تناول الإعلامي عمرو أديب، مساء الثلاثاء، التفجير الذي استهدف العاصمة البلجيكية بروكسل، وأسفر عن وقوع أكثر من 30 قتيلًا، وأكثر من 230 جريحًا؛ مؤكدًا أن جميع دول العالم أصبحت ليست بمنأى عن العمليات الإرهابية. قال أديب، خلال تقديمه برنامج «القاهرة اليوم»، عبر قناة «اليوم»، «الفكر المتطرف الإسلامي هو المتسبب في التفجيرات والعمليات الإرهابية، دعونا نواجه بعض بالحقيقة، هذا الفكر أصله إسلامي، والإرهابيين اللي عندنا إحنا كمان مصريين مسلمين، وبيقتلونا، وصلنا إلى هذه النتيجة». وأكد أديب أن العالم الآن يتساءل «لماذا يكرهنا المسلمون؟»، خاصة أن دول أوروبية آوت الكثير من اللاجئين السوريين والليبيين، في حين أن دول عربية رفضت استقابلهم، مضيفًا: «لسان حالهم الآن أنا بأكلك وبشربك وبقعدك معايا، واستضيفك وبدخلك مدارس، وبدفعلك من ضرايبي، وأنتو بتكرهونا ليه؟ أنتوا بتعملوا فينا ليه؟». من جانبها؛ عقبت زميلته الإعلامية رانيا بدوي، قائلةً: «طيب ما هما السبب في اللي حصل في بلاد المسلمين»، فرد أديب: «هو مين اللي عمل كده في سوريا والعراق؟ عايزين الحق ولا ابن عمه؟ اللي عمل كده قائد مسلم عربي، صدام حسين وبشار الأسد، قتلوا الناس بالكيماوي». أضافت رانيا: «الفكر الموجود يجب أن يواجهه الجميع، الغرب يواجهه والشرق يواجهه»، فقال أديب: «نحن لا نواجهه في مصر حتى الآن، واللي عندنا أخطر من اللي هناك، أنا اللي بيقتلني أخ عربي مسلم ولم نقبض على أجنبي إرهابي واحد، كل اللي بيقتلونا مصريين مسلمين، الفترة الجاية كلنا هنتبهدل». أردف أديب: «أقولها بشكل مباشر، هناك مسلمين طلقاء عايزين يقتلوا العالم، أنا عارف أن الحقيقة بتضايق، لكن اللي بيقتلونا منا»، فردت رانيا: «طيب والمسلم البريطاني خد منهجه منين؟ والمسلم الفرنساوي خد منهجه منين؟»، فعقب: «من الإسلام»، فردت: «يعني إيه من الإسلام؟ أنت هتجيبها في الإسلام؟ لا مش من الإسلام»، فرد: «أيوه من الإسلام، واجهي نفسك». تابع أديب: «في تيارات جوه الإسلام تُبيح ما يحدث، هو الإرهابي جاب الفكر ده منين؟ من الإسلام»، فأضافت: «أشخاص وأفراد مش الدين»، فرد: «لو مكنش عندنا التيار ده مكنش حد شجعه، هي الدولة الإسلامية اللي في سوريا والعراق إيه؟ متقوليش مش مسلمين، ليه بس المسلمين هما اللي بيعملوا الكلام ده؟»، فردت: «أنا مش بقول أن التيار مش عندي، لكن هما اللي استغلوه وغزوه سياسيًا». استكمل: «أنا عارف إن في ناس هترد عليّا وتجيبلي أحاديث وبتاع، ولكن هناك من اخترع هذه العقيدة، وهناك من زوّرها، وهناك من أحلها وصدرها، يا جماعة الناس بقت بتقتل بالنت، نواجه نفسنا بقى، الحكم فيه مشاكل، والدين فيه مشاكل، والفساد موجود، هو ده العالم العربي، يا ريت نواجه نفسنا، المعركة ليست معركة إرهاب ولكن معركة فكر». استطرد: «ليه مش بنشوف عناصر إرهابية يهودية؟»، فردت رانيا: «ليه هما الصهاينة إيه؟»، فعقب: «أنا بتكلم عن الدين، وأنتي بتتكلمي عن الجنسية، لكن أنتي بتشوفي حد يهودي مثلًا ماشي بيقتل بالرصاص؟ بتشوفي جماعات مسيحية بتقتل بالرصاص؟»، فقالت: «ما حضرتك مسلم وأنا مسلمة ومش ماشيين نقتل الناس بالرصاص! في تطرف في كل دين، مش كلنا إرهابيين».
