صعب جدا أن تتحدث عن كرة القدم فى ظل ما تعانيه البلاد من حالة اضطراب خطيرة، من الممكن أن تؤثر على كل القطاعات، وأعتقد أن المتسبب الأول فى التطور المذهل للأحداث هو المجلس العسكرى وقراراته البطيئة، وثانيا مجلس وزراء الدكتور عصام شرف، ومن واقع الأشهر العشرة فإنه كان بعيدا جدا عن اتخاذ القرار لعدم توافر الصلاحيات. ولكن نأتى إلى أصحاب الصلاحيات وعملية تلبيس طاقية ده لده، اتحاد كرة السفر، كما أطلقت عليه مسبقا هم الأفضل فى رئاسة البعثات، هم الأفضل فى إيجاد الحجج والأعذار فى كل المواقف. وأنا أعتقد أنها حرفة واحتراف ومهارة لا يقدر عليها أحد فى العالم، ونرجع بالذاكرة إلى المباراة المشبوهة، وكم الكلام الذى خرج من الكابتن سمير، وفى النهاية طلع الشعب المصرى هو الغلطان والكابتن كان عنده حق، وشفنا مشاكل وخناقات وانتهت فى النهاية بقعدة مع شيخ العرب.. الحكاية يا حضرات معسكر منتخب وهمى لبوب برادلى المدير الفنى للمنتخب المصرى بعد مباراة البرازيل، وهو ما أعلن عنه المدرب مرارا وتكرارا للتعرف على اللاعبين بشكل جدى من خلال معسكر طويل نسبيا، فى ظل توقف الدورى علشان المنتخب الأوليمبى المظلوم، وأيضا لتصريحات الجهاز الفنى بعد اختياراته أنها جاءت للمباراة فقط، لأن الوقت كان قصيرا جدا علشان كده هياخد أكبر كم من اللاعبين فى معسكر الإمارات، والبداية مع الإمارات علشان لسه اتحاد كرة السفر رجع لغى فكرة الإمارات وإلا هتبقى الإكرامية زيادة فى شهرين عيب أوى، والحجة كانت مافيش منتخبات نلاعبها طيب انتو على أى أساس عملتم معسكر واتفقتم عليه، طالما مافيش مباريات ولّا كانت عملية تخدير للمدير الفنى الأمريكى ولّا كانت عملية جس نبض لبرادلى لمعرفة مدى قوة شخصيته؟ عموما اتلغى المعسكر والحجة مافيش فرق، ماشى يا اتحادنا نعمل معسكر فى مصر علشان الراجل الأمريكى غريب عاوز يقرب من لعيبته شوية كتير، ويعرف كل حاجة عنهم ومن هنا شفنا احتياج الأهلى إلى لعيبته الدوليين، وهو لديه كل الحق طالما ليس هناك الأجندة الدولية ولا حتى مباريات ودية للمنتخب، فما الداعى لترك لعيبة؟ وبعد كده سمعنا من الاتحاد أن المنتخبات اعتذرت كلها عن لقاء المنتخب حاليا، وده كله بيجرنا لأسئلة كتيرة منها الذى يخص الاتحاد ومنها لبوب برادلى: نفسى أعرف هل فيه تنسيق بينكم وبين الأندية على اللاعبين الدوليين؟ نفسى أعرف هل عندك خريطة سنوية للمنتخب؟ بلاش يا سيدى لخمس سنوات طالما هيا طويلة عليكم قوى بس واضح إنه السنة كمان طويلة. نفسى أعرف مين المسؤول عن مخاطبة المنتخبات؟ نفسى أعرف هو انتم عارفين إنه فيه دوريات فى العالم الآخر شغالة ولّا برضه ماعندكوش علم. عموما الحجة جاهزة وقوية جدا وتم عرضها على الجهاز الفنى بقيادة الأمريكى بوب برادلى، أن مشكلات التحرير أثرت كثيرا على معسكر المنتخب غير الجاهز ولا المرتب ولا كان فيه معسكر من الأساس. نيجى شوية للكوتش علشان يفهم بالعربى إن الاتحاد محتاج شخصية قوية مش واحد عاوز ياكل عيش، لازم يعرف إن المعسكر كان على الورق فقط، لتهدئة الرأى العالم. وهو كمان بعد لقاء البرازيل لازم يعرف إنه إذا استمر بالشكل ده مع الحجج الواهية للاتحاد هيتعب كتير فى التعامل معهم، لازم يكون لديه من الشخصية فى التعامل والمواجهة واتخاذ القرار وفرض الرأى فى عمله وإلا هيكون المشوار صعب من البداية، وهتتعب كتير يا عم برادلى فى التعامل مع اتحاد كرة السفر والحجج الواهية. وأكيد همّا فرحانين ومحظوظين إنه فيه مشاكل فى التحرير أهو فوّتت عليهم مشاكل مع الأهلى والإعلام كانت هتفتح عليهم نار جهنم تانى اللى لسه قايدة.. من مولد سيدى الدوحة.