا مش جزء واحد، إحنا حتة واحدة".. فكرتنى بالقذافى لما قال "لكل امرأة الحق ف الانتخاب سواء كانت ذكرًا أو أثنى".. محمد الصغير: مرسى لأهل بورسعيد: أحييكم وأشوفكم قريبًا إن شاء الله.. وسلامى للعيلة كلها وتيتة وخالتو وبعت لكم 500 ريال على ما ابقى أنزل مصر.. بولس عياد: الراجل ده رومانسى جدًا بس بجد انت مش عايش معانا.. وبعدين انت متصور بموبايل ستة ستمية.. طيب كنت جبتلك كاميرا ديجيتال اتصورت بيها.. محمد عبدالقادر: بالاستقراء المتأنى لكلمة مرسى تأكدت أن الراجل ده بيحكم مصر اللى بتيجى فى جرنال "الحرية والعدالة".. محمد حسن: اللى ما رباهوش أبوه وأمه تربيه خطابات الرئيس مرسى.. منار البيسى: بتهرجوا.. مرسى خطب على سهوة كده واحنا كاشفين راسنا .. طيب اتنحنح قبل ما تدخل ولا حاجة.. حسن محمود: ملخص خطاب مرسى.. سا الخير عليكم.. مش كده بردو.. كفاية كده علشان تعبت .. يوسف عبد الحميد: مليش دعوة بقى أنا الوحيد اللى مشفتش مرسى وهو على الكنبة.. هموت وأعرف الأنتريه لونه إيه؟؟ ولا الصالون كان مُدهَب؟؟ أكيد الريس مكلف والصرف باين.. سلمى نعمان: لما تلاقى مرسى بيقولك إن من حكمة ربنا ان الثورة كانت يوم عيد الشرطة وده دليل على دورها .. اعرف إننا نزلنا يوم 25 نحتفل بعيد الشرطة ونرمى عليهم ورد .. وهما كانوا بيرموا علينا بخور؟ Status and tweets حسين محمد: أعلنت وزارة الصحة عن انتشار مرض السل البقرى مما يؤدى إلى إصابة أعداد كبيرة من الحمير والبقر.. يعنى لا قطارات ولا عربيات ولا بنزين ولا سولار وكمااااااان مفيش حمير.. رامى شنودة: بيزنس الموسم .. افتح مصنع شمع علشان الكهربا اللى بتقطع .. أو عربيات كارو وتجارة الحمير اللى هتزق العربيات بما إن مفيش بنزين.. صالح مصطفى: المفروض الفنان مدحت صالح يتعمله تمثال من العجوة.. لأنه الوحيد اللى توقع اللى هيحصل من 20 سنة وغنى "أنا عايز أعيش فى كوكب تانى".. علاء الزيات: يعنى إيه شرطة متدينة؟؟ يعنى لو حد مات ف أمن الدولة يكتبوا على الكيس بتاعه "معذب طبقًا للشريعة الإسلامية" بين قوسين"حلال".. رقية مندور: قطر تسحب طلبها بتأجير أبو الهول لمدة 5سنوات وتتقدم بطلب جديد يتضمن أن تتعامد الشمس على جبهة الأمير حمد بدلاً من الملك رمسيس الثانى لمدة 20سنة . حسن أحمد: مصر دلوقتى عندها 7000سنة حضارة .. والإخوان هما اللى رجعوها لبطن أمها تانى.. حسام أحمد: الحكومة توافق على قانون حظر روابط الألتراس فى مصر واعتبارها محظورة.. الألتراس مش هيسكت.. بس الصراحة أنا مع القرار ده.. ألف مبروك يا رجالة الألتراس.. انتوا دلوقتى على أول طريق الرئاسة.. جماعة الألتراس المحظورة.. والنبى حلو الاسم.. جابر أحمد: أبوإسماعيل: أفكر جديًا في الذهاب لسوريا للجهاد ولكنى منتظر الأمور تهدأ فى مصر.. الدنيا هنا هادية وزى الفل يا شيخنا الجليل، اتفضل حضرتك بالسلامة.. موبايلات بقى.. عبد الحكيم محمد: داروين فى نظريته بيفترض ان آلية "الانتخاب الطبيعى" هى اللى بتخلى بعض الكائنات تنقرض.. فى حين إن البعض التانى بيكمل ويعيش وينجو.. فى مصر عندنا المذابح هى اللى بتقوم "بالانتخاب الطبيعى جاهز ".. وبتعمل انقراض للشباب. سيد ربيع: وعلى رأى الحاج طلبة.. لما الدنيا تقفل فى وشك .. رن عليها من رقم تانى.. محمود شاهين: بابا الفاتيكان: مرسى لسه مبعتلناش سفير.. اشتغل إزاى أنا دلوقتى؟ شباب "فيس بوك": من النهارده مفيش حكومة .. إحنا الحكومة شعار "النهارده مفيش حكومة .. أنا الحكومة " الذى رفعه أحمد السقا فى فيلم " الجزيرة " ربما يتحقق قريبًا على أرض الواقع، وذلك بعد إقرار حق الضبطية القضائية للمواطنين، شباب "فيس بوك" تخيلوا شكل الشرطة المدنية الجديدة التى ستحل محل الشرطة، فماذا قالوا .. علاء غازى: الواحد المفروض ينزل الصبح كل يوم معاه كلابشات ورغيف وحلاوة طحينية.. .. محدش عارف هيبات قابض على حد ولا هو اللى مقبوض عليه.. محمود مرسال: الحاجة الوحيدة اللى محمسانى لقانون الضبطية القضائية ده إنى ممكن ساعتها أقف فى الشارع وأقول "من النهارده مافيش حكومة.. أنا الحكومة" ويبقى بجد.. وسيم شحاتة: إحنا شعب فاشل.. حتى الحرب الأهلية اللى شعوب أقل مننا بكتير عملوها مش قادرين نوصلها.. مع إننا بنحاول من سنتين.. إبراهيم سباق: محامى الجماعة الإسلامية: سننشئ «داخلية إسلامية» للمشاركة فى بسط الأمن، وللقوى الأخرى إنشاء داخليتها.. ومصدعين دماغنا بهيبة الدولة.. واهو بيقولك اهو كل واحد يعمل الداخلية بتاعته.. طيب عليا النعمة احنا متدلعين آخر دلع.. حمدى على: هو النائب العام طلع قرار إن المواطنين (دول هما) يقبضوا على المواطنين "دوكهما" ونفضل احنا نقفش فى بعض.. فكرونى بأيام المدرسة لما كنا بنجرى ورا بعض.. واللى يتقفش يبقى اتكهرب .. قرار لطيف الحقيقة.. محمد أحمد: أن يعملوا لجان شعبية عشان الداخلية مقصرة فى شغلها....واحنا هنعمل مجلس رئاسى عشان الرئيس متغيب عن عمله من 8 شهور.. محمد عثمان: مصر هى الدولة الوحيدة اللى المجرم ممكن يتصور فيها وهو بيرتكب الجريمة، ويحط الصورة على بروفايل الفيس بوك، ويعمل آد لوزير الداخلية، والشرطة ماتعرفش تمسكه.. مرسى يسحب سفيرنا فى "سيتى ستارز" بعد الاعتداء على بديع "قفل سفارة .. وسحب سفير" مطالب شباب الإخوان بعد واقعة الاعتداء على مرشد الجماعة محمد بديع فى مول "سيتى ستارز" الشهير بالقاهرة، الاعتداء الذى استنكره شباب الإخوان علق عليه آخرون "ياريتنى كنت معاهم "، على غرار فيلم "الطريق إلى إيلات"، "فيتو كافيه" رصدت تعليقات الشباب .. عبير خليل: عاجل: أنباء عن ضرب مرشد الرئيس ( محمد بديع ) فى سيتى ستارز .. وأنباء عن خروج محمد مرسى لإلقاء خطاب للأمة على هذا الاعتداء السافر، ويهدد بسحب السفير المصرى من سيتى ستارز.. السؤال هنا .. كام واحد كان نفسه يبقى فى سيتى ستارز ساعتها ؟ وليد الجلاد: واحد إخوانى بيقول لواحد مصرى: يعنى المرشد غلطان عشان أثبت إنه مواطن عادى زى بقية المصريين ونزل الشارع وأكل فى تشيليز؟ -المصرى قاله: يعنى إيه تشيليز؟ ملاك سمير: شباب الإخوان عاملين مظاهرة ضد الاعتداء على المرشد عايزين يقفلوا سفارة سيتى ستارز ويطردوا السفير السيتى ستارزى.. محمود عثمان: قال بيقولك لو حد حاصر مكتب الإرشاد بكره دى مش إخلاق الثوار..أيون صح دى مش أخلاق الثوار إنما أخلاق الثوار الحقيقيين.. يحاصروا مدينة الإنتاج الإعلامى.. يحاصروا محكمة دستورية.. ينزلوا يفضوا اعتصام بالقوة.. يعملوا ميليشيات مسلحة فى الشوارع ..