كشفت أسما منير، ابنة النجم شريف منير، عن رأيها في والدها كفنان، مشيرة إلى أنه نجح في تحقيق المعادلة الصعبة لأي نجم وهي حفاظه على مستواه. وقالت "أسما"، عبر صفحته الشخصية على موقع التواصل الاجتماعي "فيسبوك": "سيبكوا تمامًا من إنه أبويا، بس أنا عايزة أقولكوا رأئيي فيه كممثل، هو عمل أصعب معادلة في التاريخ وهي حفاظه علي مكانته". وأضافت: "بحترم فيه جدًا قوة رفضه حتى لو كانت الظروف بتجبره على إنه يشتغل، لأنه زيه زي أي حد عنده بيت وعيال ومصاريف، لكن ده ماخلاهوش ينحت". وتابعت: "بيتعب جدًا في شغله وبيبذل مجهود في تفاصيل الشخصية اللي بيلعبها، صبغ شعره أصفر، اهتم بصحته ولعب رياضة، عمل ست، اتعلَّم رماية علشان لو جاله دور ماسك فيه مسدس وبينشن علي حاجة متبقاش مصطنعة، ركوب خَيل، أخد دروس عبري عشان ولاد العم". واستطردت: "عمل كمان حركة ذكية، بيعمل أدوار تبان إن هي شبه بعض زي مثلاً لما عمل ست، ناس كتير ممكن تقول أنا مش هعمل دور ست مرتين، بس هو عمل ست في حزمني يا كوميدي، وعمل دور ست في هستيريا دراما توجع القلب". وعن مساندته للجيل الجديد، قالت نجلة الفنان الكبير: "من الفنانين القليلين جدًا اللي معندوش مانع يخاطر مع مخرج جديد، وكمان عمره ما استكبر إنه يشارك بطولة مع شباب جديد". واختتمت: "الراجل ده فضل صامد ومحافظ علي مستواه الفني من ساعة ما بدأ لحد النهاردة، وعدى عليه ناس كتير، ولسا محافظ علي مكانته الخاصة، وأنا أحب أشكره على مجهوده اللي عمله في حياته كلها، لأني بفتخر إن اسمي على اسمه، ربنا يحبب فيك خلقه دائمًا".