قال الإعلامي عمرو أديب، اليوم السبت، إن الدولة المصرية تسير في الطريق الخاطئ، مضيفًا: «بكل صراحة نحن لا نسير في الطريق الصحيح، نسير بخطى ثابتة في اتجاه الدولة الفاشلة، قدامنا سنة بالكتير وسنكون أمام دولة فاشلة، المشاكل بالجملة ومفيش حد بيحل حاجة، ولا أستثني أحدًا». تابع أديب، خلال تقديمه برنامج «القاهرة اليوم»، عبر قناة «اليوم»، «إحنا بنولع في بعض، ومش محتاجين أي تآمر من الخارج، وكأننا نريد أن نعود كما كنا، نعود للعهد السابق، نحن لا نعمل إلا تحت الضغط، مش بنعمل أي حاجة غير إننا بنقول (حسبي الله ونعم الوكيل)، أنا مش فاهم المجتمع عايز إيه». استكمل: «المركب هتولع وهتغرق، وهيجي الوقت اللي محدش فيه هيغيثنا، أنا شوفت في التاريخ منافسة على حكم دولة، لكن مشوفتش أبدًا إننا نتخانق على أن ميكونش في دولة، وهنروح في داهية كلنا». استطرد: «يبدو إن مرسي لازم يرجع، أصل عشان نبقى كويسين لازم ناخد بالجزمة من تاني، علشان نرجع نقول يا ريتنا ما كنا عملنا كده، ده حتى الوزراء بيكرهوا بعض وبيحاربوا بعض وعايزين يتصلح حالنا إزاي؟». وأكد أديب أن «الدولة المصرية تسير في طريق السقوط، والحل إن المسئولين يشتغلوا بجد، يكون في حلول بجد، عايزين يحصل ثورة حقيقية في التقدم، نحن نرغب أن نتقدم لكننا لا نتقدم، وأخشى أنه بعد سنوات أن يُكتب في كتب التاريخ أن المصريين قاموا بثورة ولكنهم لم يستغلوها ما أدى إلى سقوط دولتهم».
