نشر الإعلامي باسم يوسف، مساء الاثنين، عبر صفحته الرسمية بموقع التواصل الاجتماعي «فيسبوك»، مقطع فيديو له مع الدكتور عصام حجي، العالم المصري بوكالة ناسا، والمستشار العلمي لرئيس الجمهورية السابق، يسخران خلاله من اكتشاف جهاز علاج «فيروس سي»، الشهير ب«جهاز الكفتة»، وذلك في ذكرى مُضي عام على الإعلان عنه. وكتب يوسف، على الفيديو، «اليوم الذكرى السنوية على الإعلان الأسطوري لجهاز الكفتة، أسرار تنشر لأول مرة، تعرف على السر داخل جهاز الكشف عن الفيروسات، شاهد قبل الشقط». وقال خلال الفيديو، «النهاردة معانا دكتور عصام حجي في ذكرى مرور سنتين على إعلان جهاز الكفتة الجميل، اللي كان المفروض إنه يساعد ملايين المرضى، ويدخلنا عملة صعبة، ويطلع مصر من عثرتها». ومن جانبه، علق «حجي» ساخرًا: «أنا شوفت الجهاز، وفكيته، وفتحته، ولما فتحت الجهاز تلاقي إريل، طالع منه سلكين، متوصل بقاعدة بلاستيك، والمختصين قالولي إن ده حجر مكي، يساعد على لقط الإشارات اللي بتيجي من الفيروسات». وقال باسم لحجي: «إنت مش نادم إنك حرمت مصر من الاكتشاف العظيم ده؟ إنت عملت مصيبة كبيرة»، فعلق الأخير: «أه فعلًا نادم». وأضاف يوسف: «عايزين نفكر إن الدكتور العظيم جمال شيحة، اللي هو عمل الجهاز، بقى عضو برلمان بالتعيين من الرئاسة نفسها، وطبعًا إحنا مش عارفين دكتور عبد العاطي فين، بس هو غالبًا بياخد كورسات في الطب». استكمل «حجي» بنبرة جدية، «كنت أتمنى أن يحصل رد النهارة من الدولة، وإن الإعلاميين يطلعوا يعتذروا»، ومن جانبه علق «يوسف»: «إنت طيب أوي.. شكرًا يا جماعة وإحنا آسفين جدًا، وكل كفتة وإنتم طيبين».