قال الإعلامي يوسف الحسيني، اليوم الإثنين، إنه يرفض كل ما فعله الرئيس عبد الفتاح السيسي فيما يتعلق باتفاقية ترسيم الحدود المصرية مع السعودية، والتي بمقتضاها تقع جزيرتي «تيران وصنافير» ضمن المياه الإقليمية للمملكة، مذكرًا الرئيس بحديثه على مسرح الجلاء، 24 فبراير الماضي، والذي قال خلاله نصًا: «قسمًا بالله اللي هيقرب لمصر هشيله من فوق وش الأرض»، معقبًا: «أنا هخلي بالي من مصر معاك، بس في سؤال، هخلي بالي من مين؟ ال90 مليون؟ ولا ال90 مليون بالأرض يا ريس؟ إنت مش أقسمت أن اللي هيقرب لمصر هشيله من فوق وش الأرض، طيب ما السعودية بتقرب أهي». أضاف الحسيني، خلال تقديمه برنامج «السادة المحترمون»، عبر فضائية «أون تي في»، «مش إحنا برضو ال90 مليون اللي اقسمت إنك تحميهم؟ حنا هنسلم الجزر يا ريس؟ طيب مش أم الرشراش دي مش مصرية؟ هنرجعها يا ريس؟ مرسي عندما بيّت بليلٍ التنازل عن مثلث شلاتين وحلايب للسودان الشقيقة، مش للسعوديين الوهابيين اللي حاربنهم في القرن ال19 عشان متطرفين، قولنا لا دي أرضنا، مع أن في وثائق عند السودانيين إنها قطعة من أرضهم». تابع: «ما يحدث انبطاح، إيه موقفك يا ريس من أن السعوديين على مواقع التواصل الاجتماعي بيقولولنا دي بفلوسنا وبكرة ناخد شرم الشيخ؟ تبجح وطول لسان، قرار حضرتك يا ريس أدى إلى بلبلة ما بين شعبين، كل ذلك لصالح السعودية التي أوصلت اليمن إلى هذه النكبة التي يعيشون فيها؟ السعودية التي طردت مليون موظف وعامل يمني عشان تضغط على علي عبد الله صالح كي يتنازل عن الأرض؟ قسمًا بالله يا ريس أن المصريين موافقين ياكلوا طوب وما يفرطوا في شبر من أرضهم». استكمل: «الجزيرتين ثمنهم إيه؟ استثمارات ب25 مليار؟ 30 مليار؟ 70 مليون؟ هو إحنا كنا واقفين هناك غفر مثلًا؟ دمنا اللي سال هناك ثمنه كام؟ أنا اتعلمت إننا مش بنسيب أرضنا، وأن دمنا ملوش ثمن، طيب هو عبد الناصر ماسلمهاش ليه؟ طيب السادات؟ طيب مبارك؟ مصر مبقتش محروسة، كانت محروسة، حتى التوقيت يا ريس غلط، توقيت مُهين ومُذل، ربنا يخليك لينّا يا ريس، سلمان خد حتة من اليمن، وجاي ياخد حتة من مصر، راجل شاطر والله، الدور والباقي على خيبتنا، ليه بنركع للسعودية؟».