يارئيس وزراء بلدنا.. كل يوم تصاريح.. وكلام جميل كل حبة منتظم ومريح.. أنا باسمعه كالدهب غالى يداوى جريح.. وبعد حبة التقى دهبك كأنه صفيح.. لأننا محتاجين خطة ووعد صريح.. وكل يوم نلتقى تنفيذ بدون تلميح.. الناس خلاص من وعودك قربت حتسيح.. فبلاش كلام وابتسام فى كل يوم كالريح.. أنا عارف إن الظروف صعبة وساعات بتبيح.. الشدة والحزم لكن يبقى فيه تراويح.. وتفهمونا الحكاية بدون زفة وناس بتصيح.. الثورة معناها حقى يكون بدون تسفيح.. والناس عشمها تلاقى حضرتك بتطيح.. على كل ظالم حرامى مفتري وقبيح.. وتحقق المعجزة وتسلم المفاتيح.. وأنا ودعي بيقول ياريت نحكم بدون تشريح.. الثورة مفروض تقيد للمظلومين مصابيح.. وحأقول لك إيه واللا إيه.. فيه فى البلد تشبيح.. ومحتاجين وقفة جامدة بدون خطب ومديح.. والرمل بيقول حاجات فيها عبرة وتبيح.. إنك ترجع حقوقنا مهما كان الريح.. وأنا ودعى قال كل حاجة ومنفعة وترجيح.. وبكرة حأرجع أقول وأعيد بدون تجريح.. الثورة محتاجة عزم وتضحية وتفتيح.. ومافيش لزوم للكلام اللى كما المراجيح.