استنكر الإعلامي محمود سعد، اليوم الأربعاء، واقعة عرض الإعلامي أحمد موسى، صورًا فاضحة نسبها للمخرج السينمائي والنائب البرلماني خالد يوسف، ببرنامجه «على مسئوليتي»، عبر فضائية «صدى البلد»؛ مؤكدًا إن ما حدث «مهزلة وكلام قذر». وأضاف سعد، خلال برنامجه «آخر النهار»، عبر فضائية «النهار»: « لو الناس مش عايزة حد من الإعلاميين يبقى متشفوش، ووقتها هيقعد في البيت، لأن ده خطر، والسكوت عن ما يحدث هيخلي المجتمع زي المهلبية، والسكوت معناه إنك كمواطن موافق، وكل واحد يخلي باله من لغلوغه ، زي ما قال عمنا عادل إمام، مع إن عارف إن مبقاش حد يقدر يخلي باله من نفسه، في ظل ما نراه على الشاشات». وتابع: «أنا مبقتش قادر أتفرج على التليفزيون خالص، الله يكون في عون الشعب، أنا رأيي إن الناس تقفل التليفزيون وتقعد الإعلاميين كلهم في البيت، مش عارف إنتوا بتتفرجوا ليه، نعلم إن بعد الثورات يحدث انفلات، بس دي فوضى وانفلات مبالغ فيه، عايزين نودي الناس فين تاني، إيه المطلوب تاني، كفايكم بقى، أي حد بقى بيقول أي حاجة عن أي حد على الهواء بدون أي قيود، بل أن بعض الناس كمان تتناقلها على أنها حقيقة». واستكمل: «أنا أُقدر وأُثمن خالد يوسف، وكان رأيي أن لا يدافع عن نفسه في الإعلام أصلًا ويذهب إلى القضاء مباشرة، أعلم أنا كلٌ منا يؤخذ منه ويُرد عليه، ولكن ما يحدث في الشاشات الفضائية ما هو إلا فوضى، وما يحدث أيضًا ليس بصراع أشخاص، بل أكبر من ذلك، سيبك من الهرتلة اللي بنشوفها، وهناك قضاء سيُعطي كل حق حقه»، مؤكدًا أن «الإعلام مش حر، مفيش إعلام حر في أي حتة في العالم».