بكى مواطن بورسعيدي، من سوء الأوضاع المعيشية التي يعيشها نتيجة الغلاء وارتفاع الأسعار، مع توقف حركة التجارة في المنطقة الحرة، التي خسر بسببها كل ما يملكه من مال، وأصبح هو وأسرته يعيشون على المعاش الذي يتقاضاه. وعرض برنامج «العاشرة مساءً»، الذي يقدمه الإعلامي وائل الإبراشي، على قناة «دريم»، تقريرًا مع هذا المواطن تحث عن فيه عن مأساته، إذ قال: «لما طلعت على المعاش، عملت بال 100 ألف جنيه اللي أخدتهم من الدولة، فتحت محل أجرته لمدة عشرة أشهر، دفعت منهم 6 أشهر فقط، وقفلته تاني بسبب أوضاع البلد، لقيت نفسي غرقت، واضطريت إلى تسليم المحل وأصبحت أعتمد الآن على المعاش فقط، ومع الغلاء والرعب اللي إحنا فيه مابقتش أنام». وتابع المواطن: «والله كل يوم ما بنام، ناكل منين، وأعمل إيه؟ يعني لو لاقي شغل همشي أشحت بعد العمر ده كله، كنت عايش بكرامتي»، متابعًا كلامه: «النهارده اللقمة مش لقينها، يوم بناكل عيش وفول.. أقول أنا إيه عيب ماينفعش أقول الكلام ده.. لازم الدولة تحس بينا بعد الغلاء ده كله، إحنا نعمل إيه؟ ذنبنا إيه؟ نعمل إيه ونجيب منين عشان نقاوم الغلا ده؟ أعيش منين؟ وماعنديش حاجة أبيعها، مش قادر وصاحب مرض، بمشي أقع في الأرض». واختتم باكيًا: «الكرامة بنفقدها كل يوم، بقى مافيش كرامة، أتحول لحرامي أو مجرم في السن ده؟ عمرى ماعملت حاجة تغضب ربنا، أنا بطلب من ربنا الموت، ويرحمني بدل الذل اللي أنا فيه ده، بدل ما اتذل أكتر من كده».