استنكر الإعلامي محمد مصطفى شردي، قرار وزارة المالية بإقرار ضريبة القيمة المضافة، قائلًا: «إحنا بنتنفخ.. هو في إيه؟ هو كل يوم يضرب إيده في جيبي عشان ياخد فلوس زيادة.. أنا معاك إنك عاوز تطور البلد، لكن المواطن عاوز ياخد نفسُه شوية، الدولة طالعة منشار ونازلة منشار». وأضاف، خلال برنامجه «يوم بيوم» على فضائية «النهار اليوم»، مساء الثلاثاء، معلّقًا على تصريح عمرو الجارحي وزير المالية بأنَّ 90% من السلع الغذائية معفاة من الضرائب: «يا سلام.. لا والنبي جبت التايهة يا عم وزير المالية، إنت فاكر إنك أما تزود أسعار السلع التانية، بكده اللي بينتجوا الأكل مش هيزودوا أسعاره؟». ولفت إلى أنَّ السجائر ارتفع سعرها بشكل كبير، قائلًا: «أنا راجل مدخن.. إحنا بندخل للدولة في السنة 45 مليار جنيه.. بندخل فلوس زي قناة السويس ويجوا يرسمولنا صرصار على العلبة، الدولة المفروض تعمل للمدخنين تعظيم سلام». يُذكر أنَّ لجنة الخطة والموازنة بمجلس النواب، برئاسة الدكتور حسين عيسى، بدأت مناقشة مشروع قانون ضريبة القيمة المضافة الوارد من الحكومة، والذي يحل محل ضريبة المبيعات.